अफवाह फैलाएको आरोपमा अनलाईन सञ्चालक पक्राउ
काठमाडौँ — कञ्चनपुरमा भएको बलत्कार घटनाको सम्बन्धमा झूटो खबर फैलाएको आरोपमा प्रहरीको केन्द्रीय अनुसन्धान ब्युरोले एक अनलाईनका अध्यक्षलाई पक्राउ गरेको छ ।
ब्युरोले आरएमखबर डटकमकी अध्यक्ष एवं प्रबन्ध निर्देशक प्राप्ती सापकोटा पौडेललाई पक्राउ गरी विद्युतीय कारोबार ऐन अन्तर्गत कारबाहीको प्रक्रिया अगाडि बढाएको हो ।
यीनै हुन १४ वर्षिय बालिका बलत्कारमा संग्लन भन्दै एक प्रहरीको तस्बिरसहितको सामाग्री उक्त अनलाईनमार्फत फैलिएको निष्कर्ष ब्युरोले निकालेको हो ।
बलत्कार जस्तो संवेदनशिल घटनबारे अफवाह फैलाएको आरोपमा ब्युरोले बालाजुबाट सापकोटालाई पक्राउ गरेको हो ।
ब्युरोका अनुसार केही दिनअघि भएको बलत्कारको घटना गराउने यीनै प्रहरी हुन् भनेर एक प्रहरीको तस्बिरसहितको सुचना सामाजिक सञ्जालमा भाईरल भएपछि प्रहरीले यस्तो सुचना कहाँबाट फैलियो भनेर खोजी सुरु गरेको थियो ।
यही क्रममा सापकोटा पक्राउ परेकी हुन् । ब्युरोले उक्त अनलाईन प्रेस काउन्सिलमा समेत दर्ता नभएको बताएको छ ।
प्रकाशित : श्रावण १६, २०७५ १८:४४
