अछाममा अटो रिक्सा

मेनुका ढुंगाना

अछाम — तुर्माखाद गाउँपालिका–३ भैरवस्थानका ३४ वर्षीय चन्द्रबहादुर बुढा जिल्लामै अटो रिक्सा चलाउन थालेका छन् । उनको अटो रिक्साले स्थानीयलाई यातायात सुविधा त दिएकै छ, बेलाबेला एम्बुलेन्सको समेत काम गर्दै आएको छ ।

भारतमा सोचेजस्तो काम नपाएपछि दिक्क भएर फर्केका उनले जिल्लामै पहिलोपटक अटो रिक्सा भित्र्याएका हुन् । जेठयता सदरमुकाम मंगलसैनदेखि ठूलासैन, ठाटिखाद, गैरिटाड र कैलाश खोला रुटमा उनको अटो चल्छ । ‘सडक राम्रो भएका प्रत्येक गाउँ पुगेर आपतकालीन अवस्थाका बिरामी, सुत्केरी, वृद्ध, बालबालिकालाई अस्पताल ल्याउन दिनरात नभनी कुदेको छु,’ बुढाले भने, ‘कमाइसँगै समाज सेवा पनि गरेको छु ।’


१२ लाख ८० हजारमा दुइटा अटो रिक्सा किनेका बुढा मासिक ४५ हजारसम्म कमाउन थालेका छन् । ‘तुर्माखाद नेपालगन्ज र सुर्खेतसँग नजिक छ, अछाममा अटो ल्याउनुपर्छ भन्ने प्रभाव पनि त्यतैबाट परेको हो,’ उनले भने । विदेशमा जस्तोसुकै काम गर्न तयार हुने युवा स्वदेशमा भने हिचकिचाउने गरेको बुढाको बुझाइ छ । अटो रिक्सा व्यवसाय गर्न चाहने अरूलाई पनि उनी प्रेरणा दिन थालेका छन् । ‘स्थानीय तहले सहकार्य गरे अरू अटो थपेर युवालाई आत्मनिर्भर बनाउन चाहन्छु,’ उनले भने ।

Yamaha


महिलालाई राहत
लामो यात्रा गर्दा मात्रै गाडी चढ्न पाउने यहाँका महिला छोटो दूरीमा अटो रिक्सा चल्दा निकै खुसी छन् । ‘चामल, नुनतेलजस्ता घरायसी सामान ल्याउन मंगलसैन बजारै पुग्नुपर्छ,’ मंगलसैन–६ की ६७ वर्षीया रत्ना विकले भनिन्, ‘भारी बोकेर उकालो बाटो वर्षौं हिँडियो । अहिले घरसम्मै अटोमा जान पाउँदा खुसी लागेको छ ।’ बुढाले अटो जान सक्नेसम्मका स्थानमा आफ्नो मोबाइल नम्बर छाडेका छन् । फोन आउनासाथ पुगिहाल्छन् । आपतकालीन अवस्थामा बिरामीको उद्धार गर्ने व्यक्ति बनेका छन् उनी । ‘ठूलासैनबाट प्रसूति गराउन मंगलसैन अस्पताल ल्याउनुपर्ने थियो’ मंगलसैन–७ का उपेन्द्र जैशीले भने, ‘गाडी पाइएन, अटो चालकलाई फोन गर्दा तुरुन्त पुगे, मेरी श्रीमतीको ज्यान बच्यो ।’


२०२४ चैत २४ गते मंगलसैनमा पहिलोपटक गाडी पुगे पनि अहिलेसम्म स्थानीयले पूर्णरूपमा यातायात सेवा पाउन सकेनन् । त्यति बेला पूर्वी अछामको तुर्माखाँद–जंगलघाट–कालिमोरादेखि मंगलसैनसम्म सडक विस्तार गर्न स्थानीयले श्रमदान गरेका थिए । अहिले मंगलसैन जिल्लाका विभिन्न ग्रामीण सडकसँग जोडिन थालेको छ । मध्यपहाडी लोकमार्ग पनि अछाम भएरै निर्माण भइरहेको छ ।


सडक विस्तारसँगै आपतविपतका बखत सदरमुकाम आसपासका क्षेत्रमा सवारीसाधन उपलब्ध हुन थालेको छ । तिनैमध्येको हो चन्द्रबहादुर बुढाको अटो । घरायसी सामान किन्न पुरुषकै भर पर्ने महिलाहरू अटो चल्न थालेपछि आफैं किनमेलका लागि मंगलसैन पुग्न थालेका छन् । ‘बिरामी हुँदा अस्पताल जानेदेखि आफूलाई चाहिने सामान किन्न मंगलसेन पुग्न अटोले सजिलो बनायो,’ ६७ वर्षीया रत्नाले भनिन् ।

प्रकाशित : श्रावण १८, २०७५ ०८:०६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

पूर्वाञ्चल विश्वविद्यालय: निर्देशन मिचेर सम्बन्धन तयारी

कान्तिपुर संवाददाता

विराटनगर — पूर्वाञ्चल विश्वविद्यालयले सरकारी निर्देशनविपरीत सम्बन्धन खोल्ने तयारी गरेको छ । सरकारले कुनै पनि विश्वविद्याललाई आंगिक र निजी कलेजलाई सम्बन्धन दिन रोक लगाएको छ ।

यही विषयलाई लिएर उपकुलपति प्राडा घनश्यामलाल दाससँग विज्ञान तथा प्रविधि संकायका डिन शुभनारायण पाठक र चिकित्साशास्त्र संकायका डिन डा. सिद्धार्थ कोइरालाको मतभेद भएको विश्वविद्यालय स्रोतले जनाएको छ । दुवै डिनले लिँदै आएको प्रवेश परीक्षाको जिम्मेवारी खोसेर विश्वविद्यालयले परीक्षा नियन्त्रक सूर्यप्रसाद संग्रौलालाई दिएको छ ।


विश्वविद्यालयले ब्याचलर कार्यक्रम सञ्चालन गरिरहेका आंगिक र निजी कलेजलाई चिकित्साशास्त्र, विज्ञान तथा प्रविधि, कानुन र कला संकायको स्नातकोत्तर कार्यक्रमको सम्बन्धन दिन गृहकार्य गरिरहेको स्रोतको दाबी छ । ‘कुनलाई दिने र कुनलाई नदिने भन्नेमा उपकुलपति र डिनबीच मतभेद भएको हो,’ स्रोतले भन्यो, ‘सम्बन्धन दिँदा आर्थिक चलखेल हुने भएकाले कुरा नमिलेको हो ।’


शैक्षिक कार्यक्रम सञ्चालन गरिरहेका कलेजलाई स्नातकोत्तर कार्यक्रमको अनुमति दिन विश्वविद्यालयले दुई वर्षदेखि गृहकार्य गरिरहेको स्वीकार्दै उपकुलपति दासले अहिले पनि प्रयासरत रहेको बताए । ‘यसका लागि प्रयास दुई खुड्किला अघि बढिसकेको छ,’ उनले भने ‘अन्तिम खुड्किलो पार गर्न बाँकी छ ।’ विज्ञान तथा प्रविधि संकाय र चिकित्साशास्त्र संकायको प्रवेश परीक्षाको जिम्मेवारी परीक्षा नियन्त्रकलाई दिइएको पनि उनले स्वीकारे । दुई संकायको प्रवेश परीक्षामा निकै खर्च हुने भएकाले कटौतीका लागि त्यसो गरिएको दासको दाबी छ ।


प्रवेश परीक्षाको जिम्मेवारी परीक्षा नियन्त्रकलाई सहमतिमै दिएको विज्ञान तथा प्रविधि संकायका डिन पाठकले बताए । ‘सम्बन्धन दिन सरकारले नै रोक लगाएको छ,’ उनले भने, ‘त्यसैले यसबारे उपकुलपतिसँग कुनै मतभेद छैन ।’


विश्वविद्यालयले विज्ञान तथा प्रविधि संकायअन्तर्गतको वन तथा विज्ञानमा विद्यार्थी नै नभए पनि एकै व्यक्तिलाई सहडिन र क्याम्पस प्रमुख नियुक्त गरेको छ । उक्त संकायमा अहिले एकजना पनि विद्यार्थी छैनन् ।


विश्वविद्यालय स्रोतका अनुसार अभयकुमार साहलाई सहडिन र क्याम्पस प्रमुख नियुक्त गरिएको छ । वातावरण व्यवस्थापन संकायमा स्नातकोत्तर र वन विज्ञान संकायमा ब्याचलर शैक्षक कार्यक्रम सञ्चालन गर्ने विश्वविद्यालयको तयारी छ । ‘दुवै संकायमा अहिले एकै जना विद्यार्थी भर्ना नभए पनि विश्वविद्यालयले क्याम्पस प्रमुख र सहडिन नियुक्त गरेको हो,’ स्रोतले भन्यो । उक्त शैक्षिक कार्यक्रम सञ्चालनका लागि सहडिन र क्याम्पस प्रमुख नियुक्त गरिएको डिन पाठकको भनाइ छ । ‘दुवै कार्यक्रममा चाँडै विद्यार्थी भर्ना गर्न क्याम्पसको पूर्वाधार र पुस्तकालय व्यवस्थापनका लागि नियुक्त गरिएको हो,’ उनले भने ।

प्रकाशित : श्रावण १८, २०७५ ०७:५१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT