काठमाडौँ — नेपाली सेनाको त्रिभुवन आर्मी क्लबले बिर्तामोडमा यसपालि लोभलाग्दो खेल पस्किएन । उसलाई सनसनीपूर्ण पहिलो खेलमा अर्को विभागीय टिम पुलिसले कडा टक्कर दिएको थियो ।
अर्को खेलमा मनाङमस्र्याङ्दीको वर्चस्व थियो । र, अन्त्यमा घरेलु मैदानमा झापा ११ जोसिलो देखिएको थियो । तर, तीनै खेलको नतिजा आफ्नो बनाउँदै आर्मी तेस्रो झापा गोल्डकप च्याम्पियन नै बन्यो ।
आर्मीले उपाधि यात्रामा जम्मा दुई गोलमात्र गर्यो र फाइनलमा झापालाई पराजित गर्न अतिरिक्त समय, टाइब्रेकर हुँदै सडनडेथसम्मै पुग्नुपरेको थियो । यसमा आर्मीलाई भाग्यले पनि साथ दियो । हुन त फुटबलमा दर्शक लोभ्याउने सुन्दर खेल प्रदर्शन गरेरमात्र हुँदैन, पेनाल्टी सुटआउटमा नै किन नहोस्, जित्नका लागि गोल नै गर्नुपर्छ । करिब १२ हजार दर्शकसामु झापालाई स्तब्ध पारेपछि आर्मीका खेलाडीले खुसियाली मनाउँदै नारा लगाएका थिए, ‘आर्मीलाई जित्ने कोही छैन, कोही छैन ।’
अवस्था आर्मीको नाराजस्तै छ पनि । घरेलु फुटबलमा २०७४ सालमा भएका ठूला प्रतियोगितामा आर्मीकै वर्चस्व रहेको छ । उसले झापा गोल्डकपको उपाधि दोस्रोपल्ट जितेको हो । उसले पहिलो संस्करणको फाइनलमा पनि झापालाई नै हराएको थियो । र, यसपालिको झापा गोल्डकप आर्मीको यो सालको सातौं उपाधि हो । यसले उसलाई घरेलु फुटबलमा सबभन्दा शक्तिशाली टिम साबित गरेको छ ।
वैशाखमा वीरगन्जमा भएको विशाल स्मृति गोल्डकपको फाइनलमा संकटालाई हराएर आर्मीले यसपालि उपाधि यात्रा सुरु गरेको थियो । उसले त्यसयता सताक्षी, काँकडभिट्टा, खप्तड, सिमरा, हेटौंडा र झापा गोल्डकपको ट्रफी कब्जा गर्यो । उसको आहा–रारा गोल्डकप च्याम्पियन बन्ने सपना भने यसपालि पनि अधुरै रह्यो । उसलाई पहिलो चरणमै धरान फुटबल क्लबले स्तब्ध पारेको थियो । आर्मीलाई दुहबी गोल्डकपको फाइनलमा मनाङले सिकार बनाएको थियो । उसले इटहरी गोल्डकपमा सेमिफाइनलको नतिजा थ्रीस्टारलाई सुम्पिएको थियो ।
आर्मी बूढासुब्बा गोल्डकपमा भने सहभागी भएको थिएन । आर्मीले राखेप च्याम्पियनसिपमा रजत पदक जितेको थियो भने फाल्गुनन्द गोल्डकप, १३ औं विकास रनिङ शिल्ड र २० औं तिलोत्तमा गोल्डकपमा प्रतिस्पर्धा गर्दै पहिलो चरणबाटै बिदाइ लिएको थियो । तर ती प्रतियोगितामा दोस्रो रोजाइको टिम खेलाएको त्रिभुवन आर्मी क्लबले जनाएको छ । त्यसलाई मान्ने हो भने आर्मीले २०७४ सालमा १० प्रतियोगिता खेल्यो र त्यसमा ७० प्रतिशत सफलता हात पार्दै सात उपाधि पनि जित्यो ।
आर्मी अहिले जुन रफ्तारमा सफल भइरहेको छ, यस्तो सफल टिम घरेलु फुटबलमा विरलै पाइन्छन् । मोफसलका नकआउट फुटबलमा यस्तो सफलता एक समय मनाङमस्र्याङ्दी र पुलिसले हात पारेका थिए । यसपालि मनाङले दुहबी गोल्डकप र जेसिज कप, थ्रीस्टारले इटहरी र बूढासुब्बा गोल्डकप, एपीएफले १३ औं विकास रनिङ शिल्ड, पुलिसले १६ औं आहा–रारा गोल्डकप र राखेप च्याम्पियनसिप, संकटाले राइनो संरक्षण गोल्डकपको उपाधि जितेका थिए ।
यो सिजन अब बाँकी रहेका मुख्य प्रतियोगिता विराट गोल्डकप, राजर्षि जनक र माई भ्याली गोल्डकप हुन् । यी प्रतियोगिताले एउटै टिमले जित्यो भने पनि त्यसले उसलाई सफलताको दाँजोमा आर्मीभन्दा माथि पार्ने छैन । तर त्यसमा आर्मीले गर्ने प्रदर्शन र हात पार्ने नतिजाले भने उसको हैसियतको परीक्षण गर्ने नै छ ।
आर्मीले पाँच दिनभित्र तीन खेल खेलेर जितेको उपाधि हो झापा गोल्डकप । यसले उसको ‘स्टामिना’ पनि देखाउँछ । तर सधैं यसरी खेल्ने क्षमता हुँदैन । तीव्र गतिमा दौडिएर खेल्न सक्ने क्षमता आर्मीको परम्परागत हतियार हो । यसमा पछिल्लो समय प्राविधिक खेल पनि थपिएको छ । त्यसैले पनि आर्मीको टिम बलियो भएको हो । वैशाख २०७३ यता टिम सम्हालिरहेका प्रशिक्षक नवीन न्यौपाने भन्छन्, ‘बाह्रै महिनाको प्रशिक्षण, आफ्नै मैदान र सन्तुलित टिम आर्मीका बलियो पक्ष हुन् । खेलाडी अनुशासित छन् र रणनीतिअनुसार खेल्छन् । प्रशिक्षक, व्यवस्थापक र खेलाडीको समन्वय एकदमै राम्रो छ । त्यसैले सफल भइरहेका छौं ।’
मनाङका पूर्वमिडफिल्डर नवीनको प्रशिक्षक करिअरको पहिले सिजन आर्मीले २०७३ सालमा १० प्रतियोगिताको फाइनल खेलेर तीन उपाधि जितेको थियो । उनीअघि मेघराज केसीको कार्यकालमा पनि आर्मी बलियो भइसकेको थियो । ट्रफीको ओइरो भने २०७४ सालमा आएर लाग्यो । नवीन बिरामी भएकाले झापा गोल्डकपमा चुनबहादुर थापाले प्रशिक्षकको भूमिका निर्वाह गरेका थिए । आर्मीमा २०५५ सालमा भर्ती भएका यी फुटबलरले भने, ‘नतिजाको हिसाबले अहिलेको टिम आर्मीको इतिहासकै सबभन्दा राम्रो हो ।’
आर्मीले फरवार्ड भरत खवासलाई फुटबल टिम बलियो बनाउनकै लागि भर्ती गरेको थियो । आन्तरिक प्रतियोगिताबाट आएका नवयुग श्रेष्ठ नेपाली टिमले बंगबन्धु गोल्डकप, १२ औं दक्षिण एसियाली खेलकुद र सोलिडारिटी कपको उपाधि जित्दाका हिरो हुन् । गोलकिपर विकेश कुथु राष्ट्रिय टिमका नियमित खेलाडी हुन् । पछिल्लो राष्ट्रिय टिममा भरत, नवयुग, विकेशसँगै नयाँ फरवार्ड जर्जप्रिन्स कार्की र डिफेन्डर जितेन्द्र कार्की पनि थिए । अहिले एसियन कप २०१९ छनोटमा यमनविरुद्ध दोहामा हुने खेलको प्रारम्भिक टिममा आर्मीका दीपक गुरुङ, टंक बस्नेत र सुमन अर्याललाई पनि बोलाइएको छ ।
मिडफिल्डमा सन्तोष तामाङ छरिता छन् । साफ यू १९ च्याम्पियन नेपाली टिमका विंगर/फरवार्ड दिनेश हेम्जन, डिफेन्डर विकास खवास, मिडफिल्डरद्वय एरिक विष्ट र सेसेहाङ आङदेम्बेको आगमनले पनि आर्मी टिम बलियो भएको छ । प्रतियोगितामा सहभागी हुँदा आउने दैनिक भत्ता र पुरस्कारको ठूलो हिस्सा खेलाडीलाई दिइने भएकाले पनि आर्मी टिमको मनोबल उच्च भएको बताइन्छ ।
त्रिभुवन आर्मी क्लबको व्यवस्थापन सम्हालिरहेका महासेनानी प्रकाशराज थापा भन्छन्, ‘क्लबमा करिब ५० जना फुटबल खेलाडी छन् । टिम–वर्क नै हाम्रो सबभन्दा बलियो पक्ष हो ।’ प्रधानसेनापति ट्रफीलगायत आन्तरिक प्रतियोगिताबाट आएकालाई क्लबमा प्राथमिकता दिएको पनि उनले बताए । ‘नभई नहुने पोजिसनमा मात्र बाहिरबाट ल्याउँछौं,’ उनले भने, ‘हाम्रो मुख्य लक्ष्य लिगको उपाधि जित्ने हो । स्वदेशी खेलाडीकै बलमा लिग जित्न चाहन्छौं ।’
युद्धको मोर्चामा जस्तै मैदानमा पनि आर्मी जोसिलो हुने गर्छ । तर त्यो जोस फुटबल मैदानमा अलि बढी नै देखिन्छ । कप्तान भरत खवास र स्टार फरवार्ड नवयुग श्रेष्ठले झापा गोल्डकपको फाइनलमा गरेको व्यवहार पटक्कै सुहाउँदो थिएन । नवयुगले दर्शकलाई दुव्र्यवहार गरेका थिए भने भरत रेफ्रीप्रति आक्रामक देखिएका थिए । झापाका खेलाडीले त रेफ्रीलाई पिट्नेसम्मको धम्की दिएका थिए । यस्ता व्यवहारले खेलाडी आफैंलाई मात्र होइन, टिम र समग्र फुटबललाई नै बिगार्ने गर्छ । त्यसैले आर्मीका खेलाडीले मैदानमा जोसलाई अनुशासित तवरले व्यवस्थापन गर्नु जरुरी देखिएको छ ।
२०७४ सालमा आर्मी
प्रतियोगिता | स्कोर | प्रतिद्वन्द्वी | उपलब्धि |
विशाल मेमोरियल गोल्डकप, वीरगन्ज | २–० | संकटा | च्याम्पियन |
सताक्षी गोल्डकप, झापा | २–१ | मनाङमर्स्याङ्दी | च्याम्पियन |
तेस्रो काँकडभिट्टा गोल्डकप, झापा | ०–० (टाइब्रेकर ३–२) | मनाङमर्स्याङ्दी | च्याम्पियन |
दोस्रो दुहबी गोल्डकप, सुनसरी | १–२ | मनाङमर्स्याङ्दी | उपविजेता |
दोस्रो खप्तड गोल्डकप, धनगढी | ०–० (टाइब्रेकर ५–४) | एपीएफ | च्याम्पियन |
इटहरी गोल्डकप, सुनसरी | १–१ (टाइब्रेकर ३–५) | थ्रीस्टार | सेमिफाइनल |
१६ औं आहा–रारा गोल्डकप, पोखरा | १–१ (टाइब्रेकर ४–५) | धरान | पहिलो चरण |
नवौं सिमरा गोल्डकप, बारा | २–० | थ्रीस्टार | च्याम्पियन |
तेस्रो हेटौंडा गोल्डकप, मकवानपुर | ०–० (टाइब्रेकर ४–३) | पुलिस | च्याम्पियन |
तेस्रो झापा गोल्डकप, बिर्तामोड | १–१ (सडनडेथ ८–७) | झापा | ११ च्याम्पियन |
‘बी’ टिम | |||
राखेप च्याम्पियनसिप, दाङ | ०–० (टाइब्रेकर ४–५) | पुलिस | रजत पदक |
नवौं फाल्गुनन्द गोल्डकप, पाँचथर | १–१ (टाइब्रेकर २–४) | मोरङ | पहिलो चरण |
१३ औं विकास रनिङ शिल्ड, चितवन | १–१ (टाइब्रेकर १–३) | फ्रेन्ड्स | पहिलो चरण |
२० औं तिलोत्तमा गोल्डकप, बुटवल | ०–३ | मनाङमर्स्याङ्दी | पहिलो चरण |
twitter: @rghising