मोटरसाइकलको ठक्करबाट वृद्धाको मृत्यु
भक्तपुर — सूर्यविनायकमा मोटरसाइकलको ठक्करबाट मंगलबार एक वृद्धा महिलाको मृत्यु भएको छ ।
भक्तपुरबाट सूर्यविनायक गणेशमन्दिरतर्फ जाँदै गरेको बा १९ प ३३६१ नम्बरको मोटरसाइकलले ठक्कर दिँदा पैदलयात्रु सिन्धुपाल्चोक चौतारा घरभई सूर्यविनायक नगरपालिका ५ सल्लाघारी बस्ने ७० वर्षीया लक्ष्मी श्रेष्ठको मृत्यु भएको प्रहरीले जनाएको छ ।
ठक्करबाट सख्त घाइते श्रेष्ठको उपचारको क्रममा किस्ट अस्पतालमा मृत्यु भएको महानगरीय प्रहरी परिसर भक्तपुरका प्रवक्ता डीएसपी रेवतीरमण पोखरेलले बताए ।
मोटरसाइकलको ठक्करबाट सोही स्थानकी ६४ वर्षीया मैंया श्रेष्ठ घाइते भएकी छन् । घाइतेको डा. इवामुरा मेमोरियल अस्पतालमा उपचार भइरहेको प्रहरीको भनाइ छ ।
मोटरसाइकल र चालक सूर्यविनायक ८ सिपाडोलका सानुभाइ नेपालीलाई प्रहरीले नियन्त्रणमा लिएको छ ।