नेपालका धेरै संभावनाहरु छन् : अमेरिकी उपसहायकमन्त्री 

दाहालको सचिवायलबाट जारी प्रेस नोट अनुसार भेटका अवसरमा मन्त्री वेल्सले नेपालको राजनीतिक स्थायित्वमा महत्वपूर्ण योगदान दिएको भन्दै दाहालको प्रशंसासमेत गरेका थिए । 'नेपालको शान्ति प्रक्रिया र संविधान निर्माण विश्वका लागि मोडल भएको बताउनुभयो' प्रेस नोटमा भनिएको छ, ‘नेपाल प्राकृतिक रुपमा सुन्दर र सम्पन्न देश हो । यहाँ धेरै सम्भावनाहरु रहेका छन् ।’

खुमलटारस्थित दाहाल निवासमा भएको भेटका क्रममा नेपालको आर्थिक समृद्धिमा अमेरिकी सहयोग र समर्थन बारे चर्चा भएको बताइएको छ । ‘नेपालको शान्ति प्रक्रिया, गणतन्त्रको घोषणा र संविधान निर्माण हुँदै त्यसको सफल कार्यान्वयनमा अमेरिकी जनता र सरकारको सद्भावका लागि धन्यवाद छ' दाहालको भनाइ उदृत गर्दै प्रेस नोटमा भनिएको छ ।

दाहालले भौतिक पूर्वाधारको निर्माण, पर्यटन क्षेत्रको विकास, जलविद्युत उत्पादन र कृषिमा आधारित उद्योगको विकासमा अमेरिकी सहयोग आवश्यक रहेको पनि उल्लेख गरेका थिए । 'त्यसका लागि लगानीको सुरक्षा गर्ने प्रतिवद्धता पनि व्यक्त गर्नुभयो' नोटमा भनिएको छ .