तीज गीतमा स्याङजाली

प्रतीक्षा काफ्ले

स्याङजा — तीजको भाकामा महिलाका स्वर मात्रै छैनन्, पुरुषले पनि बराबरी गाएका छन् । यसपटक बजारमा आएका अधिकांश तीज गीतमा स्याङ्जाली मूलका कलाकारको वर्चश्व देखिएको छ ।

लोकगायकहरू (बायाँबाट) रामजी खाँड, पशुपति शर्मा र घनश्याम रिजाल

कतिपयले आफ्नै रचनामा लय र स्वर दिएका छन् भने कतिपयले आफूले लेखेर अरूलाई गाउन लगाएका छन् ।


गायक घनश्याम रिजालले यस पटक आधा दर्जनभन्दा बढी तीज गीत गाएका छन् । अधिकांश गीत उनैले लेखेका हुन् । कतिपयमा स्वर दिएका छन् भने आफ्ना सिर्जनामा अरूलाई गाउन पनि लगाएका छन् ।

Yamaha


‘यसपालि छुन हुनि भए त मायालाई...’ ले पछिल्लो समय बजार लिइरहेको रिजालले बताए । यसमा पशुपति शर्माले लय दिएका छन् भने रिजाल र सुमित्रा काफ्लेको स्वर छ । यस्तै ‘जन्मघर माइतैमा...’ भन्ने गीतमा रिजाल र सुनीता पौडेलको स्वर छ । रिजालले नै लेखेको ‘टलक्कै टल्केको सारी...’ मा राजन कार्कीले स्वर दिएका छन् । ‘नहेर राजै त्यसरी...’ मा लय रामजी खाँडको छ ।


‘यस पटक तीजसँग जोडिएका थुप्रै गीत बजारमा ल्याइयो,’ रिजालले भने ।


यस्तै लोकदोहोरी गायिका कला पंगेनीले यो वर्ष ‘चिटिक्कै मलाई सुहायो...’ गीत तीजकै छेकोमा ल्याइन् । विदेश गएको श्रीमान् र घर चलाएर बसेकी श्रीमती बीचको मायाप्रेम र झगडालाई गीतमा उन्न खोजेको उनले सुनाइन् ।


लोकदोहोरीमा बेग्लै पहिचान बनाइसकेका पशुपतिका पनि तीजमा यस पालि एक दर्जन गीत आएका छन । कोमल वलीलाई व्यंग्य गर्दै गाएको ‘माननीयज्यू...’ ले लोकप्रियता पाइरहेको छ । गत वर्षको तीजमा ‘बिहे नगरी नेता बन...’ गीतले पनि बजार लिएको थियो । ‘तीज भनेर, किन आउँथे मामा लिन माइजू छाडेर...’ गीतमा पनि पशुपतिकै शब्द र स्वर छ ।


मौलिक तीज भाका समेटर गायक रमेश बीजीको गीत पनि बजारमा निस्किएको छ । ‘अहिलेको समयमा मौलिक गीत बजारमा आउनु भनेको ठूलो कुरा हो,’ विन्ध्यवासिनी म्युजिक प्रालिका निर्देशक सुवास रेग्मीले भने, ‘यस्ता दुईचार स्रष्टाले मात्रै संस्कृतिको प्रतिनिधित्व गर्दै मौलिक तीज गीतलाई अगाडि ल्याएका छन् ।’


रिजाल, शर्मा, पँगेनी, बीजी र खुमन अधिकारी स्याङजावासी हुन् । अधिकारीले पनि तीजको भाकामा चेलीबेटीका मर्म समेटेर आधा दर्जन गीत बजारमा ल्याएका छन् ।

प्रकाशित : भाद्र २५, २०७५ ०८:४८
प्रतिक्रिया
पठाउनुहोस्
ADVERTISEMENT

भीषणको ‘खोर्सानी डल्ले’

कान्तिपुर संवाददाता

काठमाडौँ — गायक/संगीतकार भीषण मुकारुङ नयाँ गीतसहित आएका छन् । पूर्वेली भाकाको त्यो गीत ‘खोर्सानी डल्ले’ को म्युजिक भिडियो पनि बनेको छ । उक्त भीषण आफैँले लेखेका र संगीतबद्ध गरेका हुन् । संगीत संयोजन राजु कार्कीले गरेका हुन् ।

लोकभाका नेपाली संगीतको मूल कुरा भए पनि यो हराउँदै गएकाले आफूले ‘खोर्सानी डल्ले’ निकालेको भीषणले बताए । ‘हाम्रो संगीत पनि पाश्चात्य संगीतको प्रभावले थिचिएको छ,’ उनले भने, ‘लोकभाका हाम्रो मौलिक सम्पत्ति हो, चिनारी हो । नयाँ पुस्तालाई यो बोध गराउनु जरुरी छ ।’


पछिल्लो गीतमा आफूले राई समुदायको रिसिया र लिम्बूको हाक्पारे शैलीलाई फ्युजन गराएको उनले जनाए । ‘भिडियोमा किरात संस्कृति झल्काउन खोजेको छु,’ उनले भने ।


‘खोर्सानी डल्ले’ को भिडियोमा विल्सनविक्रम राई उर्फ तक्मेबुढा, कुल्फीवाला उपनामले सामाजिक सञ्जालमा भाइरल भएका मनकुमार राई, रामचन्द्र अधिकारी, सुरवीर पण्डित, अरुणा कार्की र रेखा लिम्बूले अभिनय गरेका छन् । विल्सनले निर्देशन गरेको भिडियोको छायांकन ज्ञानेन्द्र शर्माले गरेका हुन् भने भरत रेग्मीले सम्पादन ।

प्रकाशित : भाद्र २५, २०७५ ०८:४८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT