जमिन फाटेपछि ४ घर भत्किए, १४ घर धरापमा

जनकराज सापकाेटा

काठमाडौँ — बुढानिलकण्ठ नगरपालिका विष्णुमति टुसालमा शुक्रबार जमिन फाटेपछि चार घर भत्किएका छन् । थप १४ घरसमेत धरापमा परेको बुढानिलकण्ठ प्रहरी प्रभागका टोपबहादुर शाहीले जानकारी दिए । शाहीका अनुसार १४ परिवार विस्थापित भएका छन् । घर भत्किएका र विस्थापित परिवारलाई सुरक्षित स्थानमा सारिएको छ ।

जमिन चिरा परेर फाटेपछि चित्रबहादुर बस्नेत, राधिका धिताल, वीरबहादुर तामाङ र सुशीला बस्नेतको घर भत्किएको हो । शाहीले घर भत्केको स्थानमा प्रहरी पुगिसकेको उल्लेख गर्दै त्यहाँ मानवीय क्षति भने नभएको बताए ।

Yamaha


स्थानीय विजेन्द्र बुढाथोकीका अनुसार उक्त ठाउँमा चार/पाँच दिनदेखि नै जमिनमा चिरा पर्न थालेको थियो । बिहीबार भूगर्भविदको टोली आएर चिरा परेको ठाउँ अवलोकन गरेको थियो । पानी बढी पर्न थालेपछि चिरा बढै गएको र घर भत्कन थालेकोसमेत बुढाथोकीले बताए । चिरा परेको ठाउँमा पहिला डाँडो थियो । खारेर प्लटिङ गरिएको हुनाले जमिन चिरा परी फाटेको हुन सक्ने अनुमान भूगर्भविदले गरेका छन् ।

प्रकाशित : भाद्र १५, २०७५ २०:४८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कञ्चनपुरको सिडिओ र एसपी हटाइए, सहसचिवको नेतृत्वमा छानविन सिमित

जनकराज सापकाेटा

काठमाडौँ — आन्दोलनले उग्र रूप लिएपछि गृह मन्त्रालयले बिहीबारै कञ्चनपुरका प्रमुख जिल्ला अधिकारी कुमारबहादुर खडका, एसपी डिल्लीराज विष्ट र डीएसपी ज्ञानबहादुर सेठीलाई राजधानी तानेको छ ।

घटनाको सूक्ष्म अनुसन्धान गर्न नसकेको भन्दै उनीहरूप्रति पीडित परिवार र स्थानीयवासी आक्रोशित थिए । साउन १० गते नै बेपत्ता छोरी पत्ता लगाउन परिवारले हारगुहार गर्दा बेवास्ता गरेको, घटनास्थलमा शवको मुचुल्का बनाइसकेपछि अलपत्र छोडेको, जबर्जस्ती शवको दाहसंस्कार गराएको र शंकास्पद व्यक्तिहरूलाई अनुसन्धान दायरामा नल्याएको आरोप पीडितले लगाएका थिए ।

आन्दोलनकारीले सुरुदेखि नै एसपी विष्ट अनुसन्धानलाई अन्यत्र मोडेर वास्तविक अपराधी जोगाउन लागिपरेको आरोप लगाउँदै आएका थिए तर मानसिक सन्तुलन गुमाएका व्यक्तिलाई सोमबार एक्कासि हत्याराका रूपमा प्रहरीले सार्वजनिक गरेपछि आन्दोलन चर्किन पुग्यो । बलात्कारपछि हत्या गरिएकी किशोरी आफूसँगै पढ्ने रोशनी बमको घरमा गएको अवस्थामा बेपत्ता भएकाले घटनाको अनुसन्धान पनि त्यही घरबाट हुनुपर्छ भन्ने किशोरीका बुबालगायत स्थानीयवासीको माग थियो ।

‘तर एसपी विष्ट रोशनी दिदीबहिनीलाई जोगाउन लागिपरे, हामीलाई दिनहुँ धम्क्याउन थाले,’ किशोरीका बुबाले भने, ‘न्याय पाउने कुरा त परै जाओस्, प्रहरी प्रमुखबाट डर, त्रास र धम्की मात्रै पाएँ ।’ प्रहरी प्रशासनले घटनाको अनुसन्धानमा देखाएको गतिविधिले पनि कञ्चनपुरमा आन्दोलन चर्काएको हो ।

यसैबीच, गृह मन्त्रालयले किशोरीको बलात्कारपछि हत्या घटना छानबिनका लागि सहसचिव हरि मैनालीको संयोजकत्वमा प्रहरीका तीन डीआईजीसमेत रहेको समिति गठन गरेको छ । घटनाको छानबिनका लागि शुक्रबार संसदीय समितिसमेत गठन गरिने भएको छ ।

यता प्रदेश ७ को संघीय इकाई कार्यालय धनगढीबाट वरिष्ठ प्रहरी उपरीक्षक विक्रमबहादुर चन्द घटनाको अनुसन्धान प्रक्रिया र शान्तिसुरक्षाको अवस्थामा समन्वय गर्न बिहीबारै महेन्द्रनगर पुगेका छन् ।

यसअघि सुदुरपिश्चमका सांसदहरुले उक्त घटनालाई गम्भीर रुपमा लिन र आवश्यक कदम चाल्न माग गर्दै गृहमन्त्री रामबहादुर थापासँग भेट गरेका थिए।

तीन दिनअघि प्रहरीले मानसिक सन्तुलन ठिक नभएका एक जनालाई हत्याको अभियुक्त भन्दै सार्वजनिक गरेपछि स्थानीयस्तरमा आक्रोश चुलिएको छ। दैनिक प्रदर्शन भइरहेको छ भने बजार तथा सवारी बन्द छ। बिहीबार प्रहरीले चलाएको गोली लागी चार जना घाइते भएका छन्।


प्रकाशित : भाद्र ७, २०७५ १६:५२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT