किशोरी हत्या प्रकरण: प्रहरी दबाबमा दाहसंस्कार

चित्रांग थापा, भवानी भट्ट

कञ्चनपुर — महेन्द्रनगर बजारको व्यस्त चोकमा एक किशोरीको तस्बिर टाँगिएको छ, ‘हार्दिक श्रद्धाञ्जली’ लेखेर । हत्यारालाई कारबाही माग गर्दै श्रद्धाञ्जली प्रकट गर्नेको घुइँचो लागिरहेको छ ।

प्रतिकात्मक तस्बिर

गत बिहीबार साथीको घरमा पढ्न गएकी किशोरी एकाएक बेपत्ता भइन् । अर्को दिन एक किलोमिटर टाढाको उखुबारीमा मृत भेटिइन् ।


बलात्कारपछि हत्या भएको भन्दै महेन्द्रनगरका स्थानीय आन्दोलित छन् । तनाव साम्य हुन सकेको छैन । ‘हाम्रो केही ठूलो र पूरा गर्नै नसकिने माग छैन,’ किशोरीका बुबाले भने, ‘छोरीको हत्यारा को हो, पहिचान गरी कडा कारबाही गरियोस् ।’ शव भेटिएपछि स्थानीयले हत्यारा पत्ता लगाउनुपर्ने भन्दै आन्दोलन थाले । तीन दिनसम्म शव अस्पतालमै रह्यो ।

Yamaha


पीडित परिवार र स्थानीयले अपराधी पत्ता नलागेसम्म दाहसंस्कार नगर्ने अडान लिएका थिए तर प्रहरीको दबाबमा परिवारले सोमबार दाहसंस्कार गरेका छन् ।


उनको हत्या अघिल्लो बिहीबार राति भएको प्रहरी अनुमान छ । शव शुक्रबार फेला परेको थियो । दोषीलाई कारबाही माग गर्दै महिला आन्दोलनमा उत्रिएका छन् । प्रहरीसँगको झडपमा केही घाइते भएका छन् ।


‘प्रहरीले आन्दोलनका कारण अनुसन्धानमा कठिनाइ आएको भन्दै शव उठाउन दबाब दिन थाल्यो,’ किशोरीका बुबाले भने, ‘कफ्र्यु लाग्न सक्ने चेतावनी दिएपछि शव बुझ्न सहमत भएँ ।’ एक्लै सहमति गरेको भन्दै स्थानीय रिसाएर मलामीसम्म नगएको उनको गुनासो छ ।


छोरी हराएको खबर गर्दा प्रहरीले ‘भोलि खोजौंला’ भनेर आलटाल गरेकाले परिवार थप पीडामा छ । ‘मैले छोरीको साथीको घरमा सोध्दा उल्टै मलाई घरबेटीले धम्क्याइन्, एक्लै घरभित्र जान सकिनँ,’ मृतक किशोरीकी आमाले भनिन्, ‘प्रहरीलाई सँगै गइदिन भनेको थिएँ । भोलि हेरौंला भन्दै टारे ।’


किशोरीकी आमाको घरमै चटपटे पसल छ । उनले त्यसैको कमाइले परिवारको गुजारा चलाउँदै आएकी थिइन् । घटनाको दिन उनी पसलको सामान ल्याउन सीमावर्ती वनबसा बजार गएकी थिइन् । किशोरीका बुबा पनि महेन्द्रनगर बजारमा पानीपुरी बेच्छन् । घटनाको दिन उनी उपचारका लागि भारतको इलाहाबाद गएका थिए ।


खबर सुनेकै दिन घर फर्किए । भीमदत्त नगरपालिका–२ का वडाध्यक्ष डम्बर कार्कीले किशोरीको स्मृतिमा चिल्ड्रेन पार्क बनाउने प्रतिबद्धता जनाएका छन् । पीडित परिवारलाई भने पहिला न्याय चाहिएको छ । छोरीको हत्यारा पत्ता लागे मात्र उनीप्रतिको सच्चा श्रद्धाञ्जली ठहरिने उनीहरू बताउँछन् ।


कहाँ पुग्यो अनुसन्धान ?
किशोरी हत्याको ८ दिन बितिसकेको छ । प्रहरीले घटना अनुसन्धान भइरहेको जनाएको छ । जिल्ला प्रहरी प्रमुख एसपी दिल्लीराज विष्टले अनुसन्धान अपराधी नजिक–नजिक पुगिसकेको बताए । ‘सीआईबीको टोलीले सूक्ष्म अनुसन्धान गरिरहेको छ । हामी अपराधीनजिक पुगिसकेका छौं,’ उनले भने ।


अनुसन्धान क्रममा ६ जनालाई सोधपुछका लागि नियन्त्रणमा लिइएको उनले जानकारी दिए ।


गत आइतबार प्रहरीको केन्द्रीय अनुसन्धान ब्युरो (सीआईबी) का डीएसपी अंगुर जीसीको नेतृत्वमा आएको टोलीले अनुसन्धान गरिरहेको छ । उक्त टोली अझै केही दिन यहीं रहने एसपी विष्टले बताए ।


अनुसन्धानमा संलग्न एक प्रहरी अधिकृतका अनुसार हालसम्म शंकास्पद व्यक्तिलाई झिकाएर केरकार गर्ने काम मात्र भएको छ, वास्तविक अपराधीनजिक प्रहरी अनुसन्धान पुग्नै सकेको छैन । ‘जिल्ला प्रहरी र केन्द्रीय अनुसन्धान ब्युरोका ३ जनासमेत १० जनाको टोली अनुसन्धानमा खटिएको छ,’ उनले भने, ‘बिहीबार बिहानसम्म पनि अपराधी पत्ता लाग्न
सकेको छैन ।’


किशोरीको बलात्कारपछि घाँटी थिचेर हत्या भएको दाबी प्रहरीको छ । पोस्टमार्टम रिपोर्ट भने आइसकेको छैन । ‘घटना कुनै एक व्यक्ति वा समूहले गरेको हो भन्ने निक्र्योल गर्न मृतकको भिसेरालगायत परीक्षणका लागि काठमाडांै पठाइएको छ । रिपोर्ट प्राप्त भएपछि धेरै कुरा खुल्नेछ,’ उनले भने । प्रदेशसभा र संघीय संसद्मा समेत अपराधीलाई तत्काल कानुनी कठघरामा ल्याई हदैसम्म सजाय गरिनुपर्ने माग उठेको थियो ।

प्रकाशित : श्रावण १८, २०७५ ०७:०१
ADVERTISEMENT
प्रतिक्रिया
पठाउनुहोस्
ADVERTISEMENT

सीमा आउजाउ तथ्यांक छैन

चित्रांग थापा, भवानी भट्ट

धनगढी/कञ्चनपुर — धनगढीको मोहना नदीपारिको भारतीय बजार गौरीफन्टा केही वर्षअघिसम्म निकै गुल्जार हुन्थ्यो । सुदूरपश्चिम क्षेत्रका बासिन्दाको घरायसी प्रयोजनका सामान किनमेल गर्ने गौरीफन्टा प्रमुख बजार थियो ।

धनगढीको सीमावर्ती बजार गौरीफन्टबाट किनमेल गरी फर्कंदै स्थानीय । तस्बिर : चित्रांग थापा । कान्तिपुर

दुदुवा नेसनल पार्कका कारण हाल बजार विस्थापित भइसकेको भए पनि नेपाल र भारत सीमावर्ती क्षेत्रका नागरिक आउ– जाउ गर्न धनगढीको त्रिनगर र गौरीफन्टा नाकाको चहलपहल भने घटेको छैन ।

बिहानै जब गौरीफन्टा स्टेसनमा भारतका विभिन्न सहरबाट बसहरू पुग्न थाल्छन्, सुनसान गौरीफन्टामा पनि चहलपहल बढ्न थाल्छ । यता धनगढी हुँदै भारतका विभिन्न सहर पस्ने नेपाली पनि बस छोप्न हतारिंदै सीमापारि पुग्छन् । किनमेल, औषधि उपचार, घुमफिर र तीर्थयात्रामा निस्कनेदेखि कामको खोजीमा भारत पस्नेहरूका लागि कञ्चनपुरको सीमावर्ती पहिलो बजार बनवासाजस्तै गौरीफन्टा सुदूर र मध्यपश्चिम नेपालका बासिन्दाको पायक पर्ने नाकाका रूपमा छ ।

‘सीमामा आउ जाउ गर्न खासै समस्या छैन,’ धनगढीको एलएन चोकमा किरानाको व्यापार गरिरहेका भारतीय मूलका व्यवसायी राजु गुप्ता भन्छन्, ‘गौरीफन्टा बजार विस्थापित भइसकेको भए पनि भारतका जुनसुकै सहर पस्न गौरीफन्टा पुग्नैपर्ने हुँदा यहाँको नाकामा पहिलेजस्तै रौनक छ ।’

कञ्चनपुरको सिमानाका बनवासा पनि दुवै देशका नागरिक नेपाल भारतीय क्षेत्रमा आउजाउ गर्ने प्रमुख नाकाका रूपमा छ । गौरीफन्टा नाका धनगढी बजारबाट ३ किमिमा छ । बनवासा अलि टाढा १३ किमि टाढा छ । यी दुवै नाका भएर ओहोरदोहोर गर्नेहरू सबैभन्दा ठूलो चेकजाँचमा सास्ती हुने बताउँछन् ।

कञ्चनपुरको बनवासा भएर आउजाउ गर्न पुलकै कारण पनि समस्या छ । पुल बन्द भएको अवस्थामा सार्वजनिक चारपांग्रै सवारीसाधन चलाउन पाइँदैन । चेक जाँच पनि थरीथरीका सुरक्षाकर्मीबाट हुने गरेको छ । उत्तराखण्ड पुलिसदेखि पुलको सुरक्षार्थ खटिएको केन्द्रीय औद्योगिक पुलिस, कस्टम र एसएसबीले झिटीगुन्टा खोल्न लगाएर हैरान पार्ने गरेको यात्रुहरू बताउँछन् ।

नेपाली सीमास्थित माइती नेपाल लगायतका केहि संघसंस्थाले भारततर्फ जानेहरूको सामान्य निगरानी गर्ने, शंका लागेका महिलालाई बोलाएर सोधपुछ गर्छन् । भारत जान कुनै समस्या देखिंदैन । सीमामा तैनाथ सुरक्षाकर्मीसँग एक दिनमा कति नेपाली भारत गए कति भारतीय नेपाल आए भन्ने कुनै रेकर्ड राखिने गरेको छैन । ‘दैनिक ३०/४० गाडी मा भारतीयहरू किनमेल र घुमफिरका लागि धनगढी आउने गरेका छन्,’ धनगढीको त्रिनगर भन्सार नाकास्थित प्रहरी चौकीका असइ राजेन्द्रसिंह पुजाराले भने। त्यस्तै यहाँका स्थानीयदेखि पहाडी जिल्लाबाट समेत नेपालीहरू ठूलो संख्यामा दिनहँु रोजगारीदेखि किनमेल र घुमफिर तथा उपचारका लागि भारत जाने गरेका छन् ।’ धनगढीका व्यवसायी राजु गुप्ताका अनुसार भारतबाट हरेक दिन नेपाल भित्रिनेहरूमा दैनिक रोजगारीमा काम गर्ने मजदुर बढेका छन् ।

कैलाली र कञ्चनपुरका विभिन्न सीमानाकाबाट दुवै देशका नागरिकहरू बिनारोकटोक आउजाउ गरिरहेका हुन्छन् । कञ्चनपुरको मुख्य नाका गड्डा चौकीसँगै ब्रह्मदेव, दोधारा, बेलौरी र पुनर्बासबाट दुवै देशका सीमावर्ती क्षेत्रका बासिन्दाको निर्बाध आवतजावत हुने गरेको छ ।

कैलालीको धनगढीको त्रिनगर नाका, टीकापुरको खक्रौला र लालबोझी नाका भएर वर्षौंदेखि दुवै देशका नागरिकहरू सीमा क्षेत्रका बजारमा आउजाउ गर्दै आएका छन् । नेपाल र भारततर्फ दिनहुँ आउ–जाउ गर्नेहरूको संख्या तथा कुन प्रयोजनका लागि जान लागेका हुन् भन्नेबारे दुवै देशका सम्बन्धित निकायले कुनै रेकर्ड राख्ने गरेको छैन । भारतबाट नेपाल भित्रिँदा नेपाली भन्सार र प्रहरीले सवारी साधनको रेकर्ड राख्ने गरेको छ । सीमामा तैनाथ भारतीय सुरक्षा बल एसएसबीले पनि सवारी साधनको रेकर्ड राख्ने गरेको छ ।

नेपाली सवारी साधन लिएर सीमापारिको पहिलो स्टेसनसम्म मात्र जान पाउँछन् । टाढा जानुपरे भारतीय दूतावासको परमिट आवश्यक हुन्छ । तर, भारतीय सवारी साधन भने सीमाक्षेत्रको पहिलो सहरभन्दा टाढा जानुपरे भन्सार नाकामै प्रतिदिनका हिसाबले रकम तिरेर नेपाल भित्रिने र यातायात कार्यालयबाट स्वीकृति लिएर नेपालभित्र जहाँसुकै जान पाउने व्यवस्था छ ।

प्रकाशित : श्रावण ७, २०७५ १०:५५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT