‘नेपालीहरुको मन जोड्ने प्रयास’

असोज २८ मा बस्तीको शिलान्यास भयो । माघ २२ मा, अर्थात् सोमबार बस्ती निर्माणको १०० दिन पूरा भएको छ । माघ २४ गते बस्ती हस्तान्तरण गर्ने लक्ष्य राखेर बस्ती निर्माण कार्य सुरु गरिएकोमा माघ २१ गते नै हस्तान्तरण गर्ने तयारी भइरहेको सीतारामले जनाएका छन् ।

फाउन्डेसनले १२ कट्ठा जग्गामा ४७ घर बनाइरहेको छ । सीतारामका अनुसार, ५ करोड ९५ लाखको लागतमा बन्न लागेको बस्तीका लागि अझै १ करोड २५ लाख रुपैयाँ अपुग छ ।

‘तर पनि हामी निर्धक्क काम गरिरहेका छौँ,’ उनले भने, ‘बस्ती हस्तान्तरण हुने बेलासम्म दाताले सहयोग गरेर रकम जुट्नेमा हामी विश्वस्त छौँ । अहिलेसम्म सहयोग गर्नुभएको छ, अब पनि गर्नुहुन्छ होला ।’ अहिले बस्ती निर्माणमा २ सय ६१ कामदारले काम गरिरहेको पनि उनले बताए । घर जमिनको सतहबाट पाँच फिटमाथि उठाएर दुईतले बनाउन लागिएको छ ।

चौथो नमुना बस्तीमा मुसहर र चमार समुदायको बसोबास रहनेछ । यो बस्ती निर्माण गरेर मानवीय धर्म निर्वाह गरेको सुनाउँदै सीतारामले थपे, ‘यो बस्ती अर्थपूर्ण छ । यहाँ बस्ती मात्र बनेको हैन, मन बनाउने प्रयास गरेका छौँ । नेपालीहरूको मन जोड्ने प्रयास गरेका छौँ ।’

बस्तीभित्र ४० फिट अग्लो भ्यु टावर, अपांगमैत्री, बालमैत्री र वातावरणमैत्री दुइटा मन्दिर, बालउद्यान, सामुदायिक भवन, प्राथमिक विद्यालयलगायत बनिरहेको सीतारामले बताए । १७ दिनयता बारादेखि झापासम्म महोत्तरी, सर्लाही, मोरङलगायतका ३४ सय परिवारलाई न्यानो कपडा वितरणसमेत गरेको उनले सुनाए ।