सरकारीलाई निजी स्कुलको हाराहारीमा लैजान्छौं : मेयर थापा

कान्तिपुर संवाददाता

काठमाडौँ — कागेश्वरी मनोहरा नगरपालिकाका मेयर कृष्णहरि थापाले आफ्नो नगर क्षेत्रका सरकारी विद्यालयलाई निजीको हाराहारीमा लैजाने प्रतिबद्धता जनाएका छन् ।

‘निजी क्षेत्र र सरकारीलाई एउटै बाटोमा हिँडाउने गरी हामीले भिजन तयार गरेका छौं’ नगरपालिकाको काँडाघारीस्थित अक्षरा स्कुलको सातौं स्थापना दिवस तथा भूकम्प प्रतिरोधी भवनको उद्घाटन गर्ने क्रममा मेयर थापाले भने, 'देश संघीयतामा गएपछि जिल्ला शिक्षा कार्यलयले हेर्दै आएको शिक्षाको अधिकार स्थानीय सरकारलाई गएको छ ।

Yamaha

‘हाम्रो नगरपालिकाकामा ४० वटा निजी स्कुल रहेछन्', मेयर थापाले भने, ‘के कस्तो अवस्था छ भनेर अध्ययन गरिराखेका छौं ।’ नगरपालिका भित्रका स्कुलका शुल्क निर्धारण गर्ने अधिकार समेत स्थानीय सरकारलाई छ ।

काठमाडौं विश्वविद्यालयका पूर्वउपकुलपति डा.सुरेशराज शर्माले आजकाल मुलुक बाहिरको ज्ञान दिएकोले आफैंलाई चिनाउने शिक्षा दिनु पर्नेमा जोड दिए । ‘अब मुलुक बनाउने ज्ञान दिनु पर्‍यो । सिप दिनु पर्‍यो,’ शर्माले भने, ‘काम गर्ने अठोट ज्ञानले दिन्छ । हामीले ज्ञान दिएका छौं । अब आफैंलाई चिनाउनु पनि पर्छ ।’

सरकारले मात्रै होइन नागरिकले पनि केही गर्न सक्छन् भन्ने उदाहरण काठमाडौं विश्वविद्यालयमा देखाइएको उनले बताए । ‘जनतासँग पनि केही गर्न तागत हुन्छ,’ उनले भने ।

स्कुलकी प्रिन्सिपल अञ्जु भट्टराईले सरक्षित र बालमैत्री सिकाइमा स्कुलले ध्यान दिएको बताइन् । ‘कठिनाइ र चुनौती छन् । त्यसका बाबजुत पनि बालबालिकालाई केन्द्रमा राखेर हामी अघि बढेका छौं’, उनले भनिन् ।

प्रकाशित : चैत्र ३, २०७४ २०:१०
ADVERTISEMENT
प्रतिक्रिया
पठाउनुहोस्
ADVERTISEMENT

टर्कीको हवाइ आक्रमणमा ११ सर्वसाधारणको मृत्यु 

रासस/एएफपी

लेवनान — सिरियाली विद्रोहीको आधार इलाका मानिने अफ्रिन क्षेत्रबाट द्वन्द्वको पीडा सहन नसकी सुरक्षित स्थलतर्फ भाग्दै गरेका ११ जना सर्वसाधारण नागरिकमाथि टर्कीद्वारा शनिबार पुनः हवाई आक्रमण भएको सिरियाली मानवअधिकारवादी संस्थाले जनाएको छ । 

बेलायतस्थित सिरियन अब्जरभेटरी फर ह्युमन राइट्सले भनेको छ, 'टर्की नेतृत्वको सुरक्षाबलले कूर्दिस बाहुल्यता रहेको अफ्रिनमा शहर र वरपरका स्थानमा गरेको पछिल्लो आक्रमणमा ११ जना सर्वसाधारणको मृत्यु भएको छ ।'

सिरियामा मानव अधिकार अनुगमन गरिरहेको उक्त संस्थाका अनुसार टर्कीद्वारा सिरियाली कूर्दिस लडाकूविरुद्ध जनवरी २० पछि चलाएको स्थल तथा हवाई सुरक्षा कारबाही परी २८० सर्वसाधारणले ज्यान गुमाएका छन् । मारिनेमा अधिकांश महिला तथा बालबालिका रहेका बताइएको छ ।

अङकाराले भने कारबाहीमा सर्वसाधारणको मृत्यु नहोस् भनेर अत्यधिक सावधानी अपनाइएको पटक पटक बताउँदै आएको छ ।

प्रकाशित : चैत्र ३, २०७४ २०:०८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT