म्याराडोनाले गरे आलोचना

एएफपी

ब्रानिट्सी — अर्जेन्टिनी लेजेन्ड डिएगो म्याराडोनाले आइतबार विश्वकप २०१८ मा आफ्नो टिमको प्रदर्शनलाई लिएर चर्को आलोचना गरेका छन् ।

आइसल्यान्डविरुद्धको खेल बराबरीमा टुंगिएपछि टिमका व्यवस्थापक जोर्गे साम्पाओलीलाई इंगित गर्दै म्याराडोनाले भनेका छन्, ‘प्रशिक्षकले आफ्नो रणनीति नफेर्ने हो भने उनलाई देशमा स्वागत गरिने छैन ।’

‘टिमले यसरी नै खेलिरहेको हो भने यी प्रशिक्षक आफ्नो देशमा फर्कन सक्ने छैन,’ सन् १९८६ को विश्वकप विजेता खेलाडीले भेनेजुएलाको टेलिभिजनलाई अन्तर्वार्ता दिँदै भने । समूह ‘डी’ को मस्कोमा भएको त्यो खेल १–१ को बराबरीमा टुंगिएको थियो । त्यसमा लियोनल मेसी पेनाल्टीमा गोल गर्नबाट चुकेका थिए ।

Yamaha

‘यो निकै खराब नतिजा रह्यो । अर्जेन्टिनाले आइसल्यान्डका सबै खेलाडी १.९० मिटर अग्ला छन् भनेर पनि त्यसअनुसार रणनीति तयार गर्न सकेनन् । मेरो विचारमा टिममा एकखाले रिस छ,’ म्याराडोनाले भने । उनी अर्जेन्टिनी टिमका पूर्वप्रशिक्षकसमेत हुन् । अर्जेन्टिनाले त्यस खेलमा सर्जियो अगुइरोको गोलले १९ औं मिनेटमा अग्रता लिएको थियो ।

त्यतिबेला स्पार्टाक स्टेडियममा म्याराडोना सिगार खाँदै फुटबल हेरिरहेका थिए । तर पहिलोपल्ट विश्वकप खेलिरहेको आइसल्यान्डले अर्जेन्टिनाले अग्रता लिएको चार मिनेट बित्न नपाउँदै बराबरी गोल फर्काउन सफल रह्यो । आइसल्यान्डका लागि अल्फ्रेड फिन्बोगासनले गोल गरे । मेसीको सफल खेलजीवनमा विश्वकप सफलता भने लेखिन बाँकी छ ।

मेसी ६३ औं मिनेटमा प्राप्त पेनाल्टीलाई गोलमा परिणत गर्न असफल रहेका थिए । उनको प्रहारलाई आइसल्यान्डका गोलरक्षक हान्स पोर हाल्डरसनले जोगाएका थिए । म्याराडोनाले यसक्रममा मेसीको आलोचना गर्नुको साटो प्रशिक्षक साम्पाओलीमाथि नै प्रश्न खडा गरेका छन् । ‘म खेलाडीलाई दोष दिन चाहन्न,’ म्याराडोनाले भने, ‘मेसीलाई पनि दोष दिनुहुन्न । उनले त सक्दो खेले ।’

उनले थपे, ‘मैले स्पेनमा पाँच पेनाल्टी गुमाएँ, तर पनि म डिएगो म्याराडोना नै रहें । मेसीले पेनाल्टीमा गोल गर्न नसक्नुकै कारण अर्जेन्टिनाले दुई अंक गुमाएको होइन ।’ सन् २०१० को विश्वकपमा अर्जेन्टिनाले म्याराडोनाको नेतृत्वमा क्वाटरफाइनलसम्मको यात्रा तय गरेको थियो । यसपल्टको विश्वकपमा अर्जेन्टिनाले अब सेन्ट पिटर्सबर्गमा क्रोएसियाको सामना गर्नेछ ।

प्रकाशित : असार ५, २०७५ ०८:५३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

ब्राजिलको पनि पीडा उस्तै

ब्राजिलले पछिल्लो विश्वकप २०१४ मा आफैंले आयोजना गर्दा सेमिफाइनलमा जर्मनीसँग ७–१ को हार बेहोरेको थियो ।
रोयटर्स

रोस्तोभ — रुसी विश्वकपको आफ्नो पहिलो खेलमा प्रभाव पार्न नसक्ने ठूलो राष्ट्रको सूचीमा ब्राजिल पनि थपिएको छ । ब्राजिललाई आइतबार स्वीट्जरल्यानडले १–१ को बराबरीमा रोक्यो ।

स्वीट्जरल्यान्डविरुद्धको खेल १–१ को बराबरी खेल्नुपरेपछि निराश ब्राजिली स्टार नेयमर । तस्बिर : रोयटर्स

दाबेदार मानिएको स्पेन, अर्जेन्टिना र जर्मनीले पनि पहिलो खेलमा विजय हात पार्न सकेका थिएनन् । जर्मनी अझ पहिलो खेलमा मेक्सिकोसँग १–० ले पराजित भएको थियो ।

फिलिप कोउटिन्होको दर्शनीय गोलमा ब्राजिलले पहिलो हाफमा अग्रता लिएको थियो । तर ५ मिनेटपछि नै स्टेभन जुबेरले कर्नरबाट आएको बलमा हेडर गोल गरी खेल बराबरीमा ल्याए । जसले अन्तत: स्वीस टोलीलाई महत्त्वपूर्ण अंक दिलायो । टिटेको प्रशिक्षणमा रहेको ब्राजिलले विश्वकपमा आउनेक्रममा उत्कृष्ट प्रदर्शन गरेको थियो, तर त्योअनुरुपको प्रदर्शन टोलीले स्वीट्जरल्यान्डसँगको खेलमा देखाउन सकेन ।

निकै संगठित देखिएको स्वीस रक्षापंक्तिले ब्राजिललाई दोस्रो हाफमा थोरैमात्र अवसर दिएको थियो । ५० औं मिनेटमा जेर्दान साकिरीको कर्नरमा जुबेरले कासेमिरो र मिरान्डाको हेल्चेक्र्याइँपूर्ण बचाउमा हेड गोल गरेपछि ब्राजिलले उल्टो गोलका लागि दबाबमा खेल्नुपर्‍यो । यद्यपि दोस्रो हाफमा कोउटिन्हो, पाउलिन्हो र रोबर्टो फिर्मिन्होले अवसर नपाएका होइनन् ।

‘हाम्रा धेरै प्रहार लक्ष्य बाहिर रह्यो, हामी केही केन्द्रित भएको भए विपक्षी टोलीका गोलरक्षकलाई अझ मिहिनेत गर्नुपर्ने बनाउँथ्यौं । मेरो अनुमान विजय पाउनु नै थियो त्यसैले नतिजाबाट म खुसी छैन,’ ब्राजिली प्रशिक्षक टेटेले भने, ‘जुन स्थानबाट स्वीट्जरल्यान्डले गोल गर्‍यो, त्यो ठाउँबाट गर्नुपर्ने केही थिएन । तर त्यो फाउल थियो ।’

ब्राजिलविरुद्ध गोल गरेका स्वीस खेलाडी स्टेभन जुबेर  । तस्बिर : रोयटर्स

विश्वका सबैभन्दा महँगा फुटबलर नेयमरको खेल अझ निराशाजनक थियो । तर ब्राजिलकै दोस्रा महँगा खेलाडी कोउटिन्होले त्यसको तुलनामा धेरै प्रभावकारी खेल देखाएका थिए । ‘स्पागेटी’ जस्तै कपालका कारण नेयमर धेरैको नजरमा परे पनि उनी बलमा केही ड्रिब्लिङ गरेपछि हराएजस्ता देखिन्थे । राइट विंगर विलियन र स्ट्राइकर ग्राबियल जेससले खासै मौका नै पाएनन् ।

ब्राजिलले पछिल्लो विश्वकप २०१४ मा आफैंले आयोजना गर्दा सेमिफाइनलमा जर्मनीसँग ७–१ को हार बेहोरेको थियो । जर्मनीसँग खेलेको टोलीका मार्सेलो मात्र मैदान उत्रिएका थिए । विश्वकप आउनुअघि ब्राजिलले खेलेका पछिल्ला २१ खेलमा एकमात्र हार बहोरेको थियो ।

प्रकाशित : असार ५, २०७५ ०८:५२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT