उठ्दै छ थारू फिल्म

‘मातृभाषी फिल्म बनाउने हो भने व्यापार मात्रै पनि हेरेर हुन्न । समुदायको लागि योगदान पनि त हो नि !’
ठाकुरसिंह थारू

नेपालगन्ज — थारू भाषाको फिल्म ‘भुरभुरा रहर’ दसैंमा प्रदर्शन हुने तरखरमा छ । मूलधारको नेपाली फिल्ममा जत्तिकै लगानी रहेको भनिएको फिल्मको सुटिङमा अत्याधुनिक क्यामेरा र ड्रोनसमेत प्रयोग गरियो । मुख्य कलाकारहरू इन्द्र चौधरी र नायिका भीष्माकुमारी चौधरीले राम्रै पारिश्रमिक लिए ।

यी उदाहरणले पछिल्लो समय थारू फिल्म उद्योग उठ्दै गरेको संकेत गर्छन् । ‘भुरभुरा रहर’ का निर्माता हुन् रामलाल चौधरी । थारू फिल्ममा २० लाखभन्दा माथिको लगानी जोखिमयुक्त मानिन्छ । तर उनी भने लगानी उठ्नेमा ढुक्क छन् ।

‘पूर्वदेखि पश्चिमसम्मको तराई बेल्टमा थारू समुदायका लाखौँ दर्शक छन् । त्यसैले मेरो फिल्मले लगानी उठ्नेमा म ढुक्क छु,’ उनले सुनाए, ‘मलुकभरि एकसाथ प्रदर्शनको तयारीमा छौँ ।’

Yamaha

उक्त फिल्म निर्देशन गरेका हुन् सञ्चारकर्मीसमेत रहेका मदन चौधरीले । कथावस्तुमा मिहिनेतसँगै प्रविधिको भरपुर प्रयोग गरिएका कारण फिल्मले राम्रै बजार लिने दाबी छ उनको । ‘थारू मातृभाषामै फिल्म हेर्नेको लहर पनि पछिल्लो समय बढेको छ,’ उनले भने, ‘त्यही भएर अब लगानी र गुणस्तर दुवै दिनुपर्छ ।’

हुन त वर्षदिनअघि प्रदर्शनमा आएको ‘तुहारविना का जिना’ फिल्मले पनि राम्रो बजार लियो । जम्माजम्मी १० लाख रुपैयाँमा बनेको फिल्मले लगानी उठाएर राम्रो मुनाफा गरेको दाबी छ । अभिनेत्री अनुराधा चौधरी आफूले यो फिल्मबाट राम्रै पारिश्रमिक लिएको बताउँछिन् ।

अभिनेता सुरजको पनि दाबी त्यस्तै छ, ‘मेरो अभिनय यात्रामा सबैभन्दा बढी पारिश्रमिक लिएको यही फिल्म हो । थारू फिल्ममा पारिश्रमिक पाउनु नै पनि ठूलो कुरा हो ।’

दर्जनभन्दा बढी थारू फिल्ममा अभिनय गरिसकेकी अनुराधा भने पारिश्रमिक मात्रै पनि ठूलो कुरा नभएको बताउँछिन् । ‘मातृभाषी फिल्म बनाउने हो भने व्यापार मात्रै पनि हेरेर हुन्न,’ उनले भनिन्, ‘समुदायको लागि योगदान पनि त हो नि ।’

त्यसो त करिअरका सुरुआती दिनमा युवाहरू सोखकै लागि मात्रै पनि फिल्ममा आउने गरेका छन् । पछिल्लो समयमा भने निर्माताहरूले कलाकारलाई पारिश्रमिक दिन थालेका छन् । ‘तुहारविना का जिना’ भन्दा अघि अनुराधाले ‘अभागिन बनल सुहागन’ मा पनि राम्रै पारिश्रमिक लिएकी थिइन् । ‘बौछार’, ‘जाली संसार’, ‘लुटल जिन्दगी’, ‘करम’, ‘बहार’ लगायतका फिल्म पनि उनले सित्तैँमा खेलिनन् । डोटेली भाषाको ‘सोरै’ मा विरज भट्टसँग स्क्रिन सेयर गरेकी उनले पछिल्लो समय फिल्मसँगै म्युजिक भिडियोतिरको यात्रा पनि लोभलाग्दो बन्दै गरेको बताइन् । उनी थारू म्युजिक भिडियोका व्यस्त मोडलमध्ये पनि पर्छिन् ।

म्युजिक भिडियोका हकमा नयाँपुस्ते मोडल सुनीता दहित पहिलो नम्बरमा छिन् । हालसम्म नेपाली र थारू गरी दुई दर्जनभन्दा बढी म्युजिक भिडियोमा मोडलिङ गरिसकेकी २१ वर्षे सुनीता एउटा भिडियोका लागि ४० हजार रुपैयाँसम्म पारिश्रमिक लिन्छिन् । ‘सोखसँगै कमाइ पनि राम्रो हुँदै गएको छ,’ उनले भनिन्, ‘व्यावसायिक करिअरकै लागि पनि यो क्षेत्र भरपर्दो बन्दै छ ।’

सुनीतालाई नै पछयाउँदै छन् बर्दियाकी मोडल ऋतु नानु र बाँकेकी रविना चौधरी । यी दुई पनि दर्जनभन्दा बढी थारू गीतमा देखिइसकेका छन् । ऋतुले अभिनय गरेकामध्ये ‘हाई मोर डार्लिङ...’, ‘चौअन्नी मुस्कान...’, ‘मचैलो धमाल...,’ ‘कोकोकोला फिगर...’, ‘आँखिक इसारा...’, ‘लभ यु..’, ‘फूलकुमारी...’ लगायतका भिडियो चलेकामा पर्छन् । ‘अहिले पनि म्युजिक भिडियोका लागि अफर आइरहेको छ,’ ऋतुले भनिन्, ‘पढाइसँगै मोडलिङलाई पनि निरन्तरता दिँदै आइरहेकी छु ।’

उता, गीतहरू पनि धमाधम रेकर्ड भइरहेका छन् । बाँकेका गायक खेम भौगोरियाले एक सय गीत गाइसकेका छन् । कतिपयको म्युजिक भिडियो सार्वजनिक भइसकेको छ । पछिल्लो समय थारू युवामाझ नाम कमाएका विश्वसागर परियारका ४० भन्दा बढी म्युजिक भिडियो आइसकेका छन् । ती अधिकांश भिडियो युवा लक्षित छन् ।

‘हरेक गीतमा दर्शकलाई नचाउने मेरो उद्देश्य हो । त्यसमा सफल पनि भएको छु,’ उनले भने, ‘एउटा गीतका लागि २५ हजार रुपैयाँसम्म पारिश्रमिक लिने गरेको छु ।’

मोडलका रूपमा भने पछिल्लो समय नरेश जगन्नाथ, दीपक, राम, राजकुमार र मनोज चौधरी लगायतका युवाहरू म्युजिक भिडियोतिर तानिएका छन् ।

प्रकाशित : भाद्र १४, २०७५ ०७:५६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

तराईबाट तामाङ फिल्म

कान्तिपुर संवाददाता

काठमाडौँ — पछिल्लो समय तामाङ भाषाको फिल्म निर्माण र प्रदर्शनको क्रम बढदो छ । केही अघि मात्रै भक्तपुरको बाराही हलमा अजय स्याङतानको ‘आप्लेङला नाम्सा’ (मितबाको गाउँ) देखाइएको थियो ।

त्यसको केही साताअघि जनक गुरुङको ‘घ्रान’ (कसम) । यति बेला भने अजय हुत्त लामाको ‘सेमरिन मुला माया’ (मनकै छ माया) ले तराईबाट प्रदर्शन यात्रा सुरु गरेको छ ।

सर्लाहीको हरिऔन सिनेमाघरमा ‘सेमरिन मुला माया’ लाग्यो । यसअघि ‘क्राबा ङाला सेम’ (रोएको मेरो मन) बनाएका अजयको ‘सेमरिन मुला माया’ आउँदो शनिबार काठमाडौंको सिद्धार्थ हलमा लाग्दै छ । तामाङ बहुल प्रदेश नं ३ का जिल्लाहरूमा पनि उनी फिल्मसहित पुग्दै छन् ।

‘यी सबै विशेष सो हुन्,’ उनले भने, ‘अल नेपाल रिलिज पुस १३ देखि हुँदै छ ।’ उनका अनुसार मूलधारका वितरकहरूमार्फत अल नेपाल रिलिज हुन लागेको यही पहिलो तामाङ मातृभाषी फिल्म हो । ‘राम्रो फिल्म बन्यो भने दर्शक र बजार दुवै छ,’ उनले भने, ‘मातृभाषी फिल्मकर्मीका लागि यो सुखद अवसर हो ।’

फिल्ममा भने उनले झुक्किएर हुने स्वाँगेभाइ (सहगोत्री) विवाहको मुद्दा उठाएका छन् । ‘तामाङ समुदायमा सयभन्दा बढी थर छन्,’ काभ्रेको नमोबुद्धका सञ्जयले भने, ‘थर प्रणाली थाहा नहुने नयाँ पुस्ताका लागि यो फिल्म विशेष पाठ हुन सक्छ ।’ आफूले सकभर तामाङ सांस्कृतिक परिवेशलाई फिल्ममा समेटेको पनि उनले दाबी गरे ।

अभिनेता सविन श्रेष्ठको समेत विशेष भूमिका रहेको फिल्ममा उनी आफैं पनि खेलेका छन् । खुसी घिसिङ, संगीता दोङ, भीम तामाङ, राजु झक्कास वाइबा, कमल लोप्चन, कमल योञ्जन, निमा दोङ, रुचिका गोले र निक्की दोङको लगायतको अभिनय छ ।

प्रकाशित : भाद्र १४, २०७५ ०७:५४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT