घोराहीमा आन्दोलनको फोहोर पखालियो

टायर बालेर कालो भएको सडक राजनीतिक दलका युवा नेताहरुले ट्याङ्करबाट पानी ल्याएर सफा गरेका हुन् ।

बन्दका क्रममा सडकका बिभिन्नन ठाउँमा टायर बालेर फोहोर गरिएको थियो । शनिबार रातिदेखि बन्द र हड्ताल फिर्ता भएपनि सडकमा टायरको कालो मात्रै भएपछि यसको सर्वत्र आलोचना भएको थियो ।

आलोचनापछि नेताहरुले सडक सफा गरेर आफ्नो बचाउ गरेका छन् । संयुक्त संघर्ष समितिले बन्द र हड्ताल फिर्ता गरी अन्य कार्यक्रम तय गरेको छ । समितिले कालोझण्डा गाड्ने, बिरोधसभा गर्ने, मागपत्र पेश गर्ने जस्ता कार्यक्रम गर्ने निर्णय गरेको छ ।

आन्दोलनमा सहभागी दलका कार्यकर्ता र सर्बसाधारणले भने बन्द हड्ताल गरी अन्तमा विना उपलब्धी आन्दोलन स्थगित गरेको भन्दै सामाजिक सञ्जालमार्फत नेताहरुप्रति आक्रोश व्यक्त गरिरहेका छन् ।

आमहड्ताल र बन्दका क्रममा टायर बालेर फोहोर भएको दाङको घोराही बजार सरसफाई गरिदै । तस्बिर : दुर्गालाल केसी/कान्तिपुर