अब्बल एड

सजना बराल

काठमाडौँ — बेलायत, स्वीडेन, फ्रान्स, नेदरल्यान्ड्स लगायत विभिन्न मुलुकका विभिन्न सहरमा एड सिरनको कन्सर्ट हुँदै छ । त्यहाँ भएकाहरूले एडलाई प्रत्यक्ष सुन्न चाहे पनि अब त्यो सम्भव छैन । किनभने यी कन्सर्टका टिकट ‘सोल्ड आउट’ भइसकेको छ ।

अबको ६ महिनासम्म एड पूरा व्यस्त छन् । तीन महिनापछिको कन्सर्टका लागि पनि टिकट पाउन मुस्किल छ । उनको कार्यक्रम भन्नासाथ टिकट तुरुन्तै बिक्री भइहाल्छ । यसबाट एडको लोकप्रियता छर्लंग हुन्छ । लोकप्रियताको मापनमा प्रदान गरिने ‘बिलबोर्ड म्युजिक अवार्ड’ मा एडले आइतबार सर्वाधिक विधामा ट्रफी जित्नु अनौठो भएन ।


अमेरिकाको लास भेगसमा आयोजित अवार्ड वितरण समारोहमा एडले ६ वटा विधामा सफलता हात पारे । तर, उनी कार्यक्रममा उपस्थित थिएनन् । उनको रेकर्डेड प्रस्तुतिले भने बिलबोर्डको माहोल तरंगित बनाइदियो । सन् २०१७ को ‘गलवे गर्ल...’ गीतमा आइरिस फोक ब्यान्ड ‘बिओगा’ ले यसरी साथ दियो कि एडको प्रस्तुति सर्वाधिक उत्कृष्टमध्ये एक बन्न पुग्यो ।

Yamaha


बेलायती गायकले सन् २०१७ को ‘डिभाइड’ () एल्बम र यसमा समाविष्ट ‘सेप अफ यु...’ गीतका लागि टप आर्टिस्ट, टप मेल आर्टिस्ट, टप रेडियो सङ, टप हन्ड्रेड आर्टिस्ट, टप सङ सेल्स आर्टिस्टजस्ता ठूला विधामा अवार्ड जिते । र्‍यापर केन्ड्रिक लमार र गायक ब्रुनो मार्ससहित उनी सर्वाधिक १५ विधामा मनोनयनमा परेका थिए । र्‍याप र आर एन्ड बीतिर क्रमश: केन्ड्रिक र ब्रुनोको एकाधिर रह्यो भने महिलामा टेलर स्विफ्ट टप आर्टिस्ट घोषित भइन् ।


सन् २०१५ को बिलबोर्ड अवार्डमा एड पाँच वटा विधामा मनोनयनमा परेका थिए । त्यो बेला उनको दोस्रो एल्बम ‘मल्टिप्लाई’ () का ‘सिङ...’, ‘थिंकिङ आउट लाउड...’, ‘फोटोग्राफ...’ जस्ता गीत चर्चित थिए । यद्यपि, अवार्डमा उनले एउटा पनि ट्रफी पाएनन् । यसको तीन वर्षपछि अर्थात् यसपटक उनी यति जोसिलो पाराले आए कि बिलबोर्डका सबै मुख्य अवार्ड कब्जा गरिदिए । यसलाई एडको ठूलो फड्को मानिएको छ ।


गीत–संगीतको विवरण (चार्ट) तयार पार्ने बिलबोर्डमा एडले हालै एउटा कीर्तिमान कायम गरेका थिए । टप टेन हिट्समा उनका ‘पर्फेक्ट...’ र ‘सेप अफ यु...’ सबैभन्दा लामो समय टिकिरहन सफल गीत बने । यी गीत क्रमश: २६ र ३३ हप्तासम्म काउन्ट डाउनबाट हटेनन्, जुन पहिलोपटक भएको बिलबोर्डको भनाइ छ । आधा वर्षभन्दा बढी समयसम्म ‘सेप अफ यु...’ हिट गीतका रूपमा तालिकामा रहिरह्यो ।


पछिल्लो समय युट्युबतिर पनि एड छाइरहेका छन् । गत वर्ष सार्वजनिक गरेको ‘सेप अफ यु...’ को म्युजिक भिडियोले छोटो समयमा अर्बौं भ्युज हासिल गरेको थियो । अहिले त एडले युट्युबबाटै ९४ हजारदेखि १५ लाख अमेरिकी डलर मासिक आम्दानी गर्छन् । यही साता प्रकाशित बेलायतका सर्वाधिक धनी संगीतकर्मीको सूचीमा उनको नाम दोस्रो स्थानमा आयो । सन्डे टाइम्सको बेलायतको ३० वर्षमुनिका सर्वाधिक धनीको सूचीमा कम उमेर समूहमा गायिका एडलपछि थिए, एड ।


एडले यसपालि बिलबोर्डमा सम्पूर्ण विधामध्येको ठूलो ‘टप आर्टिस्ट’ मा पकड जमाए पनि यसअघि उनलाई प्राय: पप विधामा अब्बल मानिँदै आएको थियो । पपबाटै उनले चार वटा ग्रामी अवार्ड जितिसकेका छन् । अब भने आफू विधा फेर्ने सोचमा रहेको उनले बिलबोर्ड म्यागजिनसँगको हालैको अन्तर्वार्तामा बताएका थिए । ‘सधैं पप संसारमै बस्नु खतरनाक कुरा हुन्छ,’ उनले भनेका छन्, ‘श्रोताहरूको बढ्दो विश्वास पूरा गर्न नसकिएला । अबको एल्बममा म फरक सुनिनेछु ।’
–एजेन्सीको सहयोगमा

sazna07@gmail.com

Esewa Pasal

प्रकाशित : जेष्ठ ११, २०७५ ११:०७
ADVERTISEMENT
प्रतिक्रिया
पठाउनुहोस्
ADVERTISEMENT

सर्वाधिक शक्तिशाली सीईओ

कान्तिपुर संवाददाता

काठमाडौँ — अमेरिकी म्यागजिन फोब्र्सले सार्वजनिक गरेको सन् २०१८ को विश्वका सबैभन्दा शक्तिशाली व्यक्तिहरूका सूचीमा रहेका ७५ जनामध्ये ३५ जना विभिन्न व्यापारिक समूहमा आबद्ध रहेका प्रमुख कार्यकारी अधिकृत (सीईओ) वा प्रमुखहरू छन् ।

यी प्रमुखमध्ये पनि अधिकांश अमेरिकी छन् भने केही एसियाली, एक युरोपेली र एक अफ्रिकी नागरिक छन् । सबैको व्यापारको हिस्सा जोड्दा ५० खर्ब अमेरिकी डलर हुने १० शक्तिशाली प्रमुख कार्यकारीहरू :


१। जेफ बेजोस, एम्याजोन
अहिले विश्वको सबैभन्दा धनी व्यक्तिमा दरिएका एम्याजोनका जेफ बेजोसको नाम प्रमुखहरूको गणनामा अग्रस्थानमा छ । उनको व्यापार १ खर्ब ३३ अर्ब डलर रहेको छ । इन्टरनेटमा लगभग विश्वका सबै कुनामा सामान बेच्ने एम्याजोनले सुपरमार्केटको चेन होल फुडलाई गत अगस्टमा किनेको थियो । यस्तै एम्याजोनले विभिन्न स्थानमा किताब पसल पनि खोल्न थालेको छ । यस कम्पनीको बजार मूल्य ७ खर्ब ८० अर्ब डलर रहेको छ ।

२। ल्यारी पेज, अल्फाबेट
गुगलको माउ कम्पनी अल्फाबेटका सीईओ ल्यारी पेज अर्का शक्तिशाली सीईओ हुन् । विश्वकै ठूलो सर्च इन्जिन गुगलको नेतृत्वकर्ता कम्पनी अल्फाबेट सम्हाल्नुबाहेक उनले आफैं उड्ने ट्याक्सी ‘किट्टी हक’ मा पनि लगानी गरेका छन् । उक्त कम्पनीले केही समयअघि मात्रै न्युजिल्यान्डमा आफ्नो उड्ने ट्याक्सीको परीक्षण गरेको थियो ।

३। मार्क जुकरबर्ग, फेसबुक
फेसबुकका प्रमुख मार्क जुकरबर्ग गत वर्ष विश्वकै शक्तिशाली व्यक्तिको सूचीमा शीर्ष १० मै थिए । यो वर्ष भने क्याम्ब्रिज एनलाइटिका विवादका कारण उनको स्थान खस्किएको छ । गत मार्चमा फेसबुकले अनधिकृत रूपमा आफ्ना प्रयोगकर्ताको महत्त्वपूर्ण विवरण राजनीतिक परामर्श प्रदान गर्ने संस्थालाई दिएको आरोप लागेको थियो । विवादपछि सुरुमा उनको कम्पनीको सेयरको मूल्यमा गिरावट देखिएको थियो । तर उनले अमेरिकी कंग्रेसको संसदीय सुनुवाइका क्रममा दिएको जवाफले लगानीकर्ता खुसी भए र सो दिन मात्रै फेसबुकको सेयर मूल्यमा ४.५ प्रतिशत वृद्धि देखिएको थियो । हार्बर्ड विश्वविद्यालयको पढाइ बीचमै छोडेका जुकरबर्गको कम्पनीको मूल्य ६९ अर्ब डलर बढी छ ।

४। वारेन बफेट, बर्कसायर हाथअवे
वारेन बफेट प्रमुखहरूको सूचीमा पर्न सफल दोस्रो वयोवृद्ध व्यक्ति हुन् । ८७ वर्षीय उनले केही समय अघि मात्रै अमेरिकी खाद्य सामग्री उत्पादन गर्ने कम्पनी क्राफ्ट हेनिजको बोर्डबाट अवकाश लिएका थिए तर बर्कसायर हाथअवे नामक होल्डिङ कम्पनीका प्रमुखका रूपमा भने काम गरिरहेका छन् । १९६३ मा बर्कसायर खरिद गरेका बफेटको उक्त कम्पनीसँग विश्वका थुप्रै चर्चित कम्पनीहरूको ठूलो मात्रामा सेयर रहेको छ । गत मे महिनामा मात्रै एप्पलको ७ करोड ५० लाख कित्ता सेयर किनेर उनले एप्पलमा आफ्नो सेयरलाई लगभग ५ प्रतिशत पुर्‍याएका छन् ।

५। जेमी डिमन, जेपी मोर्गन
न्युयोर्कस्थित वाल स्ट्रिटमा रहेका शक्तिशाली व्यक्तिहरूको गणनामा जेमी डिमन १९ स्थानमा पर्छन् । विश्वको सबैभन्दा ठूलोमध्येको एक बैंक जेपी मोर्गनका सीईओ हुन् डिमन । उक्त बैंकको कुल सम्पत्ति २ खर्ब डलर रहेको छ । हालसालै गरिएको घोषणाअनुसार डिमन अझै ५ वर्ष प्रमुख रहने बताइएको छ ।

६। ज्याक मा, अलिबाबा
शक्तिशाली सीईओको सूचीमा रहेका धेरै कम गैरअमेरिकीमध्ये अलिबाबाका कार्यकारी अध्यक्ष ज्याक मा एक हुन् । उनी विश्वको सबैभन्दा ठूलोमा गनिने ई–कमर्स साइट अलिबाबाका मालिक र कार्यकारी दुवै हुन् । एम्याजोन जस्तै अलिबाबाको पनि व्यापार दिनानुदिन बढ्दै गइरहेको छ । एम्याजोन र अलिबाबाबीच व्यापार विस्तार गर्ने होडबाजी पनि देखिएको छ । उनले फिल्ममा अभिनय पनि गरेका छन् ।

७। डग म्याकमिलन, वालमार्ट
अमेरिकालगायत विश्वका विभिन्न देशमा आफ्नो सेवा विस्तार गरेको खुद्रा सामान बेच्ने सुपरमार्केट वालमार्टका डग म्याकमिलन पनि शक्तिशाली सीईओको सूचीमा परेका छन् । उनको कम्पनीले विश्वभर गरेर २३ लाखलाई प्रत्यक्ष रोजगारी दिएको छ । यसले पनि अब आफ्नो व्यापार विस्तार भौतिक बजारमा नभई भर्चुअल बजारमार्फत गर्ने नीति बनाएको छ ।'

८। टिम कुक, एप्पल
एप्पल टिम कुकको नेतृत्वमा विश्वकै एक महत्त्वपूर्ण कम्पनीका रूपमा चिनिएको छ । यसको बजार मूल्य पनि विस्तारै उकालो लाग्दै १ खर्ब डलर पुग्न लागेको छ । आर्यफोन १० को बिक्री तीव्र रूपमा नभए पनि नोभेम्बर २०१७ ल्याइएको यस फोनलाई आकर्षक र नौलो उत्पादन मानिएको छ । एप्पल म्युजिकको प्रयोगकर्ता पनि ४ करोड पुगिसकेको छ ।

९। एलोन मस्क, स्पेस एक्स
विश्वकै सबैभन्दा शक्तिशाली रकेट निर्माण गरेर चर्चामा आएको स्पेस एक्सका प्रमुख हुन् एलोन मस्क । यस कम्पनीले गत फेब्रुअरीमा मात्रै शक्तिशाली रकेटको सफल प्रक्षेपण गरेको थियो । शक्तिशाली व्यक्तिको सूचीमा २१ औं स्थानमा रहेका उनी टेल्सा नामक शक्तिशाली र आधुनिक विद्युतीय गाडी उत्पादन गर्ने कम्पनीका पनि प्रमुख हुन् ।

१०। मा हुवातेङ, टेसेन्ट
दस शक्तिशाली सीईओको गणनामा अन्तिममा रहेका छन् एसियाका सबैभन्दा धनी व्यक्ति मा हुवातेङ । पोनी मा उपनामबाट चर्चित हुवातेङ इन्टरनेट–व्यापार कम्पनी टेन्सेन्टका प्रमुख हुन् । सामाजिक सञ्जालको बढ्दो प्रयोगका कारण त्यहाँ विस्तार भइरहेको व्यापार र अनलाइन गेम उनको व्यापारको प्रमुख हिस्सा हो ।
–फोब्र्स म्यागजिन

प्रकाशित : जेष्ठ ११, २०७५ ११:०७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT