प्याकेजमा समाधान खोज्दै पौडेल पक्ष

भ्रातृसंस्थामा पकड गुम्दै गएपछि सभापति देउवा नेविसंघमा अधिवेशन नगराई तदर्थ समिति बनाउने मनस्थितिमा छन् । पौडेल पक्षले भने अधिवेशनमै जोड दिँदै आएको छ
कुलचन्द्र न्यौपाने

काठमाडौँ — कांग्रेस वरिष्ठ नेता रामचन्द्र पौडेल पक्षले पार्टी सञ्चालनमा सभापति शेरबहादुर देउवाको कार्यशैली परिवर्तनसहित सबै विषय र मुद्दामा प्याकेज समाधान माग गरेको छ ।

प्रमुख प्रतिपक्षी कांग्रेस आन्तरिक कलहमै अलमलिँदा सरकार सर्वसत्तावादी बन्दै गएको भन्दै नेता तथा कार्यकर्ताले दुवै पक्षलाई मिल्न दबाब दिन थालेपछि पौडेल पक्षले यस्तो माग उठाएको हो ।

Yamaha

पौडेल पक्षकै आग्रहमा सभापति देउवाले केही दिनअघि आफ्नै निवासमा पार्टी शीर्ष नेताहरूको बैठक राखेका थिए ।

जसमा वरिष्ठ नेता पौडेल र पूर्वमहामन्त्री कृष्णप्रसाद सिटौला पक्षले सभापतिले पार्टी सञ्चालनमा अपनाउँदै आएको कार्यशैली र पद्धति सच्चिनुपर्ने माग गरेका थिए ।

पार्टी सञ्चालनमा देउवा एकल ढंगबाट अघि बढेको र कतिपय निर्णय विधानविपरीत रहेको भन्दै उनीहरूले बहुमत र अल्पमत नभई पार्टी विधान र सहमतिका आधारमा अघि बढ्नुपर्ने सर्त राखेका छन् ।

संस्थापनइतर पक्षका नेता अर्जुननरसिंह केसीका अनुसार पार्टी सञ्चालनको पद्धतिमा परिवर्तनदेखि विधान मस्यौदा, महासमिति बैठकको तिथि र स्थान, संघीय संरचनाअनुसार प्रदेश, जिल्ला, क्षेत्र, गाउँ, नगर र वडा तहसम्मको अधिवेशन, म्याद सकिएका भ्रातृसंस्थाको अधिवेशन, विभाग र अन्य समिति गठनलगायत विषयमा प्याकेज सहमति मागिएको हो ।

‘यी सबै विषयमा समग्र छिनोफानो होस् भन्ने हाम्रो माग छ,’ केसीले भने, ‘पार्टी सञ्चालन पद्धतिमा वैधानिक, संस्थागत र पारदर्शिता अपनाउनुपर्ने, अल्पमत र बहुमतभन्दा सहमतिका आधारमा अघि बढ्नुपर्ने मुख्य विषय छन् ।’

कम्युनिस्ट सरकारको सर्वसत्तावादी चरित्रविरुद्ध संघर्ष गर्नुपर्ने अवस्था आएकाले नेतृत्वको कमजोरी र त्रुटिबारे लामो विवाद गर्न नखोजिएको उनको भनाइ छ ।

नेता ज्ञानेन्द्रबहादुर कार्कीले पनि पार्टीलाई एकताबद्ध बनाएर संसद् र संसद्बाहिर प्रभावकारी प्रतिपक्षको भूमिका निर्वाह गर्ने दिशामा अघि बढेको बताए ।

‘अहिले जेजस्ता विषयले मतान्तर उत्पन्न गराएका छन्, तिनलाई आन्तरिक रूपमै व्यवस्थापन गरेर अघि बढ्ने जमर्को भइरहेको छ,’ उनले भने, ‘कम्युनिस्ट सरकारको सर्वसत्तावादी चरित्रविरुद्ध जुध्न पार्टी ठीक हुनुपर्छ भन्ने महसुस सबैमा भएको छ ।’

कार्यकाल सकिएका सबै भ्रातृसंस्था र प्रदेशसहित पार्टीका तल्ला निकायमा अधिवेशन गराउने विषयमा सभापति देउवा सकारात्मक छैनन् । भ्रातृसंस्थामध्ये नेविसंघको वर्तमान कार्यसमितिको कार्यकाल पूरा हुन लाग्दासमेत अधिवेशन तयारी अघि बढाइएको छैन । यसैकारण नेविसंघ संस्थापन र इतर पक्षबीच समानान्तर रूपमा सञ्चालन हुँदै आएको छ ।

उक्त संगठनलाई दुवै पक्ष आफ्नातिर ल्याउने कसरतमा छन् । एकपछि अर्को भ्रातृसंस्थामा पकड गुम्दै गएपछि देउवा नेविसंघमा अधिवेशन नगराई तदर्थ समिति बनाउने मनस्थितिमा छन् ।

उनी प्रदेश र त्यस तलका सबै पार्टी संरचना तदर्थ समितिबाट सञ्चालन गर्ने तयारीमा छन् । पौडेल पक्ष भने नेविसंघ र तल्ला निकायमा अधिवेशन गराउनुपर्ने पक्षमा छ ।

केसीले पहिलो बैठकमा सबै विषयमा छलफल भए पनि ठोस निष्कर्ष नआएको बताए । ‘समग्रमा सबै विषयमा सहमति खोजौं भन्ने विषयले प्रवेश पाएको छ तर ठोस कुराकानी भएको छैन,’ उनले भने, ‘फेरि बैठक बस्ने कुरा भएको हो तर सभापतिले अहिलेसम्म बोलाउनुभएन ।’

प्याकेजमै सहमति खोज्ने पौडेल पक्षको प्रस्तावका कारण विधान संशोधन तथा परिमार्जन समिति गठनमा समेत ढिलाइ भएको छ । संघीय संरचनाअनुसार पार्टी रूपान्तरण गर्न विधान संशोधन गर्नुपर्ने हुन्छ ।

त्यसका लागि महामन्त्रीमध्येबाट एकलाई संयोजक तोकेर समिति बनाउने तयारी भए पनि पौडेल पक्षले सदस्यको नाम नदिएका कारण गठन हुन नसकेको संस्थापन पक्षीय एक पदाधिकारीले बताए ।

Esewa Pasal

प्रकाशित : असार २३, २०७५ १९:५२
प्रतिक्रिया
पठाउनुहोस्
ADVERTISEMENT

कांग्रेस 'प्रोगेसिभ एलायन्स' नजिक भएपछि पार्टीभित्र तीव्र असन्तुष्टि

संस्थापन इतर पक्षले कार्यक्रम बहिष्कार गर्ने  
कुलचन्द्र न्यौपाने

काठमाडौँ — कांग्रेस सभापति शेरबहादुर देउवाले पार्टीलाई ६ दशकदेखिको ‘सोसलिष्ट इन्टरनेशनल’ प्रतिको आबद्धता छाडेर ५ वर्ष अघि स्थापित ‘प्रोगेसिभ एलायन्स’ मा सरिक गराउन लागेको प्रति संस्थापन इतर पक्ष आक्रोशित भएको छ ।

कांग्रेस वरिष्ठ नेता रामचन्द्र पौडेल, महामन्त्री सशांक कोइराला, पूर्वमहामन्त्रीद्वय प्रकाशमान सिंह, कृष्णप्रसाद सिटौला, अर्जुननरसिंह केसीलगायतका नेताहरु देउवाको एकल कार्यशैलीप्रति आक्रोशित भएका हुन्। यस विषयमा संस्थापन इतर पक्षको मंगलबार बेलुका अनौपचारिक बैठक बसेको थियो।

प्रोगेसिफ एलालान्समा आबद्ध हुनेबारे पार्टीभित्र छलफल नै नभएको वरिष्ठ नेता पौडेलले बताए। ‘देउवाको यो कार्यशैलीले पार्टीलाई कहाँ पुर्‍याउन खोजिएको हो? प्रश्न गर्दै पौडेलले कान्तिपुरसँग भने, ‘सोसलिष्ट इन्टरनेशनलमा रहेर बीपी कोइरालाले अन्तर्राष्ट्रिय रुपमा समाजवादी नेताको रुपमा आफू र पार्टीलाई चिनाउनु भएको हो, ६ दशकपछि अहिले सोही संस्था छाड्ने जस्तो गम्भीर कुरा के हुन सक्छ?’

उनले राजधानीको हिमालयन होटलमा शुक्रबार र शनिबार हुन लागेको एलायन्सको कार्यक्रममा संस्थापन इतरका कुनै पनि नेता सहभागी नहुने बताए।

संस्थापन इतर पक्षले शुक्रबार विज्ञप्ति जारी गर्दै कांग्रेसले एलायन्सको कार्यक्रम राजधानीमा गर्न लागेकोप्रति आश्चर्य प्रकट गर्दै भर्त्सना गरेको हो। ‘२०१७ सालदेखि नेपाली कांग्रेस आबद्ध भएको सोशलिस्ट इन्टरनेशनलको समानान्तर विकल्पको रुपमा स्थापित प्रोग्रेसिभ एलायन्समा संलग्न हुनु र त्यसको संयोजन गर्नु दु:खद् विषय हो’ संस्थापन इतर पक्षबाट जारी विज्ञप्तिमा भनिएको छ, ‘यसबारे न त पार्टीमा कहिल्यै विचार विमर्श भयो न आधिकारिक रुपमा जानकारी नै दिइयो।’

संस्थापन पक्षकै कतिपय नेताहरुले यस्तो निर्णयप्रति असन्तुष्ट प्रकट गरेका छन्। संस्थापन इतर पक्ष र आफ्नै समूहका नेताहरुको समेत चर्को असन्तुष्टि भएपछि सभापति देउवा समेत शुक्रबार एलायन्सको कार्यक्रममा सहभागी नहुने भएका छन्।

उपसभापति विमलेन्द्र निधि, महामन्त्री पूर्णबहादुर खड्का, पूर्वअर्थमन्त्री ज्ञानेन्द्रबहादुर कार्कीसहितका नेतालाई वक्ताको रुपमा आमन्त्रण गरिएपनि सहभागी नहुने भएका छन्। देउवाले पार्टीका तर्फबाट सहमहामन्त्री प्रकाशशरण महतलाई कार्यक्रममा पठाउने तयारी गरेका छन्।

संस्थापन इतर पक्षले सभापति देउवा र उनका केही सहयोगीको निजी स्वार्थका कारण प्रोगेसिभ एलायन्समा पार्टीलाई सरिक गराउने कार्य भएको बताएका छन्। वि.सं. २०१४ मा नेपाली कांग्रेसको आयोजनामा एशियाली समाजवादी सम्मेलन काठमाडौंमा सुसम्पन्न भएको थियो।

'वि.स. २०१० देखि नै बीपी कोइरालाको नेतृत्वमा बर्माको याङ्गुन, मुम्बै, टोकियो आदि एशियाली सहरमा र सोशलिस्ट इन्टरनेशनलका हरेक विश्व सम्मेलनमा प्रतिबद्धताका साथ सहभागिता राख्दै आएको छ' संस्थापन इतर पक्षको विज्ञप्तिमा भनिएको छ, 'तर आज अनायास सोशलिस्ट इन्टरनेशनलको समानान्तर संस्थासँग गाँसिनुको औचित्य के हो? कांग्रेसको केन्द्रीय कार्यसमितिमा बिना कुनै निर्णय हठात यस्तो गम्भीर निर्णय लिनु औचित्यहीन मात्र होइन, घोर अलोकतान्त्रिक र स्वेच्छाचारी प्रवृत्ति पनि हो।'

संस्थापन इतर पक्षले सभापति देउवाको स्वेच्छाचारी तरिकाले लिइएको निर्णयप्रति गम्भीर आपत्ति प्रकट गर्दै प्रोग्रेसिभ एलाइन्सका नामबाट हुन लागेको सभामा सहभागी नहुने घोषणा समेत गरेको छ। ‘सोशलिस्ट इन्टरनेशनलमा नेपाली कांग्रेसको सदस्यता र सक्रियता यथावत् राख्न पनि हामी आग्रह गर्दछौँ’ विज्ञप्तिमा भनिएको छ।

प्रकाशित : असार १३, २०७५ १४:२३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT