‘फुटबल मम’

अगस्टमा पर्छ, म्याडोनाको ६०औं जन्म दिन । यी गायिकालाई मन पराउनका लागि यो उनलाई गाढा रूपमा सम्झिने एक अर्को राम्रो बहाना हो । सायद म्याडोना आफैंले पनि आफ्नो जीवनको ६ दशक राम्रै पाराले मनाउने पो हो कि ?

तर होइन, म्याडोनाको यस्तो उस्तो केही कार्यक्रम छैन । अचेल तडकभडकबाट धेरै टाढा छिन्, उनी । उनी अचेल अमेरिकामा पनि छैनन्, न इंग्ल्यान्डमै । अहिले ठ्याक्कै उनी पोर्चुगलमा छिन्, आफूले ‘एडप्ट’ गरेका छोराछोरीसँग । उनी त्यता शान्त जीवन बिताइरहेकी छन् । उनीसँग अहिले तत्काल नयाँ गीतको कुनै कार्यक्रम छैन । न त उनी टुरमै निस्कने मुडमा छिन् । भनिसकेकी छन्– अबको एक वर्षसम्म म यस्तै रहने छु, भीडबाट टाढा ।
प्रश्न उठ्न सक्छ, म्याडोना साँच्चै पोर्चुगलमा के गरिरहेकी छन् त ? उनको एक छोरा हुन्, १२ वर्षीय डेविड बान्दा । मलावीका यी केटोलाई म्याडोनाले केही समय अगाडि अपनाएकी हुन् । यी बान्दाको फुटबलमा ठूलो रुचि रहेछ । बान्दाले एकपल्ट आफ्नी आमालाई भनेछन्, ‘मेरो इच्छा भनेकै फुटबल खेल्नेमा छ, म भविष्यमा फुटबल खेलाडी हुन चाहन्छु ।’ म्याडोनाको मन न हो, पग्लिहाल्यो । उनकै भविष्यका लागि भनेर पोर्चुगल पुगिन् ।

बान्दा अचेल बेन्फिकाको युथ एकेडेमीसँग आबद्ध छन् । त्यसैले पोर्चुगाली मिडियाले म्याडोनाको नामै फेरेर भन्न थालेका छन्, ‘फुटबल मम’ । म्याडोना आफ्ना सन्तानका लागि कति चिन्तित हुने खालको भएकी छन् भने सबैखाले संगीतका कार्यक्रम लगभग स्थगित जस्तै गरेर पोर्चुगलमा गुमनाम समय बिताइरहेकी छन् । यो त उनले रोजेकै जीवन हो । यसैमा खुसी छिन् भने उनका प्रशंसक पनि त्यसैमा खुसी हुन सक्नुपर्‍यो ।

पोर्चुगल आउनु अगाडिसम्म म्याडोना केही समय गलत कारणले समाचारमा छाइन् । बेहोसीकै स्थितिमा कन्सर्ट गर्न थालेकी थिइन् । उनलाई त्यति बेला ‘ड्रिङ्स’ धेरै प्यारो थियो ।
आफ्नो पहिलो सन्तान रोको रिचीसँगको सम्बन्ध खराब भएपछि म्याडोनालाई सम्हाल्न गाह्रो भएको थियो । आफ्ना दोस्रो पति गायक रिचीतर्फका छोरा हुन्, उनी । नाजुक स्थितिको यो सम्बन्धकै कारण म्याडोना मानसिक रूपमा विक्षिप्त स्थितिमा पुगेकी थिइन्, अहिले कम्तीमा त्यस्तो छैन ।

सायद यस्तै यस्तै तनावबाट मुक्त हुन पनि उनी पोर्चुगलमा छिन् । हालै मात्र इटालीको एउटा म्यागाजिनले उनको लामै अन्तर्वार्ता छापेको छ । यसमा उनले परिवारसँग बस्नुको सुखबारे
आफ्नो धारणा राखेकी छन् । समयले यसरी परिवर्तन गर्ने रहेछ, यी ‘म्याटेरियल गर्ल’ लाई । यी त भए, उनका व्यक्तिगत कुरा । यहाँनिर पश्चिमेली संगीतमा म्याडोनाको योगदान पनि त बिर्सिन सकिन्न, उनी ६० वर्ष पुगेकी स्थितिमा । आखिरमा कसैलाई भनिरहनु पर्दैन, उनी पहिलो ठूलो महिला स्टार हुन्, पश्चिमेली संगीतको ।

सन् १९७७ देखि संगीत क्षेत्रमा सक्रिय म्याडोनाका ३० करोडभन्दा बढी एल्बम बिक्री भइसकेका छन् । उनले नै अहिलेका आधुनिक फिमेल पप–आइकनका लागि बाटो तयार पारेकी हुन् । उनी आउन अगाडि यस्तो बाटो बन्द थियो, अथवा खुला थिएन । भए पनि त्यो सजिलो थिएन । उनी नहुँदो हो त बियोन्सी र टेलर स्विफ्टको कल्पना गर्न सकिन्छ र ? सकिन्न । म्याडोना नै ती गायिका हुन्, जसले अहिलेको जस्तो म्युजिक भिडियोका लागि पनि जग बसाइन् ।

अहिले पनि उनको पुराना गीतका म्युजिक भिडियो हेर्नुपर्छ, भन्नै पर्ने हुन्छ, यी अब्बल दर्जाका छन् । यो पछि अरू धेरैका लागि प्रेरणा भयो । यौनलाई लिएर खुलमखुला कुरा गर्न रुचाउनेमा पर्छिन्, म्याराडोना । अमेरिका नै सही, सन् अस्सीतिर केही न केही बन्देज थियो भनिन्छ, महिला र यौनका विषयमा । उनले यस्तो अवरोधलाई पनि पार गरिन् । अनि अचेल चल्न थालेका रियालिटी–शोका सुरुआती स्टारमा पर्छिन्, म्याडोना ।

कुनै समय ‘बोरिङ’ लाग्ने कन्सर्टमा ज्यान फुक्ने काम पनि म्याडोनाले नै गरिन् । उनको कन्सर्ट हेर्नु भनेको उनका गीत सुन्नमा मात्र सीमित थिएन । त्यसमा धेरै थोक थियो, मान्छेहरू फेरि उनकै कारण कन्सर्टमा फर्कन थाले । अझ म्याडोनाले पश्चिमेली संगीतमा महिलाको उपस्थितिको अर्थ नै फेरिन् । अहिले फर्केर हेर्दा उनले जति काम गरिन्, ती प्राय: त्यति बेलाको समयअनुसार ठूलै क्रान्तिकारी थियो । साँच्चै उनको ६ दशकको जीवन यात्रालाई फेरि एकपल्ट हेर्ने, बुझ्ने र अनुभव गर्ने समय जुरेको छ ।
twitter : @himeshratna