महाकालीमा पानीको बहाव बढ्यो, बनबसा पुलमा ठूला गाडी आउजाउ बन्द

महाकालीमा बाढी आएपछि बनबसा पुलमा चारपांग्रे सवारी साधन आवागमनमा पनि रोक लगाइएको छ । बुधबार दिउँसो २ बजेबाट पुलमा ठूला सवारी साधन आवागमनमा रोक लगाइएको ईलाका प्रहरी कार्यालय गड्डाचौकीका सई डिकरदेव पन्तले बताए । उनका अनुसार ४ बजे गरिएको मापनअनुसार महाकालीमा पानीको बहाव २ लाख १५ हजार क्युसेक पुगेको छ ।

यो सिजनमा दोस्रो पटक पुलमा ठूला सवारी आवागमनमा रोक लगाइएको हो । गतसाता महाकालीमा बाढी आएका बेला पानीको बहाव १ लाख ४५ हजार क्युसेक पुगेको थियो । त्यतिबेला दुई दिन ठूला सवारी साधन आउजाउ बन्द गरिएको हो ।

‘जनप्रतिनिधि र सुरक्षाकर्मी मिलेर नदी तटिय क्षेत्रका बासिन्दालाई सतर्क रहन आग्रह गरेका छौं’ उनले भने, ‘डडेलधुराको परिगाउँमा बाढी जोखिमको तह भन्दा धेरै माथि पुगेकाले बुधबार साँझसम्म अझै बढ्न सक्ने देखिन्छ ।’