कञ्चनजंघा शिखरमा ५ आरोही
ताप्लेजुङ — विश्वको तेस्रो अग्लो शिखर कञ्चनजंघा (८,५८६ मिटर) मा चार वर्षपछि सफल आरोहण भएको छ । बुधबार बेलुका पाँचजनाको टोली चुचुरो पुगेको हो ।
एक्सपिडिसन बेसका प्रथम निर्देशक संखुवासभाका लाक्पा शेर्पा, सोलुखुम्बुका पेम्बा ग्याल्जेन शेर्पा र अस्ट्रेलियाका क्रिश्चिन प्याट्रिसियन बुर्कले सफल आरोहण गरेको एक्सपिडिसन बेसका द्वितीय निर्देशक लाक्पागेलु शेर्पाले बताए । उनका अनुसार बुधबारै सेभेन समिट ग्रुपबाट रसियन नागरिक सेर्गे र जर्मनका थर्वो पनि चुचुरोमा पुगेका छन् । कञ्चनजंघा क्षेत्रमा टेलिफोन सम्पर्क नभएकाले सूचना पाउन कठिन छ । आरोहण दलका सदस्यले बेसक्याम्प फर्किएपछि स्याटलाइटबाट जानकारी गराएका हुन् । उनीहरूले पूर्वी मोहडाबाट आरोहण गरेका थिए ।
गत वर्षको आरोहण प्रयास विफल भएको थियो । त्यसअघिका दुई वर्ष कसैले प्रयासै गरेन । त्यसअघिका दुई वर्ष आरोही लगातार दुर्घटनामा परेका थिए । यस वर्ष करिब चार दर्जन आरोही चुचुरो छुने प्रयासमा छन् । एसियन ट्रेक प्रालिका २१ जना दोस्रो र तेस्रो बेसक्याम्पमा रहेको म्यानेजर सञ्जय बराल काजुले जानकारी दिए । उनीहरूले जेठ ६ र ७ गते आरोहण गर्ने योजना छ । वेल कर्पोरेट इन्डियाको टिम पनि आरोहणको तयारीमा छ । कञ्चनजंघामा यस वर्ष सबैभन्दा ठूलो टोली गएको हो ।
आरोहण टोलीमा भारत, रसिया, सिंगापुर, जापान, स्विस, अस्ट्रेलियालगायत देशका नागरिक छन् ।
मलेसियाली आरोहीको मृत्यु
विराटनगर– सोलुखुम्बुको अमादब्लम हिमाल आरोहण गर्ने क्रममा चिप्लिएर एक मलेसियाली नागरिकको मृत्यु भएको छ । अमादब्लम हिमालको तेस्रो आधारशिविर पुगेका ४३ वर्षीय रमन नैय हाचोडनको लडेर दुई दिनअघि मृत्यु भएको प्रदेश १ प्रहरी कार्यालयले जनाएको छ ।