एमबाप्पे र ग्रिजमनको लय

राजु घिसिङ

मस्को — उपाधि होडमा बलियो मानिएको फ्रान्सले मारियो मान्जुकिचको आत्मघाती गोलसँगै फाइनलमा सुरुआती १९ औं मिनेटमै अग्रता लिएको थियो । क्रोएसियाका मार्सेलो ब्रोजोभिचले एन्टोइन ग्रिजमनलाई फाउल गरेपछि फ्रान्सले फ्रिकिक पाएको हो ।

फ्रान्सेली स्टारत्रय एन्टोइन ग्रिजमन, पाउल पोग्बा र केलियन एमबाप्पे । क्रोएसियाविरुद्ध ४–२ ले जितेको फाइनलमा तीनै खेलाडीले गोल गरेका थिए । तस्बिर : रोयटर्स

त्यसमा ग्रिजमनले प्रहार गरेको बल क्लियर गर्ने प्रयासमा मान्जुकिचले गरेको हेडरमा बल आफ्नै पोस्टमा छिरेको थियो । विश्वकप फाइनलमा आत्मघाती गोल गर्ने उनी पहिलो खेलाडी हुन् ।

स्टार खेलाडीको साथ पाएको फ्रान्सले सुरुआती अग्रता लियो तर स्तरअनुसारको खेल भने पस्कन सकेन । त्यसैले उसको अग्रता धेरै टिकेन । इभान पेरिसिचले २८ औं मिनेटमा उत्कृष्ट गोल गर्दै क्रोएसियालाई बराबरीमा पुर्‍याए । उनले डोमागोज भिदाको पासमा दायाँ खुट्टाले तानेको बललाई बायाँ खुट्टाले लोभलाग्दो गोलमा परिणत गर्दै क्रोएसियालाई खेलमा फर्काएका थिए ।

Yamaha

पूर्वी युरोपको सानो देशले आक्रामक खेलिरहेको बेला भिडियो असिस्टेन्ट रेफ्री (भार) को सहयोगमा फ्रान्सले फेरि अग्रता लियो । ग्रिजमनले प्रहार गरेको कर्नर किकमा पेरिसिचले हातले बल छोएपछि फ्रान्सेली खेलाडीले अर्जेन्टिनी रेफ्री नेस्टर पिटानालाई भिडियोको सहारा लिन चर्को दबाब दिएका थिए ।

अन्तत: भिडियो हेर्न पुगेपछि पिटानाले पेनाल्टी दिए । ग्रिजमनले क्रोएसियाली गोलकिपर डानियल सुबासिचले डाइभ गरेको अर्कोतर्फ बललाई सहजै पोस्टको दिशा दिएर फ्रान्सलाई २–१ ले अघि बढाए । यो उनको विश्वकपमा चौथो गोल हो ।

फेरि पछाडि परेको दुई मिनेट नबित्दै क्रोएसियाले बराबरी गर्ने अवसर पाएको थियो तर पेनाल्टी क्षेत्रमा प्राप्त मौकामा एन्टे रेबिचले बल प्रहार गर्न सकेनन् र बल डिफेन्सले क्लियर गरिदिए । पहिलो हाफमा क्रोएसिया हाबी रह्यो । मिडफिल्डमा रियल म्याड्रिडका लुका मोड्रिच फेरि प्रभावशाली देखिए । एक समय लात्को डालिचको टिम बल पोसेसनमा पनि ६१–३९ ले अगािड रह्यो तर उसले गोल भने गर्न सकेन ।

दोस्रो हाफमा पनि क्रोएसियाले आक्रामक सुरुआत गर्‍यो । एन्टे रेबिचले पहिलो बार च्याप्दै ४८ औं मिनेटमा प्रहार गरेको बलमा फ्रान्सेली कप्तान ह्युगो लोरिसले पञ्च गर्दै लोभलाग्दो बचाउ गरे । यो विश्वकपमा सनसनीपूर्ण प्रदर्शन गरिरहेका १९ वर्षीय फ्रान्सेली फरवार्ड केलियन एमबाप्पेले ५२ औं मिनेटमा प्रहार गरेको बलमा गोलकिपर सुबासिचले आकर्षक बचाउ गर्दै क्रोएसियाको खेलमा फर्कने आशा जीवितै राखेका थिए ।

नकआउट चरणका हरेक खेलमा सुधार गरिरहेका मिडफिल्डर पाउल पोग्बालाई ५९ औं मिनेटमा क्रोएसियाले रोक्न सकेन । ग्रिजमनको पासमा पोग्बाले प्रहारलाई डिफेन्सले रोके । त्यसैमा प्राप्त रिबाउन्डमा पेनाल्टी क्षेत्र नजिकबाट पोग्बाले गोलमा परिणत गर्दै फ्रान्सलाई ३–१ को अग्रता दिलाए ।

नयाँ पेलेको रूपमा उदाएका एमबाप्पे फेरि एकपल्ट चम्किए । रुसमा चौथो गोल गर्ने क्रममा उनले लुकास हर्नान्डेजको आकर्षक पासमा पेनाल्टी क्षेत्रबाहिरबाटै ६५ औं मिनेटमा गोल गर्दै फ्रान्सको जित निश्चित गरे ।

दोस्रोपल्ट दुई गोलले पछाडि परेर पनि क्रोएसियाले संघर्ष जारी राख्यो । फ्रान्सेली कप्तान लोरिसको गल्तीमा मौका पनि पायो । उनले आफ्नै पेनाल्टी क्षेत्रमा छक्याउन खोज्दा पाएको मौकामा मान्जुकिचले यो विश्वकपमा व्यक्तिगत तेस्रो गोल गर्दै ६९ औं मिनेटमा अन्तर घटाएका थिए । इभान राकिटिचले ७८ औं मिनेटमा प्रहार गरेको बल भने फ्रान्सेली खेलाडीमा डिफ्लेक्ट हुँदै पोस्ट नजिकबाट बाहिरिएको थियो ।


विश्वकपको गोल्डेनबल विजेता क्रोएसियाका लुका मोड्रिच र उत्कृष्ट युवा खेलाडी फ्रान्सका केलियन एमबाप्पे। यस विश्वकपको गोल्डेनबुट इंग्ल्यान्डका ह्यारी केन र गोल्डेन ग्लोभ्स बेल्जियमका थियाबाउट कोर्टियसले पाएका थिए। तस्बिर : रोयटर्स

विश्वकप फाइनलका नतिजा

Esewa Pasal

प्रकाशित : असार ३२, २०७५ ०७:४१
प्रतिक्रिया
पठाउनुहोस्
ADVERTISEMENT

ध्यान कतारतिर

रोयटर्स

मस्को — जर्मनीले भव्य आयोजना गर्‍यो, दक्षिण अफ्रिका अपेक्षाभन्दा माथि उठ्यो र रुसले नकारात्मक भ्रम तोड्यो । विश्वकप आयोजना गर्ने राष्ट्रले लगातार राम्रो प्रतिक्रिया हात पर्ने क्रममा अब सबैको नजर कतारतिर हुनेछ । चार वर्षपछि एसियाली राष्ट्र कतारमा हुने विश्वकप कस्तो होला भन्ने कौतुहल सुरु भइसकेको छ । यो पक्का छ कि उक्त प्रतियोगिता पृथक हुनेछ

मस्कोस्थित क्रेमलिनमा विश्वकप आयोजना हस्तान्तरण कार्यक्रममा कतारका अमिर शेख तमिम बिन हमाद, फिफा अध्यक्ष जियानी इन्फान्टिनो र रुसी राष्ट्रपति भ्लादिमिर पुटिन । तस्बिर : रोयटर्स

गल्फको सानो राज्य कतार एकछेउबाट अर्कोछेउसम्म जम्मा १ सय ८० किलोमिटर फैलिएको छ । सरदर २५ लाख जनसंख्या भएको देशमा फुटबलको माहोल पनि व्यापक छैन । अहिलेसम्म विश्वकपमा सहभागिता नजनाएको यस राष्ट्रले जुन–जुलाईमा अत्यधिक गर्मी हुने भएकाले प्रतियोगिता वर्षको अन्त्यतिर सारेको छ ।

तेल खानीले भरिपूर्ण कतारसँग अथाह सम्पत्ति छ । त्यसकै आडमा रहेर फिफाले कतारलाई आयोजनाको जिम्मेवारी सुम्पिएको हो । यद्यपि यस प्रक्रियमा भ्रष्टाचार भएको आरोप पनि लाग्दै आएको छ । विश्वकप आयोजना गर्ने पहिलो अरब राष्ट्र बन्ने कतार ८ नयाँ रंगशाला निर्माणको प्रक्रियामा छ ।

हालसम्म एक रंगशाला बनिसकेको छ भने वर्षको अन्त्यसम्म अन्य दुई तयार हुँदैछन् । बाँकी पाँच रंगशाला भने २०२१ को अन्त्यसम्म तयार भइसक्ने अपेक्षा गरिएको छ । केन्द्रबाट ३५ किलोमिटर आसपास रहने यी सबै रंगशाला नयाँ मेट्रो सेवाले जोडिने छ ।

द्रुत गतिमा भइरहेको निर्माण कार्यमा कामदारहरूको अवैधानिक प्रयोग भइरहेको आरोप पनि कतारले खेप्दै आएको छ । मानव अधिकारवादी संस्थाहरूले पटक–पटक कामदारसम्बन्धी मुद्दा चलाउँदै आएका छन् । ‘हामी आफूले तयार पारेको पथमा अगाडि बढ्न तयार छौं,’ कतार २०२२ को आयोजक समितिका महासचिव हसन अल थवावीले मस्कोमा भने ।

रुसको राजधानीमा सयौंको संख्यामा कतारी अधिकारी उपस्थित थिए । फिफाले कतारमा हुने प्रतियोगिता नोभेम्बर २१ देखि डिसेम्बर १८ सम्म चल्ने पक्का गरिसकेको छ । सहभागी राष्ट्रसंख्या ३२ हुने वा ४८ मा बढ्ने पक्ष भने टुंगो लागेको छैन ।


‘यो निर्णय कतार र फिफाको सामूहिक निर्णय हुनेछ । अहिले हामी ४८ राष्ट सहभागी हुन सम्भव छ वा छैन भन्ने अध्ययन गरिरहेका छौं । ३२ राष्ट्रको सहभागिताका लागि भने हामी तयार छौं,’ अल थवावीले भने । प्रतियोगिता समय परिवर्तन हुनाले विश्वभरका ठूला लिगहरूलाई असर पर्ने भएको छ । यसले फिफा र शक्तिशाली युरोपेली क्लबबीच शक्तिसंघर्ष हुने भए पनि कतारले यसलाई सकारात्मक रुपमा लिन आग्रह गरेको छ ।

‘यो समयमा खेलाडीहरू सिजनको मध्य भागमा हुन्छन् । यसको मतलब उनीहरू उच्च फर्ममा खेलिरहेको अवस्थामा हुनेछन्,’ थवावीले थपे । कतारले विश्वकपका लागि मादक पदार्थलाई लिएर छुट्टै कानुन पनि ल्याउने तयारी गरेको छ । यसका लागि समर्थक जमघट हुने छुट्टै स्थान बनाउने र रमाइलो माहोल सिर्जना गर्ने आयोजकको लक्ष्य छ । ‘हामीले विश्वकप आयोजना गर्ने सुवर्ण अवसर पाएका छौं । यसले विश्व मानचित्रमा आफ्नो परिचय बनाउने मौका दिएको छ । हामीले यसको भरपूर उपयोग गर्नेछौं,’ महासचिव थवावीले टुंग्याए ।

प्रकाशित : असार ३२, २०७५ ०७:३९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT