नाच्दै, रम्दै

राजाराम पौडेल

काठमाडौँ — पोखरामा १२ औ संस्करणको लिटिल कास्की च्याम्पियन २०७५ आयोजना गरिएको छ । प्रतियोगितामा कास्की लेखनाथ गगनगौडाकी प्रीति पुन च्याम्पियन बन्न सफल भइन् । ज्ञानज्योति स्कुलमा अध्ययनरत १२ वर्षीय प्रीतिले अन्य २० प्रतिस्पर्धीलाई पराजित गर्दै उपाधि जित्न सफल भएकी हुन् । उपाधि जितेपछि प्रीतिले सफल डान्सर बन्ने आफ्नो सपना रहेको बताइन् ।

‘सानैदेखि नृत्यमा रुचि राख्ने र अभ्यास गर्ने गर्थें,’ उनले भनिन्, ‘त्यसैले उपाधि जित्न सकेको हुँ ।’ उनलाई कल्चरल र हिपहप डान्स मन पर्छ । अडिसनमार्फत छानिएपछि फाइनलसम्म आइपुग्दा विभिन्न तालिमले पनि आफ्नो क्षमतामा निखार आएको उनले बताइन् । उपाधिसहित प्रीतिले नगद ३० हजार र ट्रफी हात पारेकी छन् ।

नवसाधना कला केन्द्रको प्रस्तुतिका रूपमा आयोजित नृत्य प्रतियोगिताको अडिसनमा झन्डै ५ सय बालबालिका सहभागी थिए । विभिन्न ४ चरणबाट छानिएका प्रतिस्पर्धी फाइनलमा पुगेका थिए । कास्की जिल्लास्तरीय खुल्ला एकल नृत्य प्रतियोगितामा ७ वर्षदेखि १२ वर्ष उमेर समूहका प्रतियोगीले सहभागिता जनाएका थिए । पोखरा र लेखनाथका विभिन्न ठाउँमा अडिसन गरी प्रतियोगी छनोट गरिएको आयोजकले जनाए ।

पोखरा उद्योग वाणिज्य संघको हलमा आयोजित ग्रान्ड फिनालेमा आकृति गुरुङ दोस्रो र श्रेया गुरुङ तेस्रो भए भने सुर्वण रोकाले सान्त्वना पुरस्कार प्राप्त गरे । आकृतिले २० हजार, श्रेयाले १० हजार र सुवर्णले ५ हजारसहित ट्रफी पुरस्कार पाए । प्रतियोगितामा उत्कृष्ट भेषभूषातर्फ सुयन्सी गुरुङ र अनुसाशनतर्फ तृप्ति गुरुङ अब्बल ठहरिए । ग्रान्ड फिनालेमा कुल २१ प्रतियोगीले प्रतिस्पर्धा गरेका थिए ।

फाइनलमा प्रतिस्पर्धा गर्ने प्रतियोगीमा सीमा गुरुङ, सुक्मित गुरुङ, श्रेया गुरुङ, ग्रीष्मा गुरुङ, अलिसा गोदार, सुर्वण रोका, सुयन्सी गुरुङ, प्रीति पुन, रोशनी सुनार, आसिका गौतम, तृप्ति गुरुङ, सुप्रिया खत्री, सुस्मिता छत्याल, आकृति गुरुङ, सक्षम गुरुङ, प्रिया गुरुङ, सदीक्षा सुनार, युनिसा गुरुङ, शुभेक्षा खड्का, कृष्टिना गुरुङ, प्रजिता मुडवरी थिए ।

नवसाधना कला केन्द्रले नै आयोजना गरेको कास्की च्याम्पियन २०७५ को उपाधि लेखनाथ पट्नेरीकी नेहा सिं सुनुवारले जितिन् । १३ वर्षभन्दा माथिको उमेरसमूहको सहभागिता रहेको यो प्रतिस्पर्धामा अन्य १० प्रतियोगीलाई पराजित गर्दै उनले उपाधि जितेकी हुन् । उपाधिसहित उनले नगद ४० हजार ट्रफी हात पारिन् । अडिसनमा सहभागी झन्डै ३ सय प्रतियोगीबाट विभिन्न चरण हँुदै ११ जना उपाधिका लागि फाइनलमा भिडेका हुन् । प्रतियोगितामा होममाया मगर दोस्रो, प्रेरणा गुरुङ तेस्रो र सीता लामा सान्त्वना भए । होममायाले नगद ३० हजार, प्रेरणाले २० हजार र सीताले १० हजार नगदसहित ट्रफी प्राप्त गरे । आयोजकले पोखराको मानव सेवा आश्रम समितिलाई २५ हजार रुपैयाँ नगद सहयोग गरे । उपाधि विजेतालाई जनसांस्कृतिक महासंघ गण्डकी प्रदेश संयोजक मनकुमार श्रेष्ठलगायतले पुरस्कार वितरण गरेका थिए ।

Yamaha

Esewa Pasal

प्रकाशित : भाद्र ३, २०७५ ०८:१७
ADVERTISEMENT
ADVERTISEMENT
प्रतिक्रिया
पठाउनुहोस्

रक स्टार सपना

राजाराम पौडेल

काठमाडौँ — सानैमा ड्रम बजाएर विश्व कीर्तिमान राखेका उत्प्रेम जोजिजू अहिले १० वर्षका भए । दुई वर्षको उमेरमै ड्रमसेट बजाएर उनी चर्चामा आएका थिए । २०६५ असोजमा जन्मिएका उत्प्रेमले २०६७ असोजमा पहिलो प्रस्तुति दिएका थिए । उनले एभरेस्ट वल्र्ड रेकर्ड २०१२, युनिक वल्र्ड रेकर्डलगायतका ७ वटा वल्र्ड रेकर्ड बनाएका छन् ।

उत्प्रेमले हालै मात्र ‘बाल विकास’ र ‘माछापुच्छ्रे’ बोलका दुई गीत रेकर्ड गराएका छन् । ड्रमर मात्र नभएर बाल गायकका रूपमा समेत उनले आफ्नो परिचय बनाएका छन् । ‘रेन’ बोलको अंग्रेजी गीत पनि गाएका छन् । नेपाली राष्ट्रभावका गीत र अंग्रेजी गीतमा आफ्नो बढी रुचि भएको उनी बताउँछन् ।

उत्प्रेमको घरमा सांगीतिक माहोल थियो । गीत संगीत सिकाइन्थ्यो । त्यसैले संगीतको धून र तालसँग उनी सजिलै नजिकिए । कोठाभित्र ड्रम क्लास भइरहेको हुन्थ्यो । उनी भित्र जान खोज्थे तर ढोका लगाएकोले जान सक्दैनथे । बाहिर पनि ड्रमसेट हुन्थ्यो । उनले भित्र जे बजेको छ सुनेर त्यसरी नै बजाउने गर्थे । यसरी नै उनले ड्रमसेट बजाउन सुरु गरे । उनले ड्रमसेट बजाएको देखेर म्युजिक सेन्टरमा महिनाको अन्तिम शुक्रबार हुने कार्यक्रममा बजाउन दिइयो । अनि बल्ल उनको क्षमता थाहा भयो । उत्प्रेमले पोखरामा आयोजित औद्योगिक व्यापार मेला, गैरआवासीय नेपाली संघको कार्यक्रमलगायतमा आफ्नो प्रस्तुति राख्दै सबैको तारिफ बटुले । विभिन्न ठाउँमा आयोजित कार्यक्रममा उनलाई सम्मान गरियो । राष्ट्रिय बालप्रतिभा पुरस्कारलगायत पुरस्कार पनि उनले जिते ।

उत्प्रेम ड्रमसेटका बाहेक तबला, किबोर्ड, गितार र नेवारी बाजा खी: समेत बजाउँछन् । आफ्नो घरमै बुबाले जोजिजू म्युजिक स्कुलमार्फत संगीत सिकाउने गरेकाले उनलाई अभ्यास गर्न सहज भयो । स्कुलबाट फर्किएपछि खाजा खाएलगत्तैको समय उनी संगीत सिक्न खर्चिन्छन् । फुटबल खेल्न र पुस्तक पढ्न पनि उनलाई उत्तिकै मन पर्छ । ‘सांगीतिक क्षेत्रमा लागेर रकस्टार बन्ने हो,’ उत्साहित हुँदै उत्प्रेम भन्छन्, ‘त्यसका लागि दिनहुँ अभ्यास गर्ने गरेको छु ।’ घरमै सांगीतिक माहोल भएकाले उनकी डेढ वर्षकी बहिनी उत्प्रेरणा पनि पियानो बजाउँछिन् ।

उत्प्रेमलाई सांगीतिक क्षेत्रमा अगाडि बढ्न बुबा सहदेव जोजिजू (विनीत) र ममी हरिमाया श्रेष्ठ जोजिजू (सानु) ले हौसला दिने गरेका छन् । ‘अब उसलाई लिएर नेपालका विभिन्न ठाउँमा टुर गर्ने योजना बनाएका छाँै,’ विनीतले भने ।

विनीतका अनुसार उत्प्रेमले गिनिज बुक अफ वल्र्ड रेकर्डमा विश्वकै कान्छो ड्रमरका रूपमा कीर्तिमान राख्न प्रयास गरे पनि त्यो प्रक्रिया पूरा भइसकेको छैन । त्यसका लागि उनले म्युजिक नेपालको स्टुडियोमा प्रत्यक्ष ड्रमसेट बजाएर गीत रेकर्ड गरेका थिए । ‘तालको पानी माछीले खानी..., ‘रेशम फिरिरी...’, ‘पलपलको सम्झनामा...’, ‘नाच्यौं मैच्याङ...’ सहित नेपाली गीत र अंग्रेजी गीतमा ड्रम बजाउँदै संगीतको धून भर्ने कला उनमा छ । ‘भविष्यमा ड्रमर र गायन दुवै कलालाई साथै अगाडि बढाउँछु,’ उत्प्रेमले भने । पोखराको एक निजी स्कुलमा कक्षा ४ मा पढ्ने यी छात्रलाई उनको प्रतिभाको कदर गर्दै स्कुलले छात्रवृत्ति दिएको छ ।

प्रकाशित : श्रावण २७, २०७५ ११:०७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT