भौगोलिक जटिलताले रेलमार्ग बनाउन छेक्दैन : परराष्ट्रमन्त्री

सुरेशराज न्यौपाने

नयाँदिल्ली — प्राविधिक अध्ययनले केरुङ–काठमाडौं रेलमार्ग निकै जटिल र कठिन औंल्याए पनि परराष्ट्रमन्त्री प्रदीप ज्ञवालीले भने त्यस्तो निष्कर्षमा पुग्न हतार गर्न नहुने बताएका छन् । 

भारतका पूर्वप्रधानमन्त्री अटलबिहारी वाजपेयीप्रति अन्तिम श्रद्धाञ्जलि व्यक्त गर्न शुक्रबार दिल्ली आएका मन्त्री ज्ञवालीले कान्तिपुरसँगको सक्षिप्त कुराकानीका क्रममा त्यस्तो बताएका हुन्। नेपालको भौगोलिक जटिलता यथार्थ भए पनि विज्ञान र प्रविधिको क्षेत्रमा भएका ठूला ठूला आविष्कारका सामु कुनै पनि भूगोल अनुल्लघंनीय रहन नसक्ने हुँदा उत्तर र दक्षिण दुवै तर्फबाट नेपाल रेलमार्गमा जोडिन सक्ने मन्त्री ज्ञवालीको दाबी छ।

Yamaha

गत बिहीबार कान्तिपुरको अंग्रेजी सहप्रकाशन द काठमाडौं पोष्टले एक चिनियाँ कम्पनीले गरेको प्राविधिक अध्ययनलाई उद्धृत गर्दै विकट भूगोल र उच्च भूकम्पीय जोखिम क्षेत्र भएकाले केरुङ–काठमाडौं रेलमार्गको निर्माणलाई अत्यन्त कठिन र चुनौतीपूर्ण रहेको खुलासा गरेको थियो। चिनियाँ कम्पनी चाइना रेल्वे फस्ट सर्भे एण्ड डिजाइन इन्स्टिच्युटले प्रस्तावित १२१ किलोमिटर उक्त रेलमार्गको अध्ययन गरेको हो।

मन्त्री ज्ञवालीले रेलमार्गको प्राविधिक अध्ययन प्रतिवेदन अन्तिम टुंगो लागि नसकेको हुँदा अहिले नै रेलमार्ग सम्भव छ र छैन भन्ने टिप्पणी गर्नुको कुनै अर्थ नरहेको बताए। ‘प्रतिवेदन औपचारिक रुपमा अझैसम्म बुझाइएको छैन। त्यसमा छलफल गर्नका निम्ति भदौको पहिलो साता चीनको सियाम बैठक हुँदैछ। त्यहाँ औपचारिक रुपमा छलफल नहुँदै एउटा अनुमानका भरमा टिप्पणी गर्नुको कुनै अर्थ छैन’ ज्ञवालीले भने। आगामी साता नेपाल र चीनका प्रतिनिधि मण्डलबीच सियाममा हुने चार दिने बैठकले रेलमार्गको प्राविधिक अध्ययन माथि छलफल गर्ने बताइएको छ। र, सोही बैठकले नै विस्तृत परियोजना प्रतिवेदन तयार पार्नुका अघिका जटिलताहरु फुकाउने सन्दर्भमा पनि उपाय सुझाउने अनुमान गरिएको छ।
नेपालमा रेलमार्ग र अन्य ठूला पूर्वाधारहरुको विषय उठ्नासाथ त्यसमा हात नै हाल्नु हुँदैन र सक्दैन भन्ने कोणबाट छलफलका हुनुका पछाडि मुलुकलाई सधैँ अल्पविकासको चक्रव्यूहमा राख्ने नियत होइन भन्नेमा आफूलाई आंशका भएको मन्त्री ज्ञवाली बताए। ‘वातावरणीय र लगानीका पक्षहरुलाई निश्चित रुपमा ध्यान दिनुपर्छ। तर, त्यो भन्दै केरुङ–काठमाडौं रेलमार्गको कुरा गर्नासाथ भू-वनोट कमजोर भन्ने, रक्सौल–काठमाडौंको कुरा गर्दा चुरेलाई क्षति पुग्छ भन्नुका पछाडि कुनै स्वार्थ लुकेको हो भन्ने पनि लाग्छ,’ ज्ञवालीले भने।
पछिल्लो समय अनावश्यक शंका र टिप्पणी चीनले अघि सारेको बेल्ट एण्ड रोड इनिसिएटिभ (बिआरई)का सन्दर्भमा गर्ने गरेको उनको भनाइ थियो। ‘बिआरआईको प्रसंगमा ऋणको पासो (डेब्ट ट्र्याप)को कुरा झिकिहालिन्छ। कस्ता परियोजनामा कुन शर्तमा ऋण लिने भन्ने कुरामा सतर्कता अपनाउनै पर्छ,’ मन्त्री ज्ञवालीले थपे। तर, ऋणको पासोको त्रास देखाएर नेपाललाई सँधै अल्पविकासको पासोमा पारिराख्ने काम नहोस् भन्नेमा पनि सचेत हुनुपर्ने ज्ञवालीको भनाइ छ।

Esewa Pasal

प्रकाशित : भाद्र २, २०७५ १७:१९
ADVERTISEMENT
ADVERTISEMENT
प्रतिक्रिया
पठाउनुहोस्

सुरक्षाकर्मीसहितको र्‍याफ्टिङ पल्टिँदा एक बेपत्ता, छ को उद्धार

कमल पन्थी

बर्दिया — बर्दिया राष्ट्रिय निकुञ्ज ठाकुरद्वाराको र्‍याफ्टिङ शनिबार दिउँसो पल्टिँदा गेमस्काउट भोला यादव बेपत्ता भएका छन् । निकुञ्जमा तैनाथ नेपाली सेना र गेमस्काउटसहित सातजना सवार र्‍याफ्टिङ बासगढी-१ निकुञ्जको मुलघाटबाट शिवपुर पोष्ट जानेक्रम पल्टिएको सहायक संरक्षण अधिकृत अशोककुमार भण्डारीले बताए । 

निकुञ्जको खटनपटन र गस्तीमा दुई वटा र्‍याफ्टिङमा १४ जना सवार थिए । पल्टिएको र्‍याफ्टिङका अन्य छ जना निकुञ्जका कर्मचारीले पौडेर ज्यान बचाएका छन् । निकुन्जका अनुसार यादवले लाइफ ज्याकेट लगाए पनि पछि गर्मी भयो भन्दै निकालेका थिए ।

प्रमुख जिल्ला अधिकारी रामबहादुर कुरुम्बाङ्गले यादवको खोजीका लागि सशस्त्र प्रहरीका गोताखोर त्यसतर्फ पठाइएको जनाए । घटना सदरमुकाम गुलरियाबाट करिब ६० किमि उत्तर पूर्वमा पर्छ ।

प्रकाशित : भाद्र २, २०७५ १७:०९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT