ब्रान्ड हब

ब्रान्डेड सामानका लागि दरबारमार्ग नै पुग्ने उनी एउटा प्रतिनिधि पात्र मात्रै हुन् । चर्चित ब्रान्डका लत्ताकपडा र अन्य सामग्रीप्रतिको लगाव बढेसँगै ब्रान्डेड पसलहरूको क्षेत्र दरबारमार्ग आफैंमा एउटा ब्रान्ड बनेको छ ।

दरबारमार्ग सँगै बढेको सपिङ कल्चरकै कारण उपत्यकामा मात्रै दुई दर्जनभन्दा बढी ठूला सपिङ मल सञ्चालन हुन पाएका छन् । तिनमा पनि अन्तर्राष्ट्रिय ब्रान्डको ट्याग लगाएका सामग्री भेटिन्छन् । तर, पनि ब्राण्डेड सामग्री किन्नुपरे दरबारमार्ग उपयुक्त गन्तव्य ठान्नेमा अचेल उच्च वर्गका मात्रै छैनन् । यही आकर्षणका कारण दरबारमार्गका १६५ आउटलेटमा प्राय: चर्चित ब्रान्डकै पसल छन् । रिबक, नाइक, पुमा, एन्टा, ली, युएस पोलो, ग्लोरडानो, बेन्ट्ली लगायतका ब्रान्डेड उत्पादन दरबारमार्गमै पाइन्छन् । कपडासँगै इलेक्ट्रोनिक्स र गहनाका पसल पनि यहाँ छन् ।

पछिल्लो समय व्यापारमा प्रतिस्पर्धा बढेसँगै पसलहरूले ग्राहक तान्न विभिन्न योजना ल्याउन थालेका छन् । ‘ग्राहक आकर्षण गर्न सेल अफर सार्वजनिक गरेका छौँ,’ वाच एन्ड सी पसलका भरत चौलागाईले भने । वाच एन्ड सी स्टोरमा इटालियन, अमेरिकन, डेनिस ब्रान्डका घडी बिक्री हुन्छन् । चौलागार्इंका अनुसार, दरबारमार्गका पसलहरूमा पहिले मुख्यत: नेपाली उच्च घराना र विदेशी ग्राहकलाई लक्ष्य गरिएको हुन्थ्यो । तर, अचेल नेपाली मध्यम वर्गीय उपभोक्तालाई पनि तान्ने उपाय गर्न थालिएको छ ।

‘हाम्रोमा रहका ब्रान्डेड घडीहरू १० हजार देखि २५ हजार रुपैयाँसम्मका छन्,’ चौलागाईंले भने, ‘त्यसमा पनि केही छुट छ । तर, चाडबाड आए पनि ग्राहक त्यत्ति आइहालेका छैनन् । यस वर्ष दरबारमार्गको व्यापारमा मन्दी देखिएको छ ।’न्यु ब्यालेन्सका ऋषभ गुरुङको अनुभव पनि फरक छैन । ‘हामीले अमेरिकन ब्रान्ड दुबईबाट आयात गरी बिक्री गर्दै आएका छौँ । बिगसेल अन्तर्गत ६० प्रतिशतसम्म छुट दिएका छौँ,’ उनले भने, ‘तर, ग्राहक नै छैनन् ।’

न्यु ब्यालेन्स स्टोरमा १५ सयदेखि २ हजार रुपैयाँसम्मको क्याप पाइन्छ । जुत्ता ७ हजारदेखि १० हजार रुपैयाँसम्मका छन् । टिसर्ट २२ सयदेखि २४ सय रुपैयाँसम्मका पाइन्छन् बिक्री हुन्छ । उक्त मूल्यमा कपडाअनुसार ६० प्रतिशतसम्म छुट दिएको गुरुङले बताए । ‘बिगतका वर्षभन्दा यसपाली भिडभाड कम छ,’ उनले भने ।
दरबारमार्गमा ग्राहक घट्दै जानुमा उनी गत वर्षको सरकारी अनुगमनलाई दोष दिन्छन् । ‘अनुगमनको क्रममा व्यवसायीहरूले बढी मूल्य लिँदा रहेछन् भन्ने हल्ला फिँजियो । भ्याटबाट ठगी गरे भन्ने हल्ला भयो,’ उनले भने, ‘त्यसैले ग्राहकहरू दरबारमार्गबाट भडकिए ।’

ग्राहकको अनुहार देखिन कम हुँदै गएपछि केही पसलले ‘सेल’ ट्याग झुन्ड्याउनुपरेको छ । केहीले ‘एउटा खरिद गर्दा अर्को फ्री’ भन्नेसम्मको सूचना राखेका छन ।
चाडबाडका बेला धेरै सरसामान किन्ने आम नेपाली उपभोक्ताको बानी हुन्छ । यो मनोविज्ञान बुझेका दरबारमार्गका व्यापारीहरू पनि आउँदो दसैँतिहारलाई लक्ष्य गरेर ग्राहक तान्ने नयाँ उपाय अपनाउँदै छन् ।

‘केही नयाँ अफर सार्वजनिक गर्ने योजनामा छु,’ इटालियन ब्रान्डका चस्मा बिक्री गर्दै आएका अप्सन पसलका राजु शाक्यले भने, ‘बिगतको तुलनमा कारोबार नभएकाले मन्दी छाएको छ । दरबारमार्गमा सामान सक्कली नै पाइन्छ । त्यसैले महँगो पनि हुन्छ । तर, नक्कली सामग्री सस्तोमा बेच्नेको कारोबार राम्रो भइरहेको छ । यो कुरा उपभोक्ताले बुझ्न जरुरी छ ।’ उनका अनुसार, उनको पसलमा ८ हजारदेखि २५ हजारसम्मका इटालियन ब्रान्डका चस्मा पाइन्छन् ।

निड्स स्टोरका फुर्वा तामाङले पनि उपभोक्ता आकर्षण गर्न छुटको स्किम ल्याएका छन् । ‘हङकङ र चीनबाट आयात गरेर ४० प्रतिशतसम्म छुट दिएका छौँ,’ उनले भने, ‘छुट दिँदा ग्राहकको आकर्षण बढिरहेको छ ।’ निड्स कलेक्सन सेन्टर हो । यसमा लिभाइज, रिबक, ली लगायत सबै ब्रान्डका टिसर्टहरू पाइन्छन् ।
दरबारमार्गमा गत वर्ष दसैंअघि कारोबार निकै खस्किएको थियो । सरकारले अनुगमन गर्दा ‘अचाक्ली ठगी’ गरेको भन्दै केही पसलमा सिलबन्दी नै गरेको थियो । त्यसको असर यस वर्ष पनि देखिएको हो । यो कारणले पनि विगतका वर्षहरूको तुलनामा यस वर्ष छुट र सेलका योजना धेरैजसो पसलमा देखिन्छ ।

जोर्डिक स्टोरका दिनेश शर्माले आफूले ५० प्रतिशतसम्म छुट दिएको सुनाए । उक्त स्टोरमा अमेरिकन ब्रान्डका कपडा पाइन्छन् । स्टकमा रहेको एउटा कपडा किन्दा अर्को सित्तैँमा † ‘हाम्रो पसलको कारोबार राम्रै भइरहेको छ । गत वर्षको अनुगमनको त्यस्तो असर छैन,’ उनले भने, ‘बिगतमा यस्तो असर बढी नै थियो ।’रिबकका मनोज रायले पनि कारोबार निकै कम रहेको बताए । ‘पहिले जस्ता ग्राहक छैनन्,’ उनले भने, ‘ग्राहक तान्न बिग सेल अन्र्तगत ५० प्रतिशतसम्म छुट अफर गरेका छौँ ।’ उक्त स्टोरमा ७ हजार रुपैयाँसम्मका टिसर्ट छन् ।

दरबारमार्गमा रहेको अर्को ग्लोबल ब्रान्ड हो– बिइङ ह्युमन । यसले पनि ५० प्रतिशत छुटको अफर ल्याएको छ । बिइङ ह्युमन छुट्टै ब्रान्ड र सस्तो पनि भएकाले सेल्स राम्रो भएको पसलका कृष्ण लामगादेले बताए । ‘ब्रान्डकै कारण पनि उपभोक्ताको आकर्षण छ,’ उनले भने, ‘मुख्यत: टिर्सटलाई प्राथमिकता दिएका छौँ । त्यो लगत्तै ज्याकेटलाई सार्वजनिक गरेका छौँ ।’