सिलोङमा अन्तरा

सिलोङस्थित ‘गोरेटो सोसियो–कल्चरल एन्ड वेलफेयर सोसाइटी’ को निम्तोमा सांस्कृतिक आदान–प्रदानका लागि अन्तरा समूहको ३२ सदस्यीय कलाकार टोली लिएर त्यसतर्फ गएको थियो ।

टोलीमा संलग्न राष्ट्रिय जनसांस्कृतिक महासंघका अध्यक्ष खगेन्द्र राईले कार्यक्रम ऐतिहासिक भएको दाबी गरे । उनले भने, ‘सिलोङमा नेपाली भाषा, कला र संस्कृतिप्रतिको अगाध प्रेम देखेर हामी छक्क पर्‍यौं ।’ कार्यक्रममा अन्तरा सांगीतिक समूह र सांस्कृतिक संस्थानका कलाकारहरूले पालाम, साकेला, सेलो, कौरा, हुडकेली, धिमे, पूर्वेली मारुनी, थारु र संगिनील गायतका ६ गीत र ६ नृत्य प्रस्तुत गरेका थिए ।

कार्यक्रमका संयोजक संगीतकार तथा प्राज्ञ सदस्य अशोक लोहोरुङ राईले सिलोङको कार्यक्रमले लोकसंस्कृतिका क्षेत्रमा काम गर्न आफू थप उत्साहित भएको बताए । आयोजक गोरेटोका मूल सचिव रोशन भण्डारीले यस प्रकारको सांस्कृतिक कार्यक्रम सिलोङमै पहिलो भएको बताए ।