श्रमदानबाट ७ किमि बाटो

भीमबहादुर सिंह

जाजरकोट — नलगाड नगरपालिका ८, हलचौरवासीले ७ किलोमिटर गोरेटो बाटो खनेका छन् । उनीहरूले नगरपालिकाको बगरादेखि हल्चौरगाउँ पुग्ने उक्त बाटो निर्माण गरेका हुन् ।

नलगाड नगरपालिका ८ वासी श्रमदानस्वरूप बगरा–हलचौर गोरटो बाटो निर्माण गर्दै । तस्बिर : भीमबहादुर

बतासे चिउरी बर्मा सामुदायिक वन उपभोक्ता समूहको नेतृत्वमा हलचौरवासी पाँच सय जनाले श्रमदानस्वरूप बाटो खनेका थिए । स्थानीयले एक साता लगाएर बाटो खनेका हुन् ।

गत असार/साउनको बाढीपहिरोले दर्जनौं ठाउँमा बाटो भत्किन गई आवजावतमै समस्या हुँदा सबै मिलेर निर्माण गरेको स्थानीय नारायणबहादुर खत्रीले बताए । ‘बाटो निर्माणमा हलचौरवासी निकै उत्साहित थिए,’ उनले भने, ‘सरकारको मुख ताकेर बस्नुभन्दा तत्काल आवतजावत सुचारु गर्नेतर्फ लागेका हौं ।’ बाढीपहिरोका कारण पुरानो बाटो हिँड्नै नमिल्ने भएकाले श्रमदान गरेर नयाँ बाटो बनाएको खत्रीले बताए ।

Yamaha

गत आव बगरा–हलचौर सडक निर्माणका क्रममा डोजर प्रयोग गरेर अन्धाधुन्ध खन्दा गोरेटो बाटो भत्किएको थियो । डोजरले बाटो खन्दा छिटो मोटर चढ्न पाइएला भन्ने आस गरेका गाउँले गोरेटोमै नियमित हिँड्न नपाउँदा निराश थिए ।

दर्जनौं पहिरोले अधिकांश बाटो भत्काएपछि स्थानीयलाई आवतजावतका साथै खाद्यान्नलगायत दैनिक उपभोग्य वस्तु ओसारपसारमै समस्या थियो । ‘भत्किएको बाटोमा हिँडडुल गर्न नमिल्ने भएपछि गाउँ नै नाकाबन्दीमा परेको थियो,’ उनले भने । नलगाड सबैभन्दा बढी जनसंख्या भएको गाउँ हो ।

स्थानीयले कुटो, कोदालो, बेल्चा, गैंती, साबेल चलाएर बाटो बनाएको नगरपालिका कार्यपालिका सदस्य नरबहादुर विकले बताए । बाटो निर्माणपछि स्थानीयलाई आउजाउमा सहज भएको उनी बताउँछन् । सधैं अर्काको मुख ताक्ने चलनको अन्त्य गर्दै जनताले स्वस्फूर्त बाटो खनेको विकले सुनाए ।

उनका अनुसार एक महिनासम्म बाटो नहुँदा बिरामीको उपचार गर्न, घट्ट जान, मृत्यु संस्कार गर्नेलगायतमा बाधा पुगेको थियो । गाउँको एकताले बाटो खन्न सफल भएको उनको भनाइ छ । सरकारी खर्चमा निर्माण गरे २० लाखभन्दा बढी बजेट लागत लाग्ने बाटो स्थानीयले घरकै खाना खर्च खाएर नि:शुल्क खनेको उनले सुनाए ।

सरकारले यो गरेन, त्यो गरेन भनेर समय खेर फाल्नुभन्दा सबैले साथ दिए कुनै पनि काम सम्भव हुने स्थानीय समाजसेवी हरिबहादुर खत्रीले बताए । जनताले यति धेरै परिश्रम गरेर खनेको बाटो कसैको कारणले भत्किए सम्बन्धित पक्षलाई कारबाहीको भागी बनाउने उनको धारणा छ । जनताको सहभागिताबिना पूर्वाधार निर्माण दिगो नहुने देखियो,’ उनले भने, ‘सडकले भत्काएको बाटोको छेउछाउमा तत्काल बिरुवा रोप्ने निर्णयसमेत गरिएको छ ।’

प्रकाशित : भाद्र १९, २०७५ ०७:३६
ADVERTISEMENT
ADVERTISEMENT
प्रतिक्रिया
पठाउनुहोस्

यादव मृत्यु प्रकरण: परिवारद्वारा छानबिन माग

प्रहरीले समयमै औषधि नदिँदा बिरामीको मृत्यु हुन पुगेको आफन्तको गुनासो
कान्तिपुर संवाददाता

कपासी (बाँके) — स्थानीय जानकी गाउँपालिका ६, कपासीका राममनोहर यादव गत भदौ ७ गते बर्दियामा पार्टी बैठक भन्दै घरबाट निस्केका थिए । त्यही साँझ प्रहरीले उनलाई पक्राउ गरेको खबर परिवारले पाए ।

अर्को बिहान आफन्तहरू खाना लिएर जिल्ला प्रहरी, बर्दियामा भेट्न गएका थिए । त्यसको तीन दिनपछि फेरि पनि परिवारका सदस्य प्रहरी हिरासतमै भेट्न पुगेका थिए ।

‘ठीकठाक घरबाट हिँडेको मान्छे एक्कासि मरेको खबर आयो । बिरामी भएको भए किन प्रहरीले खबर गरेन,’ मृतक यादवकी आमा धीरजाले भनिन्, ‘छोराको मृत्यु के कारणले भयो, छानबिन गरिनुपर्छ ।’ घटनापछि घरमा आफन्तको भीड लागेको छ ।

हिरासतमा रहेकै अवस्थामा आकस्मिक मृत्युको खबरले परिवारमा आक्रोश छ । उनीहरूले सत्यतथ्य अनुसन्धानका लागि माग गरेका छन् । राममनोहर पहिलेदेखि सीके राउत समूहमा आबद्ध रहेको परिवारले जनाए । यसअघि उनी बाँकेबाट पनि पक्राउ परेका थिए । उच्च अदालतको आदेशमा रिहा भएका हुन् ।

भदौ ७ गते बर्दिया आएका उपप्रधान तथा स्वास्थ्य मन्त्री उपेन्द्र यादवलाई कालो झन्डा देखाएको आरोपमा उनी पक्राउ परेका थिए । प्रहरीले उनीमाथि राजद्रोहविरुद्ध मुद्दा चलाएको थियो । परिवारले प्रहरीको यातनाले मृत्यु भएको आरोप लगाउँदै घटनाबारे छानबिन गर्न माग गरेका छन् । ‘मेरो छोरा कहिल्यै बिरामी परेको छैन । तर, प्रहरीले पक्राउ गरेपछि बिरामी भन्यो,’ आमाले कान्तिपुरसँग भनिन्, ‘बिरामी भएको भए हामीलाई किन जानकारी दिइएन ?’

मृत्युपछि परिवार शोकमा डुबेको छ । पत्नी सुनीता विक्षिप्त छिन् । पतिको मृत्युको खबर सुनेसँगै उनी बोल्न सक्ने अवस्थामा छैनन् । उनका सात र तीन वर्षीय छोरा आदित्य र निश्चल एवं पाँच वर्षीया छोरी कल्पना छन् । मृत्यु खबरपछि सोमबार दिनभर आफन्त उनको घरमा जम्मा भए । उनीहरूले घटनाको छानबिनका लागि दबाब दिन आन्दोलन गर्ने चेतावनी दिए । ‘यो घटनामा प्रहरीको लापरबाही देखिन्छ । छानबिन नभएसम्म शव बुझ्दैनौं,’ आमा धीरजाले भनिन्, ‘हामीलाई मृत्युको कारण चाहियो ।’

राममनोहर गाउँका अगुवा थिए । उनको मृत्युको खबरले स्थानीय आक्रोशित छन् । बर्दिया प्रहरीले भने बिरामी राममनोहरको तत्काल उपचार व्यवस्था मिलाएको जनाएको छ । सुरुमा जिल्ला अस्पतालमा उपचारपछि नेपालगन्ज ल्याइएको थियो । त्यहाँ पनि सम्भव नभएपछि काठमाडौं लगिएको थियो ।

तराई मानवअधिकार रक्षक सञ्जाल (थर्ड एलायन्स) ले प्रहरीको लापरबाही र ढिलासुस्तीले समयमा उपचार नहुँदा उनको मृत्यु भएको आरोप लगाएको छ । उच्च रक्तचापबाट पीडित उनलाई प्रहरीले ढिलो गरी अस्पताल लगेकाले मृत्यु भएको जनाएको छ । उच्च रक्तचापको औषधि पाउने आसमा रहेको यादवका परिवारलाई प्रहरीले दुई दिनसम्म भेट गर्न नदिएको आरोप छ ।

जिल्ला प्रशासन बर्दियाले पत्रकार सम्मेलन गरेर केही सञ्चारमाध्यमले हिरासतमै यादवको मृत्यु भएको भनिएकाले त्यसमा सत्यता नरहेको बताइएको छ । प्रजिअ रामबहादुर कुरुम्बाङले राउतका समर्थकले नेपालको स्वतन्त्रता, प्रादेशिक अखण्डता, राष्ट्रियतामाथि अपमान गरी नारा लगाउँदै मन्त्रीको कार्यक्रम बिथोल्न खोजेकाले पक्राउ गरी मुद्दा चलाएको बताए ।

अर्का पनि बिरामी
उपप्रधान तथा स्वास्थ्यमन्त्री यादवलाई कालो झन्डा देखाएको आरोपमा पक्राउ परेका सीके राउत समूहका बाँके इन्चार्ज इरफान अहम्मद शेष आइतबार रातिदेखि बिरामी छन् । उनलाई लगातार पखाला चलेपछि जिल्ला अस्पतालमा भर्ना गराएको छ । पखाला रोकिएपछि चिकित्सकको सल्लाहमा डिस्चार्ज गरिएको थियो । सोमबार दिउँसो पखाला चलेपछि पुन: अस्पताल भर्ना गरिएको छ ।

प्रकाशित : भाद्र १९, २०७५ ०७:३३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT