‘आतंकवाद निर्मूल पार्न सहकार्य’
काठमाडौँ — आतंकवाद र उग्रवादको जरैदेखि अन्त्य गर्न क्षेत्रीय सहकार्यको विकल्प नभएको सन्देश दिएर पाकिस्तानी प्रधानमन्त्री शाहिद खकान अब्बासी फर्किएका छन् । १९ घण्टे नेपाल भ्रमणका क्रममा गरेका राजनीतिक भेटघाटहरूमा अब्बासीले विश्व शान्तिकै लागि सहकार्य अपरिहार्य रहेको बताएका हुन् ।
विश्व राजनीतिमा देखिएको ‘बदलाव’ का बीचमा विकास गर्न सहकार्य नै पहिलो सर्त रहने उल्लेख गर्दै उनले भने, ‘हामी दक्षिण एसियाली क्षेत्रीय सहयोग संगठन (सार्क) मार्फत यस क्षेत्रमा सहकार्य गरिरहेका छौं । तर यसमा दुईपक्षीय सम्बन्ध प्रवेश पाएकाले संगठन अघि बढ्न नपाएको हो ।’
भारत–पाकिस्तान सम्बन्ध उल्लेख नगरी उनले दुई देशबीचको समस्याले सार्कका प्रतिबद्धता, गतिविधि र प्रक्रिया प्रभावित हुन नहुने बताए । सार्कको भूमिका सशक्त तुल्याउन आवश्यक रहेको पनि उनले सबैसँगको भेटमा जोड दिए । पाकिस्तान क्षेत्रीय शान्ति र विकासका लागि सधंै सक्रिय सहकार्य गर्न तयार रहेको पनि उनले बताए । उनले अहिले पाकिस्तानको मुख्य चुनौती आतंकवाद रहेको चर्चा गर्दै यसलाई चिरेर अघि बढिरहेको बताए । सबैजसो भेटवार्तामा उनले भने, ‘हिंसात्मक घटनाका कारण पाकिस्तानमा निर्दाेष सैनिक तथा गैरसैनिकले जीवनको क्षति बेहोर्नु परिरहेको छ । अन्य सदस्य मुलुकमा पनि त्यस्तो समस्या छ । यसलाई मिलेर चिर्न सकिन्छ ।’ स्वदेश फर्कनुअघि उनले आफ्नो नेपाल भ्रमणलाई सफल र उपयोगीको संज्ञासमेत दिए । आगामी तीन महिनामा पाकिस्तान निर्वाचनमा जान लागेको जानकारी दिँदै उनले लोकतन्त्र संस्थागत हुँदै विकास अघि बढेको समेत बताए ।
सार्क सचिवालयमा धुपीको बिरुवा रोप्दै उनले काठमाडौं सार्कको राजधानी भएको बताए । सार्कका महासचिव यतिबेला पाकिस्तानकै अम्जद बी सियाल छन् । उनले स्थगित सार्क शिखर सम्मेलन जतिसक्दो छिटो गराउन पाकिस्तान लागिरहेको भन्दै छिट्टै पाकिस्तानमा सम्मेलन हुने पनि बताए ।
स्वदेश प्रस्थान गर्नुअघि उनले राष्ट्रपति विद्यादेवी भण्डारीसँग शिष्टाचार भेट गरेका थिए । राजनीतिक भ्रमणका लागि सोमबार अपराहन काठमाडौं उत्रेका अब्बासीले प्रधानमन्त्री केपी ओलीलाई बधाई दिँदै आपसी हितबारे छलफल गरेका थिए । सोमबारै उनले दुई पूर्वप्रधानमन्त्री झलनाथ खनाल र माधवकुमार नेपाल तथा कांग्रेस नेता विजय गच्छदारसँग पनि भेट गरेका थिए । यी भेटघाट प्रधानमन्त्री ओलीले दिएको रात्रिभोजमा भएका थिए ।
माओवादी केन्द्रका अध्यक्ष पुष्पकमल दाहालसँग भने अब्बासीले आफू बसेको होटल हयातमै मंगलबार बिहान भेटवार्ता गरेका थिए । भेटमा अब्बासीले व्यापार, पर्यटनलगायतका क्षेत्रमा समेत थप सहयोग र सहकार्यमा अघि बढ्ने बताएका थिए । भेटमा गृहमन्त्री रामबहादुर थापा तथा माओवादी नेताहरू नारायणकाजी श्रेष्ठ, कृष्णबहादुर महरालगायत पनि सहभागी थिए । भेटपछि पत्रकारलाई संक्षिप्त प्रतिक्रिया दिँदै दाहालले दुई देशबीचको सम्बन्ध र आपसी चासोका विषयमा आफूहरूबीच छलफल भएको बताए । अब्बासीले पूर्वप्रधानमन्त्रीहरूसँग भेट गरेको भए पनि प्रमुख प्रतिपक्ष दलका नेता तथा कांग्रेस सभापति शेरबहादुर देउवासँग भने भेट भएन । प्रमुख प्रतिपक्ष दलका नेतासँग भेट नहुनुलाई पाकिस्तानले अस्वाभाविक मान्न सक्ने एक परराष्ट्र अधिकारीले बताए ।
चिकित्सा/प्राविधिक शिक्षामा कोटा थप्ने
राष्ट्रपति भण्डारीसँगको भेटमा अब्बासीले नेपाललाई दिएको चिकित्सा/प्राविधिक शिक्षाको कोटा दोब्बर गर्ने जानकारी गराए । शीतलनिवासमा भएको भेटवार्तामा भण्डारीले अब्बासीको भ्रमणले दुई देशबीचको सम्बन्ध थप मजबुत बनाउन योगदान पुगेको बताएकी थिइन् ।
भण्डारीले संविधानसभाबाट संविधान जारी भएपछि तीन तहका निर्वाचन सफल भई नयाँ सरकार गठन भएको अवस्थामा अब नेपाल स्थिरता र विकासमा अघि बढ्ने बताएको छलफलमा सहभागी परराष्ट्र सचिव शंकरदास बैरागीले बताए ।
सार्कका संस्थापक सदस्य राष्ट्र नेपाल र पाकिस्तानले पछिल्लो समय व्यापार प्रवद्र्धन र सम्पर्क सञ्जाल विस्तारमा जोड दिँदै आएकाले यसलाई अघि बढाउन जरुरी रहेको पनि अब्बासीले बताए । पाकिस्तान नेपालको प्रगति र विकासका लागि सामथ्र्यले भ्याएसम्म जेसुकै सहयोग गर्न कुनै पनि बेला उपलब्ध हुने उनले बताए । उनको भ्रमणले पाकिस्तानको क्षेत्रीय प्रभाव रहेको पनि सन्देश देखाउन खोजेको विज्ञहरूले बताएका छन् । मंगलबार उनलाई त्रिभुवन अन्तर्राष्ट्रिय विमानस्थलमा अर्थमन्त्री डा. युवराज खतिवडासहितको टोलीले बिदाइ गरेको थियो ।
छलफलमा चीन पनि जोडियो
अब्बासीले भेटघाटमा चीनसँग मिलेर पाकिस्तानले तयार गर्न लागेको रेलवे र हाइवे (सिपेक) को महत्त्वबारे पनि धारणा राखेका थिए । त्यसबाट नेपालले पनि फाइदा लिनुपर्ने उनको राय थियो । उनले नेपाल पनि बेल्ट एन्ड रोड इनिसिएटिभ्स (बीआरआई) मा गइसकेको मुलुक भएकाले यस क्षेत्रका लागि सिपेक निकै उपयोगी हुन सक्ने बताएका थिए । हाल १ हजार ७ सय किलोमिटर बनिरहेको उक्त रोडले तीन हजारभन्दा बढी सडकलाई एकत्रित गर्छ । सिपेक दक्षिण एसियाको आर्थिक परिवर्तनमा निकै उपयोगी हुने विश्वास उनले व्यक्त गरेका थिए । आफ्नो देशको योजना र प्राथमिकताबारे बोल्दा उनले यस्ता विषय जोडेको परराष्ट्र सचिव बैरागीले बताए । सीधा चीनको प्रसंग नआएको भए पनि विकास परियोजनाबाट चीन जोडिएको अधिकारीहरूले बताए ।
प्रकाशित : फाल्गुन २३, २०७४ ०७:०३