पार्टी एकता संयोजन समितिको बैठक बालुवाटारमा जारी

कान्तिपुर संवाददाता

काठमाडौँ — एमाले र माओवादी केन्द्रबीचको पार्टी एकता संयोजन समितिको बैठक प्रधानमन्त्री निवास बालुवाटारमा चलिरहेको छ ।

सोमबार प्रधानमन्त्री केपी शर्मा ओली र माओवादी केन्द्रका अध्यक्ष पुष्पकमल दहालबीच छलफल भएको थियो। सोमबार नै बसेको एमाले स्थायी समितिको बैठकले बैशाख ९ गतेलाई तोकिएको पार्टी एकता कार्यक्रमलाई पर धकेल्न नहुने निष्कर्ष निकालेको थियो।

एमाले र माओवादी पार्टीको केन्द्रीय समितिमा कुन दलको कति हिस्सा रहने भन्ने मुख्य विवाद छ। त्यसबाहेक चुनाव चिन्ह र जनयुद्ध शब्द राख्ने नराख्ने भन्नेमा पनि केही विवाद छ। तर मुख्य विवाद संख्यामा छ। त्यसका लागि माओवादीले ५०र५० प्रतिशत राख्नुपर्ने माग गरेको छ।

एमालेले विगतमा ६० र ४० प्रतिशत सम्मको मात्र भागवन्डा भएकाले पार्टीको पोजिसन अनुसार नै एकता हुनुपर्नेमा जोड दिएको छ। केन्द्रीय समिति बराबरी बनाउनेमा एमाले लचक छैन। माओवादीले भने फरक धारका कम्युनिष्टबीचको एकता भएकाले समान हैसियतमा हुनुपर्ने दवाव दिएको छ।

पछिल्लो समय दुबै दलका नेताको कायैशैलीका कारण पनि केही समस्या थपिएका छन्। सचिव सरुवा लगायतका बिषयमा प्रधानमन्त्रीले एकलौटी गरेको भन्ने लगायतका बिषयमा माओवादीको मुख्य असन्तुष्टि छ। फरक पार्टीको अस्तित्व रहेकै बेलामा प्रधानमन्त्रीले वास्ता नगरेकोले पार्टी एकता नै भएपछि झन् बढी एकलौटी गर्ने सक्न बुझाई माओवादीको छ। त्यसैले उनीहरु पार्टी भित्र समान हैसियत र संख्यामा आफ्नो उपस्थिति जनाउन चाहेका छन्।
तस्बीर सौजन्य : प्रधानमन्त्रीको निजी सचिवालय

प्रकाशित : वैशाख ४, २०७५ १०:२५
प्रतिक्रिया
पठाउनुहोस्

बिहेको आश्वासन दिई गर्भवतीको हत्या

कान्तिपुर संवाददाता

सुर्खेत — पञ्चपुरी नगरपालिका–२ सालकोटकी गीता चपार्इं र बराहताल–८ कुनाथरीका सुभाष बोहराबीच एक वर्षअघि साथी (परिवर्तित नाम लक्ष्मी) मार्फत चिनजान हुन पुग्यो । पहिलो भेटमै उनीहरूले मोबाइल नम्बर आदानप्रदान गरे । त्यसपछि बारम्बार फोन सम्पर्क हुन थाल्यो ।

फोनबाटै उनीहरूबीच प्रेम झांगिँदै गयो । अन्तत: एकले अर्कालाई छुट्नै नसक्ने माया बस्यो । दुवैजनाले असार ६ गते सालकोटको पलैटेबजारमा भेट गरे । भेटपछिको फोनमा विवाह गर्ने निष्कर्षमा पुगे, गीता र सुभाष ।

फोन कुराकानी, दुईपटकको भेट तेस्रो पटकसम्म आउँदा शारीरिक सम्पर्कमा परिणत भयो । असारदेखि पुस ४ गतेसम्म पटक–पटकका भेटमा यौनसम्पर्क भयो । बिहेअघि नै गीता गर्भवती हुन पुगिन् । बिहे गर्न सुभाषलाई आग्रह गरिरहिन् । गीताको आग्रहलाई सुभाषले स्वीकार गरेनन् । यदि बिहे नगरे घरमा गएर आत्महत्या गर्ने गीताको धम्कीपछि सुभाष भेट्न बाध्य भए । अन्तिम भेट अर्थात् पुस ४ को राति ९ बजे उनीहरूबीच बिहेकै विषयमा विवाद भयो । विवादपछि बिहे गर्छु भनी आश्वासन दिएर जामुने जंगलमा लगेर गीतालाई भीरबाटै धकेलिदिए । गीताको घटनास्थलमै मृत्यु भयो । गीताको हत्यापछि फरार १९ वर्षीय सुभाषलाई प्रहरीको केन्द्रीय अनुसन्धान ब्युरो (सीआईबी) ले यही चैत २८ गते पक्राउ गर्‍यो । जामुनेमा माघ ९ गते टाउको (कंकाल) फेला पारेको प्रहरीले लामो अनुसन्धानपश्चात अभियुक्तलाई भुम्ती गाउँपालिका–४ काभ्रेबाट पक्राउ गर्‍यो । झन्डै चार महिनापछि पक्राउ परेका सुभाषले गीताको हत्या गरेको स्वीकारे । उनी काभ्रेमा लुकीछिपी मजुदरी गर्दै आएका थिए ।

प्रहरीको प्रारम्भिक अनुसन्धानले मानसिक दबाबमा परी सुभाषले गीताको योजनाबद्ध तरिकाले हत्या गरेको जनाएको छ । ‘दुलही स्वीकारेर घर लैजान हिँडाएका’ उनले योजनाबद्ध रूपमा भीरबाट धकेलेको बताए । जिल्ला प्रहरी प्रमुख (एसपी) उमाप्रसाद चतुर्वेदीले ग्रिनपार्क एकेडेमी, नेपाल राष्ट्रिय प्राथमिक विद्यालय हुँदै जामुने जंगल पुगेका सुभाषले घाँटी थिचिथिची खोल्सामा फालेको बयानबाट खुल्न आएको बताए । ‘गीताको चप्पल र कपालमा लगाउने काँटा भीरमै भेटियो,’ एसपी चतुर्वेदीले भने, ‘टाउको कंकाल मात्रै भेटिएकाले कसरी हत्या भयो ? विस्तृत अनुसन्धान हुनै बाँकी छ ।

गीताको सामसुङ मोबाइलसहित सुभाष भोलिपल्ट पुस ५ गते घर हुँदै वीरेन्द्रनगर आएका थिए । सुरक्षित स्थानको खोजीमा उनी त्यसै दिन वीरेन्द्रनगरबाट काठमाडौं गएको प्रहरी अनुसन्धानले जनायो । कल डिटेलअनुसार फोन र फेसबुक म्यासेन्जरमा भएका कुराकानीको अनुसन्धान गर्दै जाँदा उनी पक्राउ परेका हुन् । ‘कल डिटेल हेर्दा नयाँ नम्बरबाट ३७ सेकेन्ड फोन गरेको पाइयो,’ एसपी चतुर्वेदीले भने, ‘फेसबुक ह्याक गर्दा भेटौंन, केही गर्दिनँ जस्ता कुराकानी भएको छ, हत्या उसैले (सुभाष) नै गरेको पाइयो ।’ प्रहरीले सुभाषमाथि कर्तव्य ज्यान अभियोगमा मुद्दा दर्ता चलाइसकेको छ । प्रहरीले बेवारिसे अवस्थामा टाउकाको कंकाल भेटिएपछि अनुसन्धान थालेको थियो ।

प्रकाशित : वैशाख ४, २०७५ १०:२३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT