फ्रिकिकको गोलमा सर्बियाको जित
समारा — एलेक्जेन्डर कोलारोभले कप्तानी प्रदर्शन गर्दै उत्कृष्ट फ्रिकिकलाई गोलमा परिणत गरेपछि सर्बियाले विश्वकपअन्तर्गत समूह ‘ई’ को पहिलो खेलमा आइतबार कोस्टारिकालाई १–० ले पराजित गरेको छ ।
कोस्टारिकाले संयमित भएर डिफेन्स गर्दा सर्बियाको लगातार आक्रमण विफल भएको अवस्थामा कोलारोभले ५६ औं मिनेटमा २५ मिटर टाढाबाट फ्रिकिकमा गोल गरेका थिए ।
सर्बियाले कोस्टारिकालाई खेल अवधिभर दबाबमा राखे पनि थप गोल गर्न भने सकेन । ब्राजिलसम्मिलित समूहमा सर्बियाले महत्त्वपूर्ण ३ अंक हासिल गरेसँगै दोस्रो चरणमा पुग्ने सम्भावनामा थप सहयोग पुगेको छ । खेलको सुरुआतमा दुवै टोलीले लगातार आक्रमण बुने पनि खेल अगााडि बढेसँगै आक्रमणका मुभ पातलिएको थियो । बल पोसेसनमा सर्बियाले मिडफिल्डरद्वय नेमान्जा माटिच र सर्गे मिलिङ्कोभिच साभिचलले सर्बियालाई बलियो स्थितिमा राखेका थिए ।
इटालियन क्लब लाजियोबाट खेल्दै आएका साभिचले धेरै आक्रमण सिर्जना गर्न मदत गरेका थिए । उनले पहिलो हाफमा गोल गर्ने मौका पाए पनि त्यसमा सफल हुन सकेनन् । पहिलो हाफको अन्त्यमा उनको उत्कृष्ट ओभरहेड किक कोस्टारिकाका गोलरक्षक केलर नाभासले बचाएका थिए ।
शारीरिक रूपमा बलिया एलेक्जेन्डर मित्रोभिचले कोस्टारिका डिफेन्सका लागि टाउको दुखाइ बने पनि पाएको मौका भने सदुपयोग गर्न असफल रहे । दोस्रो हाफको सुरुआतमै पाएको मौकामा उनले सोचेजस्तो प्रहार गर्न सकेनन् । यद्यपि उक्त गल्तीले खेलमा सर्बियालाई घाटा भएन । कप्तान कोलारोभले बायाँ खुट्टाले प्रहार गरेको फ्रिकिक विपक्षी वाल र गोलरक्षक नाभासलाई बिट गर्दै गोलमा परिणत भयो ।