नेकपाका प्रवक्ता विश्वकर्मालाई रिहा गर्न सर्वोच्चको आदेश

कृष्ण ज्ञवाली

काठमाडौँ — नेत्रविक्रम चन्द 'विप्लव' नेतृत्वको नेपाल कम्युनिष्ट पार्टीका प्रवक्ता खडगबहादुर विश्वकर्मालाई तत्काल थुनामुक्त गर्न बन्दीप्रत्यक्षीकरण आदेश जारी गरेको छ । नुवाकोट प्रहरीले पक्राउ गरेकोमा त्यसविरुद्ध विरेन्द्र विश्वकर्माले दायर गरेको बन्दीप्रत्यक्षीकरण निवेदनमा सर्वोच्च अदालतले प्रक्रिया नपुयाई थुनामा नराख्न आदेश दिएको हो ।

विश्वकर्मालाई अदालत रिहा गर्न आदेश दिए पनि बारम्बार छोड्दै पक्राउ गरेकोमा गम्भिर चासो व्यक्त गर्दै सरकारको ध्यानाकर्षण समेत गराएको छ।

Yamaha

‘जुन मुद्दाको सिलसिलामा भनी पक्राउ गरेको छ सो मुद्दामा अनुसन्धान गरी पर्याप्त कारण, आधार, प्रमाण भएमा कानून बमोजिम मुद्दा चलाउन कानूनले रोक लगाएको नदेखिएको’ आदेशमा भनिएको छ, ‘गैरकानूनी थुनामा राखेको भनी दुई दुईपटक थुनामुक्त गर्ने आदेश दिदादिदै फेरी पक्राउ गरेको कामलाई कानूनसम्मत मान्न नमिलेबाट निवेदकको माग अनुसार गैरकानूनी थुनाबाट मुक्त गर्नु भनी आदेश जारी हुने ठहर्छ ।’

यसअघि चन्दा असुली अभियोगमा साउन २३ मा पक्राउ परेका विश्वकर्मालाई सर्वोच्चले छाड्ने आदेश दिएको थियो। त्यस लगत्तै उनलाई अदालत बाहिर प्रहरीले पुन पक्राउ गरेको थियो। यस्तै उनलाई विभिन्न मुद्दामा काभ्रे र नुवाकोटको अदालतमा उपस्थित गराउँदा त्यहाँका अदालतले समेत छोड्न आदेश दिँदा समेत उनलाई प्रहरीले छोड्दै पुन अदालत परिसरबाटै पक्राउ गरिरहेको छ।

Esewa Pasal

प्रकाशित : भाद्र १८, २०७५ १८:११
प्रतिक्रिया
पठाउनुहोस्
ADVERTISEMENT
ADVERTISEMENT

एक सातामा सवा ५ अर्ब छलीका मुद्दा

कृष्ण ज्ञवाली

काठमाडौँ — सरकारले करिब आधा दर्जन घटनामा ५ अर्ब २२ करोड रुपैयाँ राजस्व छली भएको दाबीसहित विभिन्न जिल्ला अदालतमा मुद्दा दायर गरेको छ ।

एक साताको अवधिमा राजस्व अनुसन्धान विभागले काठमाडौं, रूपन्देही, पर्सा र बारा जिल्ला अदालतमा मुद्दा दायर गरेको हो । घटनामा ६ जना सरकारी कर्मचारीसमेत मुछिएका छन् ।

व्यापारी विनोदकुमार गुप्ता र उनी संलग्न फर्म तथा कम्पनीहरूबाट भएको राजस्व छलीका दुई मुद्दा शुक्रबार जिल्ला अदालत काठमाडौंमा दर्ता गरिएको विभागका महानिर्देशक दीर्घराज मैनालीले जनाए । ‘उनीलगायत परिवार सदस्य र फर्ममा संलग्न व्यक्तिहरूमाथि आयकर छली र नक्कली प्रज्ञापनपत्र बनाएको आरोप छ,’ मैनालीले भने, ‘एउटा ट्रकमा ल्याइएको सामानमाथि अनुसन्धान हुँदा २२ जनामाथि १० करोड रुपैयाँभन्दा बढीको बिगो मागदाबी छ । अन्य घटनाको पनि अनुसन्धान गर्दैछौं ।’

हिमालयन कार्गोका नाममा सामान ढुवानी/पैठारी गर्ने गुप्ता भारतीय नागरिक हुन् । उनले आव २०६५/६६ देखि हरेक वर्ष वार्षिक ५ हजार रुपैयाँ आयकर बुझाउँदै आएका थिए । पछिल्लो तीन वर्ष भने एक रुपैयाँ पनि आयकर नतिरेको विभाग स्रोतले बतायो । विभागले उनको खाता अनुसन्धान हुँदा हरेक वर्ष ५० करोडदेखि एक अर्ब रुपैयाँसम्म कारोबार भएको भेट्यो । विभागले गुप्तासहित पत्नी मधुकुमारीविरुद्ध ५४ करोड ४२ लाख ४७ हजार ७५२ रुपैयाँ बिगो र त्यति नै जरिवाना माग गरेको छ । गुप्ता दम्पतीमाथि मात्रै २ अर्ब ७२ करोड १२ लाख ३८ हजार ७६० रुपैयाँ बिगो र जरिवाना मागदाबी भएको देखिन्छ । उनीहरूमाथि ३ वर्ष कैद हुनुपर्ने मागदाबी अभियोगपत्रमा गरिएको छ ।

गुप्ताले शृंखलाबद्ध रूपमा राजस्व छली र भन्सार चुहावट गरेको थाहा पाएपछि विभागले उनीमाथि निगरानीसमेत बढायो । दूध र घ्युको नक्कली भन्सार प्रज्ञापनपत्र बनाई सामान ल्याउँदै गरेको अवस्थामा उनको गाडी बरामद भयो । २३ लाख २० हजार रुपैयाँको उक्त सामान ल्याउन २२ जना संलग्न रहेको विभागको दाबी छ । गुप्ताका दाइ रवीन्द्र र वीरेन्द्र, छोरा राहुल, श्रीमती मधुलाई राजस्वले ४६ लाख ४० हजार रुपैयाँका दरले बिगो र जरिवाना मागदाबी गरेको छ ।

उक्त छलीमा रवीन्द्र वनवारी माता ट्रेडर्समा जोडिएको फेला परेको विभागस्रोतले जनायो । गुप्ताको फर्ममा काम गर्ने र अन्य सहयोगी गरी १० जना उक्त मुद्दामा मुछिएका छन् । गुप्ता गत असोजमा समेत नक्कली राजस्व स्टिकरसहित पक्राउ परेका थिए । तर बन्दी प्रत्यक्षीकरणको निवेदनमार्फत सर्वोच्च अदालतका न्यायाधीश पुरुषोत्तम भण्डारीको एकल इजलासले २०७४ असोज १८ मा दिएको आदेशमा उनी रिहा भएका थिए । उनीमाथि वीरगन्जको राजस्व कार्यालयले जरिवानासमेत गरेको थियो ।

नक्कली प्रज्ञापनपत्रका आधारमा सामान ल्याउन सहयोग गरेको आरोपमा भन्सार एजेन्टसहित ६ जना कर्मचारीविरुद्ध समेत राजस्वले मुद्दा दायर गरेको छ । प्रमुख भन्सार अधिकृत जनार्दन आचार्य, भन्सार अधिकृत बटुकृष्ण अधिकारी, भन्सार जाँचकी वसन्तकुमार सुवेदी, कम्प्युटर अधिकृत चन्द्रबहादुर क्षत्री, नासु जितबहादुर श्रेष्ठ र भन्सार संकेत निरीक्षक रामबहादुर थापाविरुद्ध राजस्वले जिल्ला अदालत काठमाडौंमा मुद्दा दायर गरेको छ । अख्तियारले सक्रियता देखाए यी ६ कर्मचारीमाथि भ्रष्टाचार आरोपमा समेत छानबिन हुन सक्छ । दूध र घ्युको नक्कली प्रज्ञापनपत्र तयार गरिएको मुद्दाको कुल बिगोमात्रै १० करोड २० लाख रुपैयाँँ छ ।

राजस्व अनुसन्धान क्षेत्रीय कार्यालय बुटवलले अर्कै व्यक्तिको कागजात लिई फर्म खडा गरी राजस्व चुहावट गरेको आरोपमा ४ जनाविरुद्ध मुद्दा दायर गरेको छ । भन्सार एजेन्ट नवराजप्रसाद उपाध्याय खनालले कमला रसाइलीको कागजात लिई शिव इन्टरप्राइजेज नामक फर्म खडा गरेको भेटिएको हो । उक्त कम्पनीका सञ्चालकमाथि भन्सार चोरी पैठारी, नक्कली भ्याट बिल र झूटा कागजातका आधारमा राजस्व छलेको आरोप छ । रसाइली सामान्य टेलरिङ सञ्चालन गरी बस्ने व्यक्ति रहेको अनुसन्धानका क्रममा खुलेको राजस्वको दाबी छ ।

यो घटनामा एक अर्ब २३ करोड ४५ लाख ५८ हजार ७२८ रुपैयाँ बिगो मागदाबी गरिएको छ । उनीहरूमाथि तीन वर्ष कैदको मागदाबी छ ।

राजस्वले मण्डला अजिमा इन्टरप्राइजेज खडा गरी राजस्व छलेको आरोपमा शशांक खनाल र राजकुमार गुप्तामाथि ६ करोड ७९ लाख ४६ हजार ३१९ रुपैयाँ बिगो मागदाबी गरेको छ । राजस्वले ६ किलो र ३ किलो सुन तस्करीको आरोपमा ५० करोड ५५ लाख रुपैयाँ बिगो मागदाबी गरेको छ । उक्त घटनामा तेन्जिङ तामाङ, दीपककुमार मौर्यसहित ६ जनालाई प्रतिवादी बनाई काठमाडौं जिल्ला अदालतमा मुद्दा दायर भएको छ ।

कालो हिराको भन्सार चोरी निकासीको आरोपमा ४४ करोड ६५ लाख ४४ हजार रुपैयाँ बिगो मागदाबी गरी रमेश रजकसहित ८ जनामाथि मुद्दा चलाइएको छ ।

छाला उल्लेख गरी मरिचको चोरीनिकासी गरेको आरोपमा सञ्जय अग्रवालसहित ४ जनामाथि ६ करोड ७३ लाख रुपैयाँ बिगो र जरिवाना मागदाबी गरिएको छ । उनीहरूमाथि डेढ वर्षका दरले कैद सजाय हुनुपर्ने राजस्वको दाबी छ । रसुवा र वीरगन्ज भन्सार नाकाबाट सेन्डिल, वाई–फाई राउटर, विभिन्न कपडालगायतका सामानको नाममा एक करोड ८४ हजार रुपैयाँको बिगो मागदाबी भएको छ ।

सुन तस्करी र फोटोकपी मेसिनको राजस्व छलेको आरोपमा राजस्वले करिब साढे ७ करोड रुपैयाँको बिगो मागदाबी गरेर ४ जनामाथि मुद्दा दायर गरेको छ ।

प्रकाशित : भाद्र १, २०७५ १८:४३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT