ठूलासँगै साना खेलाडी

दर्शक त उनी भए नै, सँगसँगै राष्ट्रिय टिमका खेलाडीसँग फुटबल खेल्ने अवसर पनि पाए । ‘निकै रमाइलो भयो,’ प्रतियोगिताभर सहभागी विनमले भने, ‘हामीले यसपालि खेलका ट्रिक पनि सिक्यौँ ।’ उद्घाटनका दिन राष्ट्रिय खेलाडीहरूसँग करिब १५ मिनेट बाल खेलाडीहरूले फुटबल खेलेका थिए । यसमा विभिन्न विद्यालयका गरी ५० जनाको सहभागिता थियो ।
सनसाइन सेकेन्डरी स्कुलमा कक्षा ४ का विद्यार्थी पीयूष बस्नेत, उनका साथी शिवम मण्डल, रोहन सुन्दास, शिक्षादीपका प्रज्ञान राजभण्डारीलगायत ‘साना खेलाडी’ ले प्रतियोगिताभरि खेलको मज्जा लिए । ‘परीक्षा सकिएको मौकामा हामीले फुटबलको मज्जा लियौँ,’ कक्षा ७ का विद्यार्थी प्रज्ञानले भने, ‘यहाँ सिकेको कुराले हामी आफूहरू खेल्दा सजिलो हुने भयो ।’

सुनसरीको इनरुवास्थित जनक स्मृति स्कुलको कक्षा ७ का विद्यार्थी सक्षम रेग्मीले पनि यसपालिको रात्रिकालीन खेलबाट मनोरञ्जन लिए । विराटनगरस्थित मामाघर आएका उनले यही मौकामा फुटबल खेल हेरेका थिए । राति खेल हेर्दा रमाइलो लागेको उनले सुनाए ।

वार्षिक परीक्षा सिध्याएर फुर्सदमा रहेकी स्वस्तिका विष्टले पनि आफ्ना दिदी र साथीहरूसित रंगशाला पुगेर फुटबलको मज्जा लिइन् । सगरमाथा स्कुलकी कक्षा ९ की विद्यार्थी स्वस्तिकाले नाम चलेका खेलाडीहरू सहभागी भएको खेल आफ्नै ठाउँमा हेर्न पाउँदा निकै रोचक अनुभव भएको सुनाइन् ।

खेल हेर्न विभिन्न दरका टिकट बिक्री गरिएको थियो । ७ वर्षमुनिका खेलाडीका लागि प्रवेश नि:शुल्क थियो । वार्षिक परीक्षा सकिएको समय भएकाले धेरैजसो बालबालिका आफ्ना अभिभावकसँगै खेल हेर्न आएका थिए । राति खेल आयोजना गरिएकाले अभिभावकलाई पनि सहज भएको थियो । चैत १७ गतेदेखि सुरु भएको विराट गोल्डकप प्रतियोगिताभरि नौ वटा खेल भएका थिए ।

चर्चित नेपाली खेलाडीहरू विमल घर्ती मगर, नवयुग श्रेष्ठ, भरत खवास, अनन्त तामाङ, किरण चेम्जोङ, निराजन खड्का, बिकेश कुथू, एलेन न्यौपाने, सुनील वल, प्रकाश बुढाथोकी, जर्ज फिन्स कार्की, टंक बस्नेतका साथै केही टिममा विदेशी खेलाडीको समेत कौशल हेर्न पाएर बालबालिका दंग परेका थिए ।

फुटबल प्रशिक्षक तथा अखिल नेपाल फुटबल संघ (एन्फा) का पूर्व केन्द्रीय उपाध्यक्ष सन्तोष बानियाँ बालबालिकामा फुटबलप्रति रुचि हुनु राम्रो भएको बताउँछन् । राष्ट्रियस्तरका खेलाडी सहभागी खेलहरू हेर्दा फुटबल खेल्न रुचि हुने बालबालिकाले धेरै कुरा सिक्न पाउने उनले बताए ।

प्रतियोगिताका हरेक खेल साँझ ६ बजेदेखि राति ८ बजेसम्म ‘फ्लडलाइट’ मा खेलाइएको थियो । यसका लागि करिब ३० लाख रुपैयाँ खर्च गरेर सहिद मैदानका विभिन्न ६ स्थानमा ६ वटा फ्लडलाइट राखिएका थिए । आयोजक समितिका अध्यक्ष नवीन रिजालका अनुसार फ्लडलाइटमा १ सय ५० वटा बत्ती बालिएका थिए ।

विराट गोल्डकप काठमाडौं बाहिरको सबैभन्दा बढी पुरस्कार राशि भएको प्रतियोगिता हो । फाइनल खेलमा थ्रीस्टार क्बलले आर्मी क्लबलाई शून्यका विरुद्ध तीन गोल गर्दै च्याम्पियन बन्यो । विराट गोल्डकप उपाधि जित्दै उसले १२ लाख ७१ हजार रुपैयाँ र ट्रफी पाएको थियो । उपविजेता आर्मी टिमले ५ लाख ५१ हजार रुपैयाँ पाएको थियो ।

प्रतियोगितामा नेपालका चर्चित टिमहरू मनाङ–मस्र्याङ्दी, नेपाल पुलिस, सशस्त्र प्रहरी बल, त्रिभुवन आर्मी, थ्रीस्टार, रमपम झापा ११, संकटा र रिजालको मोरङ ११ ले प्रतिस्पर्धा गरेका थिए । भुटानको थिम्पु फुटबल क्लब र भारतको मोहमडन स्पोर्टिङ क्लब पनि प्रतिस्पर्धामा सहभागी थिए । हरेक खेलको म्यान अफ द म्याचले १० हजार र म्यान अफ द टुर्नामेन्टलाई मोटरसाइकल दिइएको थियो । उत्कृष्ट गोलकिपर, मिडफिल्डर, डिफेन्स, बढी गोलकर्ता, उत्कृष्ट व्यवस्थापक, प्रशिक्षकलाई पनि पुरस्कृत गरिएको थियो ।
तस्बिरहरू : वेदराज पौडेल