युवा व्यवसायी पौडेल हत्याको विरोधमा रुपन्देही बन्द
बुटवल — युवा व्यवसायी वसन्त पौडेलको हत्याको विरोधमा आज रुपन्देही बन्द गरिएको छ । युवा संघ तथा अनेरास्ववीयु रुपन्देहीले हत्यामा संलग्नलाई कारबाहीको माग गर्दै अनिश्चितकालिन रुपन्देही बन्दको आहवान गरेका हुन् ।
युवा व्यवसायी वसन्त पौडेलको हत्याको विरोधमा शनिबार रुपन्देही बन्द गरिएको छ ।
युवा संघ तथा अनेरास्ववीयु रुपन्देहीले हत्यामा संलग्नलाई कारबाहीको माग गर्दै अनिश्चितकालिन रुपन्देही बन्दको आहवान गरेका हुन् । बन्दका कारण पूर्वपश्चिम महेन्द्र राजमार्ग तथा उत्तरदक्षिण सिद्धार्थ राजमार्ग ठप्प छ । चोक चोकमा बसेर अवरोध गरेपछि भित्री सडकमा पनि सवारीका साधन चलेका छैनन् । बजार पसल तथा औद्योगिक प्रतिष्ठानसमेत खुलेका छैनन् । बन्दको प्रभाव बुटवल, देवदह, खैरेनी लगायतका स्थानका धेरै छ ।
हत्यामा संलग्नलाई पक्राउ नगर्दासम्म बन्द जारी राख्ने युवासंघ रुपन्देहीका अध्यक्ष नकुल शाहीले बताए । प्रहरी प्रशासनको कमजोरीका कारण युवा संघका जिल्ला अध्यक्ष दुर्गा तिवारीलाई गोली हानी हत्या भएको एक वर्षपछि फेरि अर्का युवाको हत्या भएको युवासंघको दाबी छ । रुपन्देहीमा यस्तै जिल्लामा क्रियाशिल राजनीतिक दल, व्यवसायीक संघसस्था र नागरिक समाजले समेत पौडेल हत्याको विरोधमा विज्ञप्ती निकाली हत्याको निन्दा गरेका छन् । साथै आरोपिलाई पक्राउ गरी सर्वसाधरणलाई सुरक्षाको अनुभूति दिलाउन समेत आग्रह गरेका छन् ।
अनुसन्धान टोली गठन
यसैबीच संघीय प्रहरी इकाई कार्यालय भैरहवाले पौडेलको हत्याबारे अनुसन्धान गर्न ७ सदस्यीय अनुसन्धान टोली गठन गरेको छ ।
घटनाको सम्बन्धमा अनुसन्धान गरी सत्यतथ्य पत्ता लगाउन भन्दै प्रहरी नायव उपरीक्षक धर्मराज भण्डारीको संयोजकत्वमा ७ सदस्यीय अनुसन्धान टोली गठन गरेको हो । टोलीले आजैदेखि काम सुरु गरेको प्रहरी नायव उपरीक्षक दिल्लीनारायण पाण्डेले बताए ।
व्यवसायी पौडेलको शुक्रबार बिहान करिब सबा ११ बजे देवदह २ ढेकाबारमा आफ्नै फर्निचर उद्योगमा बसेका बेला गोली हानी हत्या भएको थियो । मोटरसाइकलमा आएका २ जनाले गोली हानी भागेका थिए । घटना लगत्तै यसअघि सोही स्थानमै हत्या भएका युवासंघ रुपन्देहीका अध्यक्ष दुर्गा तिवारीको हत्याका मुख्य आरोपी मनोज पुनले स्थानीयलाई टेलिफोन गरी हत्याको जिम्मा लिएका छन् ।
प्रकाशित : पुस २२, २०७४ ११:०७
