तीन दिन बद्ली र वर्षा

रासस/याेन्हाप

काठमाडौँ — आगामी तीन दिनसम्म देशभरि नै सामान्य बद्ली रही धेरै स्थानमा हल्कादेखि मध्यम वर्षा हुने मौसम पूर्वानुमान महाशाखाले जनाएको छ । महाशाखाले तीन दिनसम्मको मौसमी पूर्वानुमान बुलेटिन जारी गर्दै बिहीबार दिउँसो हल्कादेखि मध्यम वर्षा र पश्चिम नेपाल र पूर्वी नेपालका एक–दुई स्थानमा मध्यमदेखि भारी वर्षाको सम्भावना औँल्याएको हो । 

बिहीबार राति देशका अधिकांश स्थानमा सामान्यदेखि पूर्ण बद्ली रही मध्य र पश्चिमका धेरै स्थानमा र पूर्वी नेपालका केही स्थानमा हल्कादेखि मध्यम वर्षाको सम्भावना रहेको छ । शुक्रबार देशभरि नै आंशिकदेखि सामान्य बद्ली रही केही स्थानमा हल्कादेखि मध्यम वर्षाको सम्भावना छ । पश्चिम नेपालको विशेष गरी तराई र चुरे भू–भागमा भारी वर्षाको पनि सम्भावना रहेको महाशाखाले जनाएको छ । भदौ १६ गते शनिबार पनि देशका अधिकांश स्थानमा सामान्यदेखि पूर्ण बद्ली रही केही स्थानमा हल्कादेखि मध्यम वर्षाको सम्भावना छ ।

Yamaha

महाशाखाको पछिल्लो विवरणअनुसार आज सबैभन्दा बढी विराटनगरमा ११६ मिलिमिटर वर्षा भएको छ । ओखलढुङ्गामा ६४, सिमरामा ५२, वीरेन्द्रनगरमा ५४ मिलिमिटर वर्षा भएको छ । काठमाडौँमा २३ मिलिमिटर वर्षा भएको छ । आज काठमाडौँको अधिकतम तापक्रम २९.२ र न्यूनतम तापक्रम २३.९ रहेको छ ।

प्रकाशित : भाद्र १४, २०७५ १६:३७
ADVERTISEMENT
प्रतिक्रिया
पठाउनुहोस्
ADVERTISEMENT

सहजै पद त्याग्छन् अस्ट्रेलियाली नेता

नारायण खड्का

अस्ट्रेलिया — आफ्नै गृहमन्त्रीले नेतृत्वका लागि चुनौती दिएपछि प्रधानमन्त्री माल्कम टर्नबुलले केही दिनअघि सहजै प्रधानमन्त्री पद र पार्टीको नेतृत्व छोडिदिए । उनले केही दिनमै राजनीतिबाटै विश्राम लिने बताइसकेका छन् । 

सन् २०१४ मा ४६ वर्षको उमेरमा अष्ट्रेलियाकै ठूलो राज्य न्यू साउथ वेल्स राज्यको प्रिमियर बनेका मार्क बेयर्डले पनि आफू पदमा रहँदै प्रिमियरको पदका साथै राजनीतिबाटै अलग हुने घोषणा गरे ।

अस्ट्रेलियाकी पहिलो महिला प्रधानमन्त्री बन्ने अवसर पाएकी जुलिया गिलार्डले समेत ५३ वर्षको उमेरमै राजनीतिबाट सन्यास लिईन् । उनी आफ्नै पार्टीबीचमा भएको निर्वाचनमा केभिन रडसँग प्रधानमन्त्री तथा पार्टी नेताको पदमा पराजित भएकी थिईन् ।

अस्ट्रेलियामा आफ्नो पद र आत्मसम्मानमा अलिकति ठेस पुग्ने बित्तिकै लोभ नगरी पद र सत्ता छोड्ने क्रम रोचक छ । उनीहरुले पद र सत्तालाई भन्दा पनि आफ्नो आत्मसम्मान र जनताको भावनाको कदर गर्ने गरेका छन् ।

न्यू साउथ वेल्समै सन् २०११ देखि २०१४ सम्म प्रिमियर भएका ब्यारी ओफ्यारेलले त ३ हजार डलर (करिब २ लाख ५० हजार रुपैयाँ) बराबरको एक वाईन उपहार लिएको भन्दै विरोध भएपछि पदबाट राजीनामा दिएका थिए ।

उनले आफ्नो गल्ती स्वीकार गर्दै तत्कालै पदबाट राजीनामा मात्र दिएनन् कि केही महिनाभित्रैमा राजनीतिबाटै सन्यास समेत लिएका थिए ।

अस्ट्रेलियालाई अवसर र विकास भएको देशका रुपमा चिनिन्छ । त्यतिमात्र नभएर यहाँको राजनीतिक संस्कारलाई विश्वमा नै उच्च सम्मान गरिन्छ । कुनै कार्यमा गलत देखिने बित्तिकै उनीहरु सहज रुपमा पद त्याग्ने गर्छन् ।

३ वर्षअघि अस्ट्रेलियाको सभामुख रहेकी ब्राउनी बिसपले आफ्नै पार्टीको एक सहयोग संकलन कार्यक्रममा जाँदा हेलिकप्टर चढ्दा ५ हजार डलर खर्च गरेको पाइएपछि पदबाट राजीनामा दिईन् । उनले पदबाट राजीनामा मात्र दिईनन् की उक्त खर्चमा २५ प्रतिशत अतिरिक्त शुल्क तिरेर सरकारलाई सो रकम फिर्ता नै गरिदिईन् ।

अस्ट्रेलियाको राजनीतिमा सर्वसाधारणले करबाट तिरेको रकमको दुरुपयोग गरेको आलोचना भएका कारण पदलाई सहज त्याग गर्ने धेरै राजनीतिकर्मीहरु छन् ।

एकवर्षअघि माल्कम टर्नबुल प्रधानमन्त्री रहँदा नै संसदीय खर्चको बारेमा अनुगमन गर्ने संयन्त्रको व्यवस्था गरेका थिए । ‘संसदमा रहेका व्यक्तिहरु जसमा मन्त्रीहरु पनि सम्मिलित हुन्छन् उनीहरुको खर्च स्वतन्त्र निकायले अनुगमन गर्नुपर्छ भन्नेमा सरकार विश्वास राख्दछ ।’ उनले उक्त संयन्त्र निर्माणको क्रममा भनेका थिए ।

अस्ट्रेलियाको राजनीतिलाई बुझेका डा. भरतराज पौडेल अष्ट्रेलियाको राजनीतिमा नैतिकता र जवाफदेहिता अत्यन्तै धेरै भएको बताउँछन् । नेपालमा अहिलेसम्म नैतिकता र जवाफदेहिताको राजनीति शुरुवात नै नभएको उनको दाबी छ ।

नेपालमा एकपटक सत्तामा पुगेर असफल भएको व्यक्ति पटक पटक पुन: शक्तिको प्रयोग गर्दै पार्टीको माथिल्लो तहमा स्थापित हुने र पुन: सत्तामा पुग्ने यसको उदाहरण भएको बताउँछन् ।

नेपालका नेताहरु अष्ट्रेलिया आएर सबै व्यवस्था हेरेर गएपनि त्यसको अलिकति पनि अनुसरण गर्न नसकेकोप्रति उनी अचम्मित मान्छन् । उनी नेपालका नेताहरुले समेत अन्य देशको राजनीतिक संस्कारको सिको गर्नुपर्ने आवश्यता भइसकेको औँल्याउँछन् ।

प्रकाशित : भाद्र १४, २०७५ १५:४२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT