कार्यालय थुनेर तालिममा

कान्तिपुर संवाददाता

सुर्खेत — जिल्लाको पञ्चपुरी नगरपालिकाका जनप्रतिनिधि र कर्मचारी कार्यालयमा ताल्चै ठोकेर एनजीओद्वारा सञ्चालित तालिममा सहभागी भएका छन् । उनीहरू यूएसएआईडी साझेदारी विकास परियोजनाको आर्थिक सहयोगमा सुन्दर नेपाल संस्थाद्वारा सञ्चालित स्थानीय सरकार, कार्यसञ्चालनसम्बन्धी अभिमुखीकरणमा सहभागी हुन बिहीबारै सदरमुकाम वीरेन्द्रनगर पुग्दा शुक्रबार पनि कार्यालय खुलेन । 

नगरपालिकाका वडा कार्यालय, विषयगत कार्यालय पूरै बन्द रहे । पञ्चपुरी–२ का यामु बीसीले नगरपालिका नेतृत्वको गैरजिम्मेवारीप्रति कडा आक्रोश पोखे । ‘सिंहदरबारको अधिकार गाउँगाउँमा भने पनि हाम्रा जनप्रतिनिधिले आफ्नै हैसियत ख्याल गर्न सकेनन्,’ उनले भने, ‘हुँदाहुँदा नगरपालिकामै चलाउन सकिने तालिम वीरेन्द्रनगरमा भए छ । योभन्दा हेलचेक्र्याइँ अरू के हुन्छ ?’ उनले नगरपालिकाको मुख्य कार्यालयदेखि वडा कार्यालय सबै बन्द भएको टेलिफोनबाट जनाए ।
स्थानीय तहको क्षमता अभिवृद्धि गर्ने उद्देश्यले आयोजना गरिएको उक्त तालिम शनिबारसम्म चल्यो । जसमा बाटो अवधिसहित कर्मचारी/जनप्रतिनिधिको चार दिन समय खर्च हुनेछ । यो अवधिमा अत्यावश्कीय सेवा लिनुपर्ने सर्वसाधारणहरू मर्कामा परेको बीसीले गुनासो गरे । पञ्चपुरी नगरपालिकाका जनप्रतिनिधि/कर्मचारीलाई मात्र तालिम दिन वीरेन्द्रनगर बोलाएकामा सुरुमा केही जनप्रतिनिधिले असन्तुष्टि जनाएका थिए । वीरेन्द्रनगरको ‘थ्री स्टार’ लेभलको एक होटलमा सञ्चालित यस तालिमको नगरपालिका आफैं आयोजक हो ।
पञ्चपुरीमा तालिम हल र आवासको राम्रो व्यवस्था नभएकाले वीरेन्द्रनगरमा आयोजना गरिएको सुन्दर नेपाल संस्थाले जनायो । तालिमका प्रमुख अतिथि पूर्वमन्त्री एवं प्रदेशसभा सदस्य यामलाल कँडेलले जनप्रतिनिधिलाई स्थानीय तह नै खाली गरेर दातृ निकायले जता बोलायो उतै नहिँड्न आग्रह गरेका थिए । ‘दातृ निकायलाई पनि स्थानीय तहको क्षमता विकासको नाममा जनताको काममा बाधा पर्ने गरी केन्द्रमा कार्यक्रम नगर्न मेरो सुझाव छ,’ उनले भने ।

प्रकाशित : पुस ३०, २०७४ ०७:३३
प्रतिक्रिया
पठाउनुहोस्

स्रोत बढाउन नदी दोहन

हरिहरसिंह राठौर

बेनीघाट (धादिङ) — आन्तरिक स्रोत बढाउने नाममा स्थानीय तह नै नदी दोहन गर्ने होडबाजीमा देखिएका छन् । जनप्रतिनिधिहरू दोहनले पार्न सक्ने असर विचारै नगरी नदीका बगर ठेक्कामा बाँडिरहेका छन् । 

त्रिशूली र बूढीगण्डकीले छोएका नुवाकोट, धादिङ र गोरखा तीनै जिल्लाका स्थानीय तहले यी नदीको बगर क्रसर व्यापारीलाई कौडीको भाउमा ठेक्कामा दिएका हुन् । पदाधिकारी, कार्यकारी अधिकृतहरूको मिलेमतोमै यो काम भइरहेको छ । नुवाकोटले धादिङसँग सीमा जोडिएका रातामाटे र कोल्फुखोला बगरबाट निर्माण सामग्री उत्खनन र बिक्रीवितरण गर्न अनुमति दिएको छ ।
बेनीघाटसँग सीमा जोडिएको गोरखाको सिउरेनीटार बगर विभिन्न कम्पनीलाई ठेक्का दिइएको छ । ती कम्पनीले स्थानीय तहलाई बुझाउने भन्दा जनप्रतिनिधि र कार्यकारी अधिकृतलाई बुझाउने रकम दोब्बरहुन्छ । गण्डकी गाउँपालिकाको सिफारिसमा जिससले ठेकेदारलाई प्रतिट्रिपर ८ सय ६६ रुपैयाँ र गण्डकी गाउँपालिकाले प्रतिखेप ६ सय रुपैयाँ निकासी कर लिई बगर उत्खनन गर्न दिएको हो ।
धादिङ, पिडा–१ का अर्जुन श्रेष्ठले बूढीगण्डकी र त्रिशूलीको संगमस्थल सिउरेनीटार बगरबाट कात्तिक १४ देखि जेठ मसान्तसम्म २ सय ७० घनफिट ढुवानी क्षमताको ट्रिपरमा ९ सय ६६ ट्रिप निर्माण सामग्री उत्खनन र बिक्रीवितरण गर्न पाउने गरी ठेक्का सकारेका थिए । तर, दुई महिना नपुग्दै ४ हजार टिप निर्माण सामग्री उत्खनन र बेचबिखन गरेपछि गोरखा जिससले रोक लगाएको छ । समितिको टोलीले नदीकिनार मापदण्डभन्दा गहिरो पारिएको, मासिक सय ट्रिपर मात्रै उत्खनन गर्न पाइनेमा दैनिक सय ट्रिपरसम्म बिक्री गरिएको फेला पारेको थियो । ‘सर्त र सम्झौताभन्दा बढी लैजान लागेको, मापदण्डभन्दा बढी गहिर्‍याएर उत्खनन गर्न थालेपछि स्थानीयको दबाबमा काम रोक्न लगाई थप परिणामको मूल्य लिन जिससलाई पत्राचार गरेका छौं,’ गण्डकी–८ का वडाप्रमुख रामप्रसाद रेग्मीले बताए ।
व्यापारीले गोरखातर्फका त्रिशूली किनारका निजी जग्गा भाडामा लिएर अवैध बालुवा खानी सञ्चालनमा ल्याएका छन् । धादिङतर्फ त्रिशूलीमा स्काभेटरलगायत उपकरणले ढुंगा, गिट्टी निकाल्न रोकिएपछि बन्द हुन लागेका क्रसर उद्योग गोरखाको सिउरेनीटारे बगर स्थानीय तहले ८ लाखमै बेचेपछि हौसिएका छन् । उनीहरूले रातारात सयौं खेप कच्चा पदार्थ खरिद गरिसकेका छन् । मलेखुस्थित फुर्केखोला पुलनजिकैको बगर पनि सिद्धलेख गाउँपालिकाले जेठ मसान्तसम्मका लागि १० लाख रुपैयाँमा स्थानीय क्रसरलाई ठेक्का दिएको छ । गजुरी गाउँपालिका, गल्छी, थाक्रे र धुनीबेंसीले पनि आ–आफ्ना भागमा परेका त्रिशूली किनारमा गिट्टी–बालुवा संकलन फुकुवा गरेका छन् ।
गल्छी–त्रिशूली सडक विस्तारका नाममा त्रिशूली बगर उत्खनन गर्न जिसस नुवाकोटबाट अनुमति पाएका ठेकेदारले एक महिनामै हजारौं ट्रिपर निर्माण सामग्री धादिङ तथा स्थानीय क्रसर उद्योगमा पुुर्‍याइसके । बेनीघाट–रोराङ गाउँपालिका प्रमुख पित्तबहादुर डल्लाकोटीले नदी उत्खननबाट त्रिशूलीमा व्यापक प्रदूषण बढेको जनाए । नियन्त्रणका लागि स्थानीय तहका पदाधिकारीको बैठक र प्रशासनमा हारगुहार गरे पनि सुनुवाइ नभएको उनको भनाइ छ । ‘मुखमा लाखौं रकमको बुजो लागेपछि हाम्रो आवाज कसैले सुनेन,’ उनले भने । नुवाकोट जिससका संयोजक शान्तराम तामाङले नदीकिनार ठेक्का लगाइएको विषयमा कुनै प्रतिक्रिया दिन चाहेनन् ।

प्रकाशित : पुस ३०, २०७४ ०७:३३
पूरा पढ्नुहोस्
प्रतिक्रिया
पठाउनुहोस्