स्थानीय तहले भत्ता बढाउन नपाउने

कान्तिपुर संवाददाता

काठमाडौँ — सरकारले स्थानीय तहलाई आफूखुसी सामाजिक सुरक्षा भत्ता वितरणमा रोक लगाउने भएको छ ।

स्थानीय तहले तजबिजी निर्णय गरी सामाजिक सुरक्षा भत्ता बढाउन थालेपछि केन्द्र सरकारले कानुनी रूपमै नियन्त्रण थालेको हो ।

Yamaha

सरकारले संविधानको धारा ४३ मा रहेको सामाजिक सुरक्षाको हक कार्यान्वयनका लागि संघीय संसदमा पेश गरेको विधेयकमा प्रदेश र स्थानीय तहले आफ्नो बजेटबाट भत्ता वितरण गर्न नपाउने व्यवस्था गरेको छ । विधेयकमा सामाजिक सुरक्षा भत्ता केन्द्रले मात्र दिने र वृद्धि गर्ने व्यवस्था छ ।

विधेयकमा स्थानीय तहहरूलाई यस्ता भत्ता वितरणको मात्रै जिम्मा दिने प्रस्ताव गरिएको छ । विधेयक पारित भएसँगै स्थानीय तहले सामाजिक सुरक्षाका नाममा कुनै पनि भत्ता दिन पाउने छैनन् । ‘केन्द्र सरकारबाट वितरण गरिने सामाजिक सुरक्षा भत्ता दोहोरो पर्ने गरी प्रदेश तथा स्थानीय सरकारबाट ती शीर्षकमा थप सामाजिक सुरक्षा भत्ता वितरण गरिने छैन’ विधेयकमा छ ।

विधेयकमा सरकारले ज्येष्ठ नागरिक, आर्थिक रूपले विपन्न, अशक्त, असहाय अवस्थामा रहेका व्यक्ति, असहाय एकल महिला, अपांगता भएका, आफ्नो हेरचाह आफैं गर्न नसक्ने, लोपोन्मुख जातिलाई सामाजिक सुरक्षा भत्ता उपलब्ध गराउने उल्लेख छ ।

कुसुन्डा, राउटे, हायु, किसान, मेचे, वनकरिया, सुरेल, राजी, कुसवाडिया (पथ्थरकट्टा, सिलकट, कुशबधिया र कुचबधिया) र लेप्चालाई लोपोन्मुख जातिमा राखी भत्ता दिने व्यवस्था विधेयकमा गरिएको छ ।

विधेयकमा कसैले ढाँटेर सामाजिक सुरक्षा भत्ता लिएमा रकम असुल गरी त्यति नै जरिवाना असुल गर्ने व्यवस्थासमेत गरिएको छ । भत्ता दुरुपयोगको मुद्दा हेर्ने अख्तियारी भने स्थानीय तहलाई दिइएको छ ।

Esewa Pasal

प्रकाशित : भाद्र १२, २०७५ १८:०४
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

रक्षाबन्धनकै दिन सामूहिक बलात्कार, पाँच पक्राउ

अवधेशकुमार झा

राजविराज — दिदीबहिनी र दाजुभाइबीचको प्रेम प्रतिकको रुपमा रहेको रक्षाबन्धन पर्वकै दिन सप्तरीमा एक युवती सामूहिक बलात्कारको सिकार भएकी छिन् । 

रक्षाबन्धनको मेला भरेर फर्किने क्रममा राति शम्भुनाथ नगरपालिका ६ बसबलपुर जाने बाटोको अर्नाहा भन्ने स्थानमा खडग नगरपालिका ५ की २० वर्षीय बिमला (नाम परिवर्तन) लाई ६ जना युवकले करणी गरेको जिल्ला प्रहरीका डिएसपी भावेश रिमालले जानकारी दिए । रक्षाबन्धन पर्व यही भदौ १० गते मनाइएको छ । पीडित पक्षले कारबाहीको माग गर्दै प्रहरीमा उजुरी गरेपछि घटना सार्वजनिक भएको हो ।
आफ्नै टोलका एक १६ वर्षीय युवक रामबहादुर (नाम परिवर्तन) सँगै रक्षा बन्धनको अवसरमा लागेको मेला भरेर साइकलमा घर फर्किने क्रममा बिमलालाई ६ जना युवाले पालैपालो सामूहिक बलात्कार गरेको रिमालले जनाए । बिमलासँगै रहेका युवक रामबहादुरलाई नियन्त्रणमा लिइ कुटपिट गर्दै मोबाइल र साइकल खोसी आरोपी युवकहरुले बिमलालाई धानखेतमा लगेर बलात्कार गरेका थिए ।

राति अढाई बजे बिमलासँगै रहेका युवक रामबहादुरले इलाका प्रहरी कार्यालय कल्याणपुरमा खबर गरेपछि खोजीमा निस्केको प्रहरीले राति रामबहादुरको साइकल धानखेतमा फेला पारे पनि बिमलालाई फेला पार्न सकेको थिएन । सोमबार बिहान पीडित बिमला आफैंले फोन गरी कठौना खरचुहिया सडक खण्डमा रहेको जानकरी दिएपछि जिल्ला प्रहरी प्रमुख एसपी राजेन्द्र विष्टको नेतृत्वको टोली नै परिचालित भएको थियो ।

बिमलाको उद्धारपछि प्रहरीले उनीसित सोधपुछ गरेको आधारमा सामूहिक बलात्कारमा सम्लग्नको आरोप लागेका ६ जनामध्ये पाँचजनालाई नियन्त्रणमा लिएको छ । प्रहरीले शम्भुनाथ नगरपालिका ५ का २० वर्षीय विक्रम सरदार, २६ वर्षीय कृष्णकुमार साह, २७ वर्षीय मनोजकुमार राम, कञ्चनरुप नगरपालिका ११ का २४ वर्षीय हिरालाल साह र शम्भुनाथ नगरपालिका ७ का १८ वर्षीय राजकुमार भगतलाई नियन्त्रणमा लिएको छ । पक्राउ गरिएका पाँचैजनालाई जबरजस्ती करणी सम्बन्धी मुद्दामा जिल्ला अदालत सप्तरीबाट मंगलबार म्याद थप गरी कारबाही प्रक्रिया अघि बढाएको डिएसपी रिमालले जनाए । घटनामा संलग्नमध्ये फरार रहेका एकजनाको खोजी भइरहेको उनले बताए ।

सामूहिक बलात्कारको सिकार भएकी युवतीको गजेन्द्रनारायण सिंह सगरमाथा अञ्चल अस्पताल राजविराजमा स्वास्थ्य परीक्षण गराइएको छ । उनको स्वास्थ्य अवस्था सामान्य हुन नसकेको डिएसपी रिमालले जानकारी दिए । गत फागुन महिनामा मात्र सप्तरी जिल्लामा १८ वटा बलात्कारका घटना भएका थिए ।

प्रकाशित : भाद्र १२, २०७५ १७:३५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT