पसलबाट अवैध दुई किलो सुन र चार किलो चाँदी बरामद

रमेशकुमार पौडेल

चितवन — नारायणगढको एक सुनचाँदी पसलबाट प्रहरीले दुई किलो ७६ ग्राम सुन र चार किलो ६ सय १७ ग्राम चाँदी बरामद गरेको छ । 

चितवन प्रहरीले मंगलबार बरामद गरेको दुई किलो सुन र चार किलो चाँदी बुधबार बिहान जिल्ला प्रहरी कार्यालयमा सार्वजनिक गरिदै । तस्बिर : रमेशकुमार पौडेल/कान्तिपुर

अवैध रुपमा किनेर बेच्न राखेको आरोपमा मंगलबार दिउँसो चितवन प्रहरीले नारायणगढ पुतलीबजारमा रहेको न्यू गणेश सुनचाँदी पसलका सञ्चालकलाई पक्राउ गरेको हो । प्रहरीले सुन चाँदीका साथै १२ लाख रुपैयाँ नगद पनि नियन्त्रणमा लिएको छ ।

Yamaha

जिल्ला प्रहरी कार्यालयका प्रवक्ता, प्रहरी नायब उपरीक्षक (डिएसपी) प्रभुप्रसाद ढकालका अनुसार पक्राउ पर्नेमा भारत महाराष्ट्रको साङ्ली जिल्ला आटपढे घर भएका २७ वर्षीय राजेन्द्र शिवाजी पाटिल छन् । प्रदेश–३ प्रहरी कार्यालय हेटौंडाको अनुसन्धान समूहले दिएको विशेष सूचनाका आधारमा सुन र चाँदी बरामद भएको चितवन जिल्ला प्रहरी कार्यालयका प्रमुख, प्रहरी उपरीक्षक (एसपी) सुशिलसिंह राठौरले बताए ।

प्रदेश प्रहरी कार्यालयका प्रहरी निरीक्षक रोशन थापाको टोली चितवनको टोलीसँग मिलेर गिरफ्तार गर्न गएको थियो । ‘रसुवा नाका हुँदै चीनबाट नेपाल भित्रिने अवैध सुन चितवनमा पनि बढी नै खपत हुने गरेको सूचनाका आधारमा हामीले अनुसन्धान अगाडि बढाएका थियौं,’ प्रहरी निरीक्षक रोशन थापाले भने ।

बरामद सुनमध्ये एउटा बिस्कुट जस्तो टुक्रा नै एक किलोको छ । अरु साना टुक्राहरु छन् । चाँदीको पनि टुक्राहरु छन् । बरामद भएको सुन र चाँदीको बजार मुल्य एक करोड पर्ने प्रहरीको भनाइ छ । नगद १२ लाख सुन बेचेर राखेको प्रारम्भिक बयानबाट खुल्न आएको डिएसपी ढकालले बताए । पाटिलले एकजना भारतीयले नै आफुलाई सुन बेचेको बयान दिएको ढकालको भनाइ छ । पाटिललाई कारवाहीको लागि राजश्व अनुसन्धान विभाग ललितपुर पठाइने छ ।

प्रकाशित : भाद्र २०, २०७५ १०:३०
ADVERTISEMENT
प्रतिक्रिया
पठाउनुहोस्
ADVERTISEMENT

कानुनको चाङैचाङ

कान्तिपुर संवाददाता

काठमाडौँ — विकासको गतिविधिसँग कम चासो राख्दै राजनेताहरू कानुनविदले बनाएका ऐन कानुनमा अल्झिरहने गरेको पाइन्छ । २०४७ सालको संविधानलाई ‘विधिको शासनको प्रारूप, विश्वकै उत्कृष्ट’को संज्ञा दिंँदै डेढ दशकसम्म शीर्ष नेतृत्वले गीत गाएर हिंँडेकै हो । यही अवधिमा १७ हजार निर्दोष नागरिकले ज्यान गुमाएका र झन्डै ३ हजार राष्ट्रिय गौरवका उद्योगधन्दा निजीकरणको नाममा खरानी बनाइएको पनि सत्य हो ।

२०६२/६३ को जनआन्दोलनपछि अर्को १० वर्ष लगाएर तयार भएको नयाँ संविधान जारी भए पनि अझै विकासको शुभसंकेत देखिएको छैन । अहिले भदौ १ गतेदेखि लागू भएको अपराध संहिताबाट त्रसित हुँदै चिकित्सक आन्दोलनमा उत्रेका छन् भने पत्रकार महासंघ लेखेको, बोलेको, तस्बिर खिचेको वा कार्टुन बनाएको विषयलाई फौजदारी अपराध अन्तर्गत राखिएपछि ती पनि विरोध जनाउन बाध्य भए । प्रदेश दिशाहीन बनेको भन्दै नयाँ कानुन निर्माण गर्न विज्ञहरू लामो समयदेखि पलेँटी कसेर बसेका छन् । माहोल कानुनमय भएसँगै शीर्ष नेतृत्व फेरि ऐन, कानुनबारे प्रवचन दिँंदै हिंँड्न थालेका छन्, लिखतलाई विकास ठान्दै नाचगान गरिरहेको छ । यद्यपि कानुनको जालो जति व्यापक भए पनि अपराध रोकिएको छैन । अधिकांश तस्कर, बलात्कारी, हत्यारा पकडमा आउनसकेका छैनन् । कार्यान्वयन फितलो भएपछि कानुनको ढर्राले मात्र विकास हुने होइन । बेलायतको अलिखित र अमेरिकाको अत्यन्त सानो आकारको संविधान भए पनि विकास चरमचुलीमा पुगेको छ । यता पनि प्रधानमन्त्रीले साँच्चै समृद्धि चाहेका हुन् भने स–साना कुरामा नअल्झिएर मात्र विकासमा अर्जुनदृष्टि राख्ने, जथाभावी अभिव्यक्ति दिने, विसंगति, अपराध नियन्त्रण गर्न नसक्ने मन्त्रीलाई नैतिकताको आधारमा राजीनामा दिन लगाउने, अटेर गर्नेलाई बर्खास्त गर्ने, ऐन कानुनको प्रचारमा विज्ञलाई लगाउने र विशेषज्ञको सल्लाहलाई आत्मसाथ गर्दै अघि बढ्ने व्यवस्था मिलाउनु श्रेयस्कर हुनेछ ।
– भुवनेश्वर शर्मा
चन्द्रागिरि–२, काठमाडौं

प्रकाशित : भाद्र २०, २०७५ १०:२०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT