मोदीको तीर्थाटनः 'आइतबारसम्मै मौसम गडबड हुनसक्ने'
काठमाडौँ — जल तथा मौसम पूर्वानुमान महाशाखाले भारतीय प्रधामन्त्री नरेन्द्र मोदीको दुई दिने नेपाल भ्रमणलाई लिएर बिहीबार विशेष मौसम बुलेटिन सार्वजनिक गरेको छ ।
महाशाखाका बरिष्ठ मौसमविद् बरुण पौडेलले परराष्ट्र मन्त्रालयको आग्रह अनुसार काठमाडौं, जनकपुर, पोखरा र मुस्ताङ (मुक्तिनाथ) को चार दिनको मौसमको भविष्यवाणी गरिएको हो ।
पौडेलका अनुसार शुक्रबार चार वटै स्थानको मौसम बिहीबार भन्दा सफा रहने भए पनि शनिबारदेखि फेरबदल आउने पूर्वानुमान छ । मुक्तिनाथ क्षेत्रमा शुक्रबार र शनिवार मौसममा गडबडी हुनसक्ने महाशाखाको अनुमान छ । ‘बिहान सफाजस्तो देखिए पनि अपरान्हपछि मौसममा गडबडी हुने देखिन्छ,’ उनले भने, ‘हिमाली क्षेत्रमा हिमपात र मध्यपहाडी क्षेत्रमा वर्षा हुने देखिन्छ ।’ महाशाखाले विशेष बुलेटिनमा पनि शुक्रबार र शनिबार अपरान्हपछि हिमपात र वर्षा हुनसक्ने उल्लेख गरेको छ ।
काठमाडौंमा पनि शनिबार अपरान्हपछि मौसममा गडबडी हुने पूर्वानुमान छ । शनिवार काठमाडौं, जनकपुर, पोखरा र मुक्तिनाथमा हावाहुरी, मेघगर्जनसहित वर्षा हुने महाशाखाले उल्लेख गरेको छ । आइतबार पनि मुलुकका धेरै जसो भागमा मौसमी गडबडी हुने पौडेलले बताए ।
प्रकाशित : वैशाख २७, २०७५ १६:५०