तनहुँमा जिल्ला अदालत र प्रहरी कार्यालयबीच भिडियो कन्फ्रेन्स सेवा सुरु
काठमाडौँ — तनहुँमा जिल्ला अदालत र प्रहरी कार्यालयबीच भिडियो कन्फ्रेन्स सेवाको सुरुवात भएको छ । कामु प्रधानन्यायाधीश दीपकराज जोशीले तनहुँ जिल्ला अदालतको निरीक्षण गर्नुका साथै कन्फ्रेन्सको समेत सुरुवात गरे ।
त्यसक्रममा अदालतका अधिकारीहरुले प्रहरी कार्यालयको थुनामा रहेका लागु औषध मुद्दाका एक थुनुवासँग कुराकानी गरेका थिए ।
न्यायपालिकाको रणनीतिक योजना अनुसार सूचना प्रविधिको अधिकतम प्रयोग गर्दै न्यायका उपभोक्तालाई सहज न्याय प्रदान गर्ने उद्देश्य अनुसार तनहुँ जिल्ला अदालतले भिडियो कन्फ्रेसको सुरुवात गरेको हो । भिडियो कन्फ्रेन्सबाट बयान, वकपत्र जस्ता काम सहजै गर्न सकिने भएकाले सेवा माध्यम प्रभावकारी हुने कामु प्रधानन्यायाधीश जोशीले बताए ।
कामु प्रधानन्यायाधीश जोशीले सोमबार नै गोरखा जिल्ला अदालत समेत निरीक्षण गरेका छन् । भुकम्पबाट पूर्ण रुपमा प्रभावित भएको गोरखा जिल्ला अदालत पुनर्निर्माण प्राधिकरणबाट निर्माणाधीन अवस्थामा रहेको छ ।
कामु प्रधानन्यायाधीश जोशीले सर्वोच्च अदालतबाट केहि दिन अगाडि भएको निर्णय स्मरण गराउँदै जिल्ला अदालतका न्यायाधीश वा श्रेस्तेदार मध्ये एक जनाले अदालत नछाड्न निर्देशन दिए ।
प्रकाशित : चैत्र १२, २०७४ १९:०९
