तोकिएन भर्नाको मापदण्ड

कक्षा १२ को नतिजा गत साता प्रकाशित भइसकेको तर विश्वविद्यालयहरूले कति जीपीए ल्याउनेलाई भर्ना लिने भन्ने मापदण्ड नबनाउँदा विद्यार्थी अन्योलमा छन् । 
मकर श्रेष्ठ

काठमाडौँ — ललितपुरको एक विद्यालयबाट १२ कक्षा पास गरेका विद्यार्थीको फिजिक्स विषयको सैद्धान्तिकमा डी प्लस आयो ।

प्रयोगात्मकमा ए प्लस । उनी इन्जिनियरिङ अध्ययन गर्न चाहन्छन् ।

Yamaha

‘अब मैले इन्जिनियरिङ पढ्न पाउँछु कि पाउँदिनँ ?’ उनले आफन्त र शिक्षकलाई बारम्बार सोधे । तर, कसैले प्रस्ट जवाफ दिन सकेनन् । भक्तपुरको सामुदायिक विद्यालयकी छात्राले अंग्रेजीमा डी प्लस ल्याइन् । अन्य विषयमा सीभन्दा बढी ग्रेड छ ।

समग्रमा जीपीए २.८६ छ । अब उनी उच्च शिक्षा अध्ययन गर्न पाउने–नपाउने अन्योलमा छिन् । अरू विषयमा सीभन्दा बढी र एउटामा मात्रै डी प्लस वा त्योभन्दा कम भए ग्रेड वृद्धि परीक्षा दिन सकिन्छ ।

अंग्रेजीमा डी प्लस ल्याउँदैमा उच्च शिक्षा अध्ययन गर्न पाइने भए उनी ग्रेड वृद्धि परीक्षा नदिन चाहन्छिन् ।

राष्ट्रिय परीक्षा बोर्डले बिहीबार कक्षा १२ को नतिजा सार्वजनिक गरेको छ । तर, विश्वविद्यालयहरूले समग्रमा कति जीपीए ल्याउनेलाई भर्ना लिने भन्ने निर्णय नगर्दा विद्यार्थी अन्योलमा छन् ।

सबभन्दा बढी विद्यार्थी भर्ना हुने त्रिभुवन विश्वविद्यालयले समेत भर्ना आधार तय गरेको छैन । ‘यस विषयमा निर्णय हुन बाँकी छ,’ त्रिविकी रेक्टर सुधा त्रिपाठीले भनिन्, ‘हाम्रोमा इन्ट्रान्स दिँदा मेरिटका आधारमा भर्ना हुन्छन् । कति जीपीएसम्मलाई भर्ना लिने भन्नेचाहिँ टुंगिएको छैन ।’

१२ कक्षा उत्तीर्ण ५० प्रतिशत बढी विद्यार्थी त्रिविमा भर्ना हुने गरेका छन् । बोर्डका अनुसार नियमिततर्फ मात्रै २ लाख ९९ हजार विद्यार्थी उत्तीर्ण भएका छन् भने आंशिकतर्फ ४१ हजार । बोर्डले यस वर्ष सबै समूहको नतिजा एकैपटक सार्वजनिक गरेको छ ।

भर्ना आधार तय गरेका विश्वविद्यालयले पनि समग्रमा ग्रेड निर्धारण गरेका छन् । कक्षा ११ र १२ को समग्र जीपीए र ग्रेडका आधारमा निर्धारण गर्नुपर्ने हुन्छ ।

बोर्डले नतिजामा जीपीए निर्धारण गरेको भए पनि विश्वविद्यालयले समग्रमा यति ग्रेड ल्याएको हुनुपर्ने भनी सूचना सार्वजनिक गरेका छन् ।

पोखरा विश्वविद्यालयले समग्रमा सी ग्रेड ल्याएको हुनुपर्ने प्रावधान राखेको छ । पूर्वाञ्चल विश्वविद्यालयले सी प्लस ग्रेड ल्याएको हुनुपर्ने जनाएको छ । ५० प्रतिशतभन्दा बढी नम्बर ल्याउने विद्यार्थीको मात्रै सी प्लस मानिन्छ ।

बोर्डले सार्वजनिक गर्ने नतिजामा समग्र ग्रेड उल्लेख हुँदैन । तर, विश्वविद्यालयले ग्रेड तोक्दा थप अन्योल सिर्जना भएको हो । विद्यार्थीको ग्रेड सिटमा विषयगत ग्रेड मात्रै हुन्छ ।

सुदूरपश्चिमाञ्चल विश्वविद्यालयकी उपकुलपति भूषण श्रेष्ठले ११ र १२ मा कति जीपीए ल्याउने विद्यार्थी विश्वविद्यालयमा भर्ना लिने भन्ने निर्णय हुन बाँकी रहेको बताइन् ।

‘डिन कार्यालयले गृहकार्य गरिरहेको छ,’ उनले भनिन् । मध्यपश्चिमाञ्चल विश्वविद्यालयका रजिस्ट्रार महेन्द्रकुमार मल्लले पनि निर्णय हुन बाँकी रहेको बताए ।

‘तीन/चार दिनभित्रै यो विषय टुंग्याउँछौँ ’ उनले भने । वैशाखमा परीक्षा हुनुअघि नै बोर्डले विश्वविद्यालयका पदाधिकारी बोलाएर बेलैमा भर्ना आधार तय गर्न आग्रह गरेको थियो ।

प्रकाशित : श्रावण २०, २०७५ २०:१३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

सेनाको नयाँ अस्पतालमा सेवा सुरु

कान्तिपुर संवाददाता

काठमाडौँ — सेनाले महांकालस्थित नवनिर्मित भवनमा छाउनी अस्पतालको दन्त र बाल चिकित्सा सेवा सञ्चालनमा ल्याएको छ । 

यससँगै आकस्मिक र बहिरंग सेवा पनि सञ्चालनमा आउने भएको छ । दाँतसम्बन्धी समस्याको सामान्य उपचार छाउनीमा हुने भए पनि उच्चस्तरीय उपचार भने नयाँ भवनमा हुने सेनाले जनाएको छ । उक्त भवन सैनिक कल्याणकारी कोषबाट निर्माण गरिएको हो ।

प्रधानसेनापति राजेन्द्र क्षत्रीले अस्पताल भवनको शुक्रबार उद्घाटन गर्दै अत्याधुनिक भवनबाट सैनिक र आश्रित परिवारका लागि स्वास्थ्य सेवा सञ्चालन सुरु भएको जनाए । २०७२ को भूकम्पपछि उक्त भवनबाट प्रदान गरिँदै आएको स्वास्थ्य सेवा बन्द भएको थियो ।

अस्पतालबाट हाल बहालवाला, भूपू सैनिक र तिनका आश्रित परिवारका लागि आकास्मिक र बहिरंग सेवा उपलब्ध हुने बताइएको छ । आरम्भमा दन्त चिकित्सा, बाल चिकित्सा, औषधि वितरण, प्रयोगशाला र फिजियोथेरापी सेवा उपलब्ध हुने जनाइएको छ ।

‘छाउनी अस्पतालमा बिरामीको चापलाई यसले घटाउनेछ,’ क्षत्रीले भने । उनले भविष्यमा सर्वसाधारण नागरिकलाई पनि स्वास्थ्य सेवा उपलब्ध गराउने योजना रहेको जानकारी दिए । भवन जमिनमाथि सात तला र अन्डरग्राउन्ड दुई तला पार्किङ गरी नौ तलाको छ ।’

पहिलो विश्वयुद्धबाट प्रभावित नेपाली सैनिकको उपचार र स्वास्थ्य सेवाका लागि बेलायतले १९८२ सालमा उक्त अस्पताल निर्माण गरिदिएको थियो । महांकालबाट मिलिटरी अस्पतालले दिंँदै आएका धेरै सेवा २०४६ सालपछि छाउनीस्थित वीरेन्द्र सैनिक हस्पिटलमा सारिएको थियो ।

प्रकाशित : श्रावण २०, २०७५ २०:०५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT