किशोरी हत्या प्रकरण: झन् चर्कियो आन्दोलन

भवानी भट्ट

कञ्चनपुर — भीमदत्तकी किशोरीको बलात्कारपछि हत्या घटनामा प्रहरीले नक्कली हत्यारा सार्वजनिक गरेको भन्दै महेन्द्रनगरवासी आन्दोलित बनेका छन् । वास्तविक दोषी पत्ता लगाउन माग गर्दै स्थानीयवासी मंगलबार बिहानैदेखि बजार बन्द गरेर आन्दोलनमा उत्रेका हुन् ।

हत्या आरोपमा पक्राय गरिएका दीलिपसिंह विष्ट ।

प्रदर्शनका कारण महेन्द्रनगर बजार दिनभर तनावग्रस्त बन्यो । प्रहरी र आन्दोलनकारीबीच जिल्ला प्रशासन कार्यालयमा झडपसमेत भयो । झडपमा १२ स्थानीयवासी र ८ प्रहरी घाइते भएको डीएसपी ज्ञानबहादुर सेठीले बताए । जिल्ला प्रहरी कार्यालयले सोमबार पत्रकार सम्मेलन गरेर हत्यामा संलग्न रहेको भन्दै भीमदत्त १९, बागफांँटाका ४१ वर्षीय दिलीपसिंह बिष्टलाई सार्वजनिक गरेपछि स्थानीय झन् आक्रोशित भएका हुन् ।


उनीहरूले वास्तविक दोषीलाई जोगाउन मानसिक अवस्था ठीक नभएको व्यक्तिलाई सार्वजनिक गरिएको आरोप लगाएका छन् । महेन्द्रनगरमा नाराजुलुससहित प्रदर्शन गर्दै उनीहरूले जिल्ला प्रशासन कार्यालय घेराउ गरे । प्रदर्शन नियन्त्रण गर्न प्रहरीले लाठी चार्जसँगै २१ सेल अश्रुग्याससमेत प्रहार गरेको छ । नागरिक संघर्ष समितिले भने प्रहरीले नै सादा पोसाकका जवान खटाएर आन्दोलन बिथोल्ने प्रयास गरेको आरोप लगाएको छ ।

Yamaha


स्थानीयले प्रदर्शनसँगै आइतबारदेखि सुरु रिले अनशन पनि जारी राखेका छन् । उनीहरूले तत्काल यस विषयमा प्रहरी प्रशासन गम्भीर नभए कडा आन्दोलन गर्ने चेतावनी दिएका छन् । ‘त्यो व्यक्ति दोषी हुनै सक्दैन, यो पीडितलाई भुल्याउने खेल हो,’ किशोरी हत्याका दोषी सार्वजनिक गर्न स्थानीयद्वारा गठित नागरिक संघर्ष समितिकी संयोजक मीना भण्डारीले भनिन्, ‘प्रहरीको यो कदमबाट घटनामा ठूलै व्यक्तिको संलग्नता रहेको पुष्टि हुन्छ ।’


उनका अनुसार मंगलबार साँझ जिल्ला प्रशासन कार्यालयमा यही विषयमा सर्वपक्षीय छलफल भएको थियो । छलफलमा पनि प्रशासनले अहिलेसम्म जुटेको प्रमाणका आधारमा बिष्ट नै दोषी देखिएको दाबी गरेको थियो । तर आफूहरूले त्यसलाई कुनै हालतमा स्वीकार्न नसकिने बताएको भण्डारीले जानकारी दिइन् । ‘त्यही व्यक्ति दोषी हो भने प्रहरीले प्रमाण किन देखाउँदैन ?’ भण्डारीले भनिन्, ‘नक्कली दोषी देखाएर वास्तविक अपराधी छुटाउने खेल भइरहेको छ ।’


‘प्रहरीले अनावश्यक दबाब दिइरहेको छ’
मृतक किशोरीका बुवाले पनि प्रहरीले फिल्मी शैलीमा नक्कली दोषी सार्वजनिक गरेको बताएका छन् । दुई दिनअघिसम्म कुनै सुधार नभएको बताउने प्रहरीले एकाएक मानसिक अवस्था ठीक नभएको व्यक्तिलाई समातेर घटना मत्थर पार्न खोजेको उनको आरोप छ । ‘मलाई जबर्जस्ती बोलाएर नदेखेका मान्छेका नाममा किटानी जाहेरी दिन दबाब दिए,’ उनले भने, ‘मैले नमानेपछि घटनास्थलमा लगेर बिष्टको टिसर्टको टुक्रा र कन्डमको खोस्रा देखायो । त्यही प्रमाण हो भने आजसम्म किन देखाइएन त ?’


किशोरीका बुवाले सादा पोसाकमा खटिएका प्रहरीसँगै केन्द्रीय अनुसन्धान ब्युरोको टोलीले समेत अनावश्यक रूपमा दबाब दिइरहेको बताए । ‘सीआईबीले अनुसन्धानमा ध्यान दिनेभन्दा पनि मलाई बढी तनाव दिएको छ,’ उनले भने, ‘उनीहरूले अहिलेसम्म के अनुसन्धान गरे ? बिष्ट नै अपराधी हो भने भरपर्दाे प्रमाण खोइ ?’ प्रहरी भने अहिलेसम्म जुटेको प्रमाणका आधारमा विष्ट नै दोषी देखिएको दाबी गरिरहेको छ ।


कञ्चनपुरका डीएसपी सेठीले केही प्रमाण जुटेको र केही जुटाउने क्रममा रहेको बताए । ‘प्रमाणबिनै दोषी सार्वजनिक गर्ने भए यसअघि नै गरिसक्थ्यौं,’ उनले भने, ‘घटना भएको केही दिनमै एक जना मानसिक अवस्था ठीक नभएको व्यक्ति आएर मैले नै बलात्कारपछि हत्या गरेको भनेका थिए तर उनले खुकुरीले घाँटी रेटेको भनेपछि हामीले छोडेका हौं ।’


प्रकाशित : भाद्र ६, २०७५ ०८:००
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कांग्रेसमा नेतृत्व हत्याउने होड

महाधिवेशन सार्ने षड्यन्त्र हुँदैछ : पौडेल
पौडेलकै कारण ढिलाइ भएको हो : निधि
कुलचन्द्र न्यौपाने

काठमाडौँ — सभापति शेरबहादुर देउवाले एक वर्ष कार्यकाल बढाउन पार्टीको महासमिति बैठक पछि धकेल्न खोजेको भन्दै वरिष्ठ नेता रामचन्द्र पौडेल समूह आक्रोशित भएको छ । गत वैशाखमै केन्द्रीय कार्यसमिति बैठकले यही भदौमा महासमिति बैठक गर्ने निर्णय लिएको थियो ।

भदौमा महासमिति बैठक हुन नसके देउवा असफल बन्ने भन्दै पौडेल पक्षले उनीमाथि नैतिक प्रश्न तेस्र्याएको छ । ‘महासमिति पर धकलेर नियमित महाधिवेशन नगर्ने षड्यन्त्र हुँदै छ,’ पौडेलले सोमबार कान्तिपुरसँग भने, ‘आफ्नो स्वार्थका लागि पार्टीलाई जोखिममा पार्ने काम हुन दिनु हुन्न ।’ अर्का पूर्वमहामन्त्री कृष्णप्रसाद सिटौलाले पनि भदौमा महासमिति बैठक हुन नसके देउवा असफल हुने बताए । आफ्नो अनुकूल परिस्थितिको पर्खाइमा महासमिति सार्दै जाँदा देउवाले झनै प्रतिकूल वातावरण भोग्नुपर्ने उनको चेतावनी छ ।


देउवाले महासमिति पछि धकेल्दा डेढ वर्षपछि गर्नुपर्ने नियमित १४ औं महाधिवेशनसमेत प्रभावित हुने पौडेलले बताए । विधानमा असाधारण परिस्थिति परे त्यसको कारण खोली एक वर्ष कार्यकाल बढाउन सक्ने व्यवस्था छ । देउवा विधानको त्यही व्यवस्थामा टेकेर कार्यकाल लम्ब्याउने योजनामा लागेको बुझाइ पौडेल पक्षको छ ।


उपसभापति विमलेन्द्र निधि भने त्यसलाई ठाडै अस्वीकार गर्छन् । ‘देउवाजीबाट महाधिवेशन लम्ब्याउने षड्यन्त्र भएको छैन, बरु पौडेलजीबाटै भएको छ,’ उनले भने, ‘सभापतिले आफ्नो अधिकार प्रयोग गरेर काम गर्न नपाउँदा समस्या आएको हो ।’ निधिका अनुसार पार्टीको विधान संशोधनका लागि समिति गठनमा पौडेलकै कारण ढिलाइ भएको हो । समितिले फास्ट ट्रयाकमा काम सके भदौभित्रै महासमिति बैठक हुन सक्ने उनले बताए । ‘मैले कैयौंपटक पौडेलजीको घरमा गएर समिति गठनका लागि सदस्यको नाम दिन आग्रह गरें तर उहाँले महिनौंसम्म दिनुभएन,’ उनले भने, ‘विधानबमोजिम काम गर्न नदिएपछि षड्यन्त्र भयो भन्नु गलत हो ।’


महासमितिमा प्रस्तुत हुने प्रमुख एजेन्डा नै विधान संशोधन हो । महासमिति बैठकको दुई तिहाइले मात्रै विधानमा संशोधन र परिमार्जन गर्न सक्छ । प्रवक्ता विश्वप्रकाश शर्माले भदौमा सम्भव नभए पनि दसंैअघि महासमिति बैठक हुनेमा निश्चिन्त रहन आग्रह गरे ।


पौडेल पक्षले विधान मस्यौदा समितिमा आफ्नो पक्षबाट चार जनाको नाम तीन साताअघि नै दिए पनि देउवाले तत्काल समिति घोषणा गरेनन् । यसलाई महासमिति सार्ने ‘षड्यन्त्र’ का रूपमा पौडेल पक्षले बुझेको छ । ‘तीन साताअघि नै नाम पठाउँदा पनि बहानाबाजी गरिँदै छ,’ पौडेलले भने, ‘महासमिति बैठक सार्दै महाधिवेशन लम्ब्याउने कोसिस भइरहेको छ ।’ देउवाले मस्यौदा समिति गठनका लागि शुक्रबार केन्द्रीय कार्यसमिति बैठक बोलाएका छन् ।


सभापतिप्रति नरम बन्दै आएका महामन्त्री शशांक कोइरालाले पनि महासमिति बैठक सार्न खोजिएको भन्दै असन्तुष्टि जनाइसकेका छन् । यसअघि उनले देउवालाई साथ दिँदै आएका थिए । आइतबार विराटनगरको एक कार्यक्रममा कोइरालाले सभापतिको कार्यशैलीप्रति असन्तुष्टि पोखेका हुन् ।


नेतृत्व लिने रणनीति
सभापति देउवा र संस्थापनइतर पक्षका नेताहरू १४ औं महाधिवेशनबाट नेतृत्व हात पार्ने रणनीतिमा लागेका छन् । पार्टी नेतृत्वमा रहेका तीन कोइराला (शशांक, शेखर र सुजाता) ले आफूहरूमध्येबाटै आगामी महाधिवेशनमा एक जना सभापति उम्मेदवार बन्ने सार्वजनिक घोषणा गरिसकेका छन् । देउवा पार्टीलाई लथालिंग अवस्थामै राखेर महाधिवेशन गराउने पक्षमा छैनन् । त्यस्तो अवस्थामा आफूविरुद्धको जनमत अझ खस्कने डर उनमा छ ।


निर्वाचनमा पराजयको दोष देउवालाई दिए जनमत बढाउन संस्थापनइतर पक्ष गोलबन्द छ । देउवा अनुकूल परिस्थिति निर्माण गर्ने योजनासाथ अघि बढ्ने रणनीतिमा छन् । त्यसैले उनी विजय गच्छदारलगायत तत्कालीन फोरम लोकतान्त्रिकका नेता–कार्यकर्ताको व्यवस्थापन गर्नेतर्फ केन्द्रित भएका छन् । यो समूहलाई व्यवस्थापन गर्न सके पार्टीभित्र आफ्नो पकड सुदृढ हुने उनको बुझाइ छ ।


‘त्यसका लागि विधान अनुकूल बनाएर पार्टीका विभाग र अन्य समितिमा व्यवस्थापन गर्ने देउवाको चाहना छ,’ एक केन्द्रीय सदस्यले भने, ‘केन्द्रीय कार्यसमितिको सबै संरचनामा पकड कायम गरेपछि मात्रै महाधिवेशनमा जाने सोचमा देउवा छन् ।’


नेविसंघ तदर्थको बाटोमा
वरिष्ठ नेता पौडेलले विद्यार्थी संगठन नेविसंघको अधिवेशन मिति तत्काल तोक्न माग गरेका छन् । संघको वर्तमान कार्यसमितिको कार्यकाल भदौ ३ बाट सकिएको छ । उसले अधिवेशनको तिथि तोक्नसमेत सकेन । पार्टीले अधिवेशनका लागि भन्दै कार्यसमितिको म्याद तीन महिना थप गरेको छ । तीन महिनामा अधिवेशन हुन नसके कार्यसमिति स्वत: विघटन हुने व्यवस्था विधानमा छ ।


नेविसंघलाई तदर्थ समितिमार्फत चलाउन खोजिएको भन्दै पौडेल पक्षले तत्काल अधिवेशन माग गरेको हो । ‘क्याम्पस, क्षेत्र र जिल्लाको अधिवेशन तत्काल तोक्न म आग्रह गर्छु,’ पौडेलले भने, ‘संघको अधिवेशन नगराई तदर्थवादमा चलाउने बाटो रोजिए दुर्भाग्य हुनेछ ।’


प्रकाशित : भाद्र ६, २०७५ ०७:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT