औलो नियन्त्रणबाहिर

दुवै टोलीले औषधि उपचार र लामखुट्टे नियन्त्रण गरे पनि साउनमा फेरि २४ जनालाई औलो संक्रमण भएको जिल्ला स्वास्थ्यले जनाएको छ । राम्ररी औषधि सेवन नगरेका कारण औलोको लक्षण पुन: देखिएको जिल्ला स्वास्थ्य कार्यालयका सूचना अधिकारी बलीबहादुर बुढाले बताए । ३८ बिरामी सन्चो भए पनि साउनमा २४ जनामा संक्रमण देखिएको उनको भनाइ छ । उनीहरूको उपचार भइरहेको बुढाले जनाए । ‘दैनिक स्वास्थ्यकर्मीको टोलीले घरमै पुगेर उपचार गरिरहेको छ,’ उनले भने, ‘अहिले स्वास्थ्यकर्मीको निगरानीमा बिरामीलाई औषधि खुवाउन थालिएको छ ।’

औलो नियन्त्रण भएको भन्दै टोली काठमाडौं फर्किए पनि रोग फेरि देखिएको हो । रोगका कारण स्थानीय बासिन्दा खेती र ज्याला मजदुरीको काम गर्न पाएका छैनन् । रोग सर्ने डरले विवाहिता छोरीचेली माइत आउन छाडेको स्थानीयको भनाइ छ । स्वास्थ्य मन्त्रालयले मुगुलाई औलो रोगको उच्च जोखिमयुक्त क्षेत्रमा राखेको छ ।

लामखुट्टेको टोकाइबाट मुक्ति पाउन प्रत्येक घरमा झुल वितरण गरिएको छ । तराईको औलो हिमाली जिल्लामा उक्लिएपछि रोग नियन्त्रणमा कठिनाइ भएको चिकित्सकले जनाएका छन् । रोगबाट बालबालिका बढी प्रभावित छन् ।

पढाइ पनि प्रभावित बनेको छ । स्थानीयले गाउँमै औलो नियन्त्रण हेल्थ डेक्स स्थापनाको माग गरेका छन् । स्थानीय नवराज जैसीले पटक–पटक औलो फैलँदा सर्वसाधारण त्रसित भएको बताए । जिल्ला स्वास्थ्य कार्यालयले रातापानी सुकाढिक स्वास्थ्यचौकीबाट स्वास्थ्यकर्मी खटाइएको जनाएको छ ।