मुस्ताङ टिपर दुर्घटना : १४ शव पठाइयो

भीम घिमिरे

पोखरा — मुस्ताङमा भएको टिपर दुर्घटनामा दिवंगत २० मध्ये १४ जनाको शव अन्तिम संस्कारका लागि शनिबार पोखराबाट हेलिकप्टरमा काठमाडौं, दाङ र रोल्पा पठाइएको छ । 

मजदुर बोकेको टिपर शुक्रबार उपल्लो मुस्ताङको लो घ्याकर दामोदरकुण्ड गाउँपालिका–३ को स्याङ्बोचेमा दुर्घटनाग्रस्त भएको थियो । घटनामा १२ जना घाइते छन् । घाइते सबैलाई शुक्रबारै पोखराको मनिपाल अस्पताल ल्याइएको थियो । मृत्यु हुनेमा रोल्पाका ९, दाङका ६ र धादिङ, ओखलढुंगा, कैलाली, कपिलवस्तु र स्याङ्जाका १/१ जना छन् ।

Yamaha

शनिबार पोखरा विमानस्थल आइपुगेका दिवंगतका आफन्तबीच रुवाबासी चलेको थियो । बिरुवा कन्स्ट्रक्सन प्रालिको बा२क २२१९ नम्बर टिपरका चालक धादिङका सुजन घलान र ओखलढुंगाको चम्पादेवी गापा–२ का २० वर्षीय जीवन माझीको शव काठमाडौं पठाइएको प्रहरीले जनाएको छ । रोल्पाका विभिन्न स्थान घर भएकाहरूको शव लिवाङ र दाङका ६ जनाको शव लमही पठाइएको छ । आफन्त आइपुगेका र नजिकका भेला भएका ६ जनाको शव शनिबार पश्चिमाञ्चल क्षेत्रीय अस्पतालको शवगृहमा राखिएको प्रदेश प्रहरी कार्यालयले जनाएको छ ।

यसैबीच मनिपाल अस्पतालमा उपचार भइरहेका घाइतेलाई शनिबार गण्डकी प्रदेशका मुख्यमन्त्री पृथ्वीसुब्बा गुरुङ, प्रमुख सचिव नारायणप्रसाद बिडारी र प्रदेश प्रहरी प्रमुख दानसिंह बोहोरा लगायतले भेटेका छन् । उनीहरूले घाइतेको अवस्था र उपचारका विषयमा स्वास्थ्यकर्मीसँग जानकारी लिएका थिए । यसअघि मुस्ताङका प्रदेश सांसद र केही नेताहरू शुक्रबार साँझ पोखरा विमानस्थल ल्याइएका घाइतेलाई अस्पताल पुर्‍याउन पनि खटिएका थिए । घाइतेमध्ये दुई जनाको अवस्था गम्भीर र अन्यको सुधारोन्मुख रहेको प्रहरीले जनाएको छ ।

ट्रेड युनियन कास्कीले शनिबार विज्ञप्ति जारी गर्दै घाइतेको उपचारमा सघाउन स्वास्थ्यकर्मी संघको ध्यानाकर्षण गराएको छ । जिल्ला अध्यक्ष विजयराज भण्डारीले घाइतेको उपचार र पीडितलाई क्षतिपूर्ति दिलाउन सरकारसँग माग गरेका छन् ।

Esewa Pasal

प्रकाशित : असार २३, २०७५ २१:३३
ADVERTISEMENT
प्रतिक्रिया
पठाउनुहोस्

पोखरामा चरा महोत्सवको तयारी 

भीम घिमिरे

पोखरा — पर्यटकीय नगरी पोखरामा चरा महोत्सव हुने भएको छ । आयोजक पोखरा पंछी समाजले सोमबार पत्रकार सम्मेलन गर्दै तीन दिने महोत्सव चरा पर्यटन प्रवर्द्धनका लागि हुन लागेको जनाएको छ । 

नौवटा ताल, जंगल र पहाडी भूगोल भएको पोखरा महानगर विभिन्न प्रजातिका चराको वासस्थान र फिरन्ते प्रजातिका चराका लागि अन्यत्र जान ‘ट्रान्जिट प्वाइन्ट’ भएको समाजका महासचिव हेमन्त ढकालले बताए ।

आगामी मंगलबारदेखि हुने महोत्सवमा टुर गाइडका लागि चरा चिनाउने तालिम, विद्यार्थीलाई चरा सम्बन्धी जानकारी र संरक्षणको क्षेत्रमा क्रियाशील तथा जानकारहरूकाबीच अन्तरक्रिया गरिने भएको छ । नेपालमा हालसम्म ८ सय ८७ प्रजातिका चरा पाइएको रेकर्ड छ ।

यीनमा पोखरा उपत्यकामा ४ सय ६३ प्रजाति पाइने रेकर्ड भएको महासचिव ढकालले बताए । ‘नेपालमै मात्रै पाइने चरा काँडे भ्याकुर पोखरा उपत्यकाका विभिन्न स्थानमा सजिलै हेर्न सकिन्छ,’ उनले भने, ‘नेपालमा रेकर्ड भएका गिद्धका नौ प्रजातिमध्ये आठ प्रजाति पोखरा उपत्यकामा देखिएका छन् ।’

रामसारमा सूचीकृत तालको अवस्था र यिनमा चराको अवस्थाबारे महोत्सवमा छलफल हुने जानकारी उनले दिए । ‘हामीकहाँ पाइएका चरामा पनि ३२ प्रजाति संकटापन्न छन्,’ उनले भने, ‘नेपालमा चरा हेर्नकै लागि पनि पर्यटक आउन थालेको सन्दर्भमा अब हामीले चराको पहिचान र संरक्षणमा बहस आवश्यक छ भनेर महोत्सव आयोजना गरेका हौँ ।’

हिमाली भेगबाट जाडो छल्न र तराइबाट गर्मी छल्न पोखरा आइपुग्ने चराका प्रजाति र अवस्थाका विषयमा महोत्सवमा संरक्षणकर्मीबीच छलफल हुने उनले बताए ।

रुसबाट लामो दूरी तय गर्दै पोखराको आकाश भएर भारत जाने चीलका प्रजातिको झुण्डलाई विभिन्न समय विदेशी संरक्षणकर्मीले गणना गरेपनि त्यसले निरन्तरता पाउन सकेको छैन ।

‘हामी सबै प्रकारका चराका प्रजातिको अवस्था र स्थितिबारे अध्ययन र संरक्षणको चासो बढोस् भन्ने पक्षमा छौँ,’ समाजका अध्यक्ष मनशान्त घिमिरेले भने, ‘फिरन्ते चराको अवस्था अध्ययन हुन सक्यो भने पनि चरा हेर्न रुचाउनेलाई पर्यटनसँग जोड्न सक्छौँ ।’ समाजले प्रत्येक साता विदाका दिन चरा हेर्ने यात्राको आयोजना गर्दै आएको उनले बताए ।

महोत्सव आयोजनामा नेपाल पर्यटन बोर्डसँगै पर्यावरण र पशुपंछीका लागि क्रियाशील संघसंस्थाले सघाएका छन् ।

‘हाम्रा लागि यो सुरुवात हो,’ पर्यटन बोर्ड पोखरा कार्यालय प्रमुख सूर्य थपलियाले भने, ‘यो महोत्सवसँगै हामीले पोखरा उपत्यका र आसपासको क्षेत्रमा चराको अवस्थाबारे जानकारी पाउँछौँ ।’

कार्यक्रम आयोजनाको क्यालेण्डरमा परेर पनि वर्षायाममा आइपुगेको पहिलो महोत्सवले आगामी वर्ष परिष्कृत कार्यक्रम आयोजनाका लागि आधार तयार पार्ने उनले बताए ।

प्रकाशित : असार १७, २०७५ १४:४६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT