बोक्सी आरोपमा कुटपिट

घटनामा संलग्नलाई कारबाही माग गर्दै शनिबार मौखिक र आइतबार लिखित जाहेरी परेको छ । आइतबार नै जाहेरी अनुसार मुद्दा दर्ता भएको इलाका प्रहरी गढवाका प्रमुख प्रमोद क्षत्रीले बताए । आरोपीमध्ये तीन जनालाई नियन्त्रणमा लिई अदालतबाट म्याद थपसमेत गराइएको छ । ‘बोक्सी आरोपमा कुटपिट गरेको जाहेरी परेको छ । सोही आधारमा मुद्दा दायर भइसकेको छ,’ उनले भने, ‘तीन जनालाई पक्राउपछि अनुसन्धान सुरु भएको छ । अन्यको भने खोजी भइरहेको छ ।’

बाँकीलाई पनि तत्काल पक्राउ गरी अनुसन्धान थालिने उनले बताए । गाउँमा एक महिला बिरामी भएको र झारफुक गर्दा बोक्सी लागेको आरोप लगाएर आफूमाथि कुटपिट भएको अस्पतालमा उपचाररत पीडित महिलाले बताइन् । ‘म घरमा बसिरहेका बेला एक्कासी केही छिमेकी आएर बाहिर बोलाए । त्यसपछि बोक्सी भनेर जथाभावी कुटे,’ उनले भनिन्, ‘लछारपछार पारेर घाइते बनाए ।’