५ लाखलाई रोजगारी महत्वकांक्षी : पूर्वअर्थमन्त्री पाण्डे
काठमाडौँ — पूर्वअर्थमन्त्री सुरेन्द्र पाण्डेले प्रतिवर्ष ५ लाख जनालाई रोजगारी दिइने भन्ने बजेटको घोषणालाई महत्वकांक्षी भन्दै कार्यान्वयनमा शंका व्यक्त गरेका छन् ।
‘लक्ष्य राम्रो हो, सुन्दा राम्रै लाग्छ । तर कार्यान्वयन पक्ष कत्तिको चित्तबुझ्दो छ भन्ने गहन प्रश्न हो’, सञ्चार केन्द्रले शुक्रबार काठमाडौंमा गरेको कार्यक्रममा पाण्डेले भने–‘बजेट महत्वकांक्षी छ ।’
बजेटले पत्रकारिता क्षेत्रलाई खासै नसमेटेको टिप्पणी गर्दै नेपाल कम्युनिष्ट पार्टीका नेतासमेत रहेका पाण्डेले पत्रकारलाई श्रम ऐन अनुसार सुविधा दिन नसकेकोमा आलोचना समेत गरे ।
प्रधानमन्त्री केपी ओलीका प्रेस सल्लाहकार डा.कुन्दन अर्यालले विकास निर्माणका प्राथमिकताक्रम तोकिएको उल्लेख गर्दै भने–‘हाम्रो स्रोत साधन, सीमितता र आकांक्षाबारे पत्रकारिता जगतले गहिरो विश्लेषण गर्नु जरुरी छ । बजेटमा उल्लेखित विषयलाई सरकारले कार्यान्वयन गर्दै जानेछ ।’
उपभोक्ता अधिकारवादी ज्योति बानियाँले श्रमजीवी वर्गको पक्षमा बजेट नरहेको टिप्पणी गरे ।
