भक्तपुरमा टिपरको ठक्करबाट एकको मृत्यु, टिपरमा लगाइयो आगो
भक्तपुर — अरनिको राजमार्गअन्तर्गत सूर्यविनायक पान्डूबजारमा बुधबार साँझ टिपरले मोटरसाइकललाई ठक्कर दिँदा एक व्यक्तिको मृत्यु भएको छ ।
काभ्रेपलाञ्चोकबाट भक्तपुरतर्फ आइरहेको बा ८८ प ८५२ को मोटरसाइललाई सोही दिशाबाट आएको बा ४ ख ३६५० नम्बरको टिपरले ठक्कर दिँदा ती व्यक्तिको मृत्यु भएको प्रहरीले जनाएको छ । घटनामा काभ्रेको नमोबुद्ध नगरपालिका ८ डराउने पोखरीका २५ वर्षीय रामकृष्ण श्रेष्ठको मृत्यु भएको छ ।
घटनापछि स्थानीय बासिन्दाले टिपर जलाइदिएका छन् ।
राति ८ बजे अगाडि नै टिपर चलाएर दुर्घटना गराएको भन्दै स्थानीयले टिपरमा आगो लगाएका हुन् । टिपरको आगो निभाउन आएको दमकललाई समेत प्रदर्शनकारीले ढुंगा प्रहार गरेका छन् ।
आक्रोशित भीड नियन्त्रणका लागि प्रहरीले अश्रुग्यास हानेको छ । त्यस क्षेत्रमा केही समय यातायात आवामगन रोकिएको थियो ।