प्रधानमन्त्रीलाई चिठी लेख्दै बालबालिका
काठमाडौँ — देशभरिका एक हजार बालबालिकाले आफू पढ्दै गरेको विद्यालयको अवस्था चित्रण गर्दै प्रधानमन्त्रीलाई चिठी लेख्ने भएका छन् । ‘शिक्षाको विश्वव्यापी अभियान’ अनुसार शिक्षाका लागि राष्ट्रिय अभियान (एनसीई), नेपालले यस्तो तयारी गरेको हो । वैशाख ११ बाट सुरु हुने साताव्यापी यो अभियान विश्वभर सञ्चालन हुँदै छ ।
सार्वजनिक विद्यालयहरूमा अध्ययनरत विद्यार्थीले विद्यालय सुधारका निमित्त मागसहित प्रधानमन्त्रीलाई सम्बोधन गरी लेखेको चिठी प्रधानमन्त्रीलाई हस्तान्तरण गरिने अभियानका अध्यक्ष कुमार भट्टराईले पत्रकार सम्मेलनमा बताए । ती पत्र स्थानीय तह र शिक्षा मन्त्रालयमा समेत पुर्याइनेछ ।
संविधानले सुनिश्चित गरेको माध्यमिक तहसम्म नि:शुल्क शिक्षाको अधिकार कार्यान्वयनका निम्ति केन्द्र, प्रदेश र स्थानीय सरकारले आफ्नो कुल बजेटको कम्तीमा २० र कुल गार्हस्थ उत्पादनको कम्तीमा ६ प्रतिशत शिक्षामा लगानी गर्नुपर्ने अभियानको माग छ । सन् २००३ देखि शिक्षाको विश्वव्यापी अभियान (जीसीई) जारी छ ।
प्रकाशित : वैशाख १०, २०७५ ०७:२१
