वरीयता घटाएकोमा खनालको आपत्ति

‘मलाई एकता हुने दिनको सुइँकोसम्म दिइएन’
कान्तिपुर संवाददाता

काठमाडौँ — तत्कालीन एमालेका वरिष्ठ नेता एवं पूर्वप्रधानमन्त्री झलनाथ खनालले आफ्नो अनुपस्थितिमा पार्टीभित्रको वरीयता तलमाथि पारिएको भन्दै आपत्ति जनाएका छन् ।

एमाले र माओवादी केन्द्रबीच एकता हुँदा चीन भ्रमणमा रहेका खनालले आइतबार स्वदेश फर्केलगत्तै अध्यक्ष केपी ओली र नेता माधव नेपालको रवैयाप्रति असन्तुष्टि जनाएका हुन् । एकता प्रक्रियाबाट बनेको नेकपाको वरीयतामा दुई अध्यक्षपछि माधव नेपाललाई राखिएको छ ।

Yamaha

‘म पार्टीको महाधिवेशनबाट वरिष्ठ नेता चयन भएको हो । अहिले म नभएको मौका पारेर मलाई सोध्दा पनि नसोधी वरीयता तलमाथि गरिएको छ, यसमा मेरो आपत्ति छ,’ नेता खनालले भने, ‘यदि यही गर्नु थियो भने पनि मेरो उपस्थितिमा गर्नुपथ्र्यो, मलाई छलेर निर्णय गर्ने ?’

दुई पार्टीबीचको एकता भएकाले सबै नेताको विगतको ‘पोजिसन’ नरहने अन्य नेताले बताउँदै आएका छन् । नेता खनालले भने यही विषय पनि ठोस छलफलबिना टुंग्याइएकाले आफूलाई चित्त नबुझेको बताए । ‘पार्टी एकता भएको छ, म एकताको पक्षमा पहिलेदेखि नै लागेको हुँ,’ खनालले भने, ‘तर मलाई बाइपास गरेर जुन निर्णय भयो, यो कार्यशैलीचाहिँ ठीक भएन ।’

उनले यो विषयमा आफूले पार्टीभित्र कुरा राख्ने बताए । यस्तै प्रवृत्ति नयाँ पार्टीमा पनि बस्यो भने त्यसले समस्या निम्त्याउने खनालको भनाइ थियो ।

पार्टी एकता हुने अघिल्लो दिनसमेत आफूलाई अध्यक्ष ओलीले एकता हुँदै छ भन्ने सुइँकोसम्म नदिएको गुनासो खनालले गरे । ‘पार्टी एकता हुने अघिल्लो दिन हामी युवा संघको एउटा कार्यक्रममा सँगै थियौं । मैले उपचार र एउटा सांस्कृतिक कार्यक्रममा भाग लिन चीन जान लागेको कुरा गरेको थिएँ । त्यसबेला ठीकै छ नि त भन्नुभयो, पार्टी एकता तत्कालै हुन्छ भन्ने कुरा गर्नुभएन,’ उनले भने, ‘एकता घोषणाबारे थाहा भएको भए कार्यक्रम रद्द गर्ने थिएँ ।’

एकता प्रक्रियाका कतिपय निर्णय र छलफल पारदर्शी नभएको उल्लेख गर्दै उनले यो विषयमा अन्य नेताहरूको पनि मन दुखेको बताए । ‘पार्टीका गतिविधि पारदर्शी हुनुपर्छ, अनि मात्र राम्ररी चल्न सक्छ, यो विषयमा सबै नेताहरूले उत्तिकै गम्भीरता देखाउनुपर्छ,’ खनालले भने । उनी चीनको छेन्दुमा आयोजित सांस्कृतिक कार्यक्रममा सहभागी भएर आइतबार फर्केका हुन् ।

Esewa Pasal

प्रकाशित : जेष्ठ ६, २०७५ १९:५९
ADVERTISEMENT
ADVERTISEMENT
प्रतिक्रिया
पठाउनुहोस्

होस्टल र खाजाले नजिकका स्कुल बन्द 

आनन्द गौतम

लेलेप (ताप्लेजुङ) — बालबालिकाका लागि आवासीय सुविधा कति महत्त्वपूर्ण रहेछ भन्ने उदाहरण कञ्चनजंघा आधारभूत विद्यालय घुन्सा भएको छ । यसले आवासीय सुविधासहितको कक्षा सञ्चालन गरेपछि नजिकका ग्याब्ला र फले आधारभूत विद्यालय विद्यार्थीविहीन भएका छन् ।

फोटो: ३१ सय मिटर उचाइमा रहेको ताप्लेजुङको घुन्सा आधारभूत विद्यालय र विद्यालयमा अध्ययनरत विद्यार्थी । तस्बिर : आनन्द

विद्यार्थी नभएपछि गाउँपालिकाले ३ विद्यालयलाई पुस्तक खरिदको रकम दिएको छैन । शिक्षकलाई पनि विद्यार्थी भएको विद्यालयमा सार्ने तयारी भएको छ । गाउँपालिका अध्यक्ष सरोज एभेङका अनुसार ग्याब्ला, फले, याङमा र जनता आधारभूत विद्यालयलाई पुस्तक खरिदका लागि निकासा नदिइएको हो ।

घुन्सामा अहिले ५४ विद्यार्थी रहेको प्रधानाध्यापक लीलाचक्र गुरुङले बताए । ३१ सय मिटरको उचाइमा रहेको यो विद्यालयमा पढ्न फक्तालुङ गाउँपालिकाको केन्द्र तापेथोक, इखावु, लेलेपको तल्लो बस्ती, जौंवारीदेखिका बालबालिका गएका छन् । तिनलाई सदरमुकाम फुङलिङ घर भएका प्रधानाध्यापक गुरुङले विद्यालय जाँदा लिएर जाने र छुट्टी हुँदा पुर्‍याउने व्यवस्था मिलाइदिएका छन् ।

समुदायको चाहना र अहिलेको आवश्यकताअनुसार अंग्रेजी माध्यमको पढाइ पनि सुरु गरेको गुरुङले बताए । गाउँमा १९ जना बालबालिका छन् । बाँकी सबै बाहिरबाट गएका विद्यार्थी हुन् । ४० जनालाई होस्टल सुविधा दिइएको छ । होस्टलमा गाउँका पाँच जना मात्रै बस्छन् । १४ जना घरबाटै धाउँछन् ।

आवासीय सुविधाका लागि हिमालयन डेभलपमेन्ट फाउन्डेसन अस्टेलिया (एचडीएफए) ले सहयोग गरेको छ । उसले प्रतिविद्यार्थी २ हजार सहयोग गरेको छ । अभिभावकले खानाका लागि एक हजार रुपैयाँ बुझाउनुपर्छ । कर्मचारीको व्यवस्थापन विद्यालय र एचडीएफले गरेका छन् । सदरमुकाम फुङलिङबाट खाद्यान्न, तरकारी लानुपर्ने भएकाले खाना महँगो पर्ने गुरुङले बताए ।

सदरमुकामबाट गाडीमा छिरुवासम्म र त्यहाँबाट खच्चडमा बोकाएर लैजानुपर्छ । खच्चड पुग्न दुई दिन लाग्छ । खाद्यान्न प्रतिकिलो ७० रुपैयाँ ढुवानी लाग्ने गुरुङले बताए । यहाँ चामलको खरिद मूल्यभन्दा ढुवानी मूल्य बढी पर्ने गरेको छ ।

आवासीय सुविधापछि चौंरी चराउन जाने हरेक बालबालिका फर्किएको गुरुङ बताउँछन् । ‘म, तत्कालीन शिक्षक खेमराज निरौला, एलएनलगायतले गोठ, गोठमा गएर नानीहरू स्कुल पठाइदिन अनुरोध गर्‍यौं,’ गुरुङले ५ वर्षअघिको स्मरण गर्दै भने, ‘अभिभावकलाई पनि सम्भाउन सकेनौं, विद्यार्थी पनि फकाउन सकेनौं, त्यसको विकल्प सोचेर होस्टल चलाएका सबै विद्यार्थी फर्काउन सफल भयौं ।’

अहिले विद्यालयको प्रभाव क्षेत्रका एक जना पनि स्कुल बाहिर बालबालिका नरहेको विद्यालय व्यवस्थापन समिति अध्यक्ष हिमाली चुङदा बताउँछन् । विद्यालयको शैक्षिकस्तर सुधारमा यहाँ जन्मेर काठमाडाै‌ं बस्दै आएका छवाङ शेर्पा, मिङमा शेर्पा लगायतले सहयोग पुर्‍याउँदं आएको हिमाली बताउँछन् ।
माविमा फर्किए बोर्डिङका विद्यार्थीः
फक्तालुङ गाउँपालिका ६ लेलेपको सरस्वती च्यारिवुक माध्यमिक विद्यालयमा बोर्डिङका विद्यार्थी फर्कन थालेका छन् । सदरमुकाम फुङलिङमा अध्ययनरत १६ जना विद्यार्थी यो वर्ष फर्किएको प्रधानाध्यापक राम तामाङले बताए ।

६ देखि नौ कक्षासम्मका विद्यार्थी फर्किएका हुन् । तामाङका अनुसार गत वर्ष १४ जना फर्किएका थिए । विद्यालयको शैक्षिक सुधारसँगै विद्यार्थी फर्किएको उनले दाबी गरे । तामाङका अनुसार हिमाली यो विद्यालयमा अहिले ४ सय विद्यार्थी अध्ययनरत छन् ।

‘हामीलाई ग्रामीण शिक्षा तथा वातावरण विकास केन्द्र (रिड) नेपालले पनि सहयोग गरिरहेको छ । आफूले पनि विद्यालयको स्रोतसाधनले भ्याएसम्मको प्रयास गरिरहेका छौं,’ तामाङले भने, ‘विद्यार्थीको पढाइमा सुधार आएको छ र विद्यार्थी संख्या पनि उल्लेख्य वृद्धि भएको छ ।’ यसलाई टिकाइराख्न विद्यालयले रचनात्मक भूमिका खेल्ने पनि तामाङले बताए ।

प्रकाशित : जेष्ठ ६, २०७५ १९:३८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT