एक वर्षमा ४ सय ८६ जना बलात्कृत

प्रदीप मेन्याङ्बो

सुनसरी — धरान उपमहानगरपालिका–५ साउनेटार बस्ने स्थानीय बोर्डिङ स्कुलका प्रिन्सिपल झमक बस्नेतले १७ वर्षीया आफ्नै भान्जीलाई पटकपटक बलात्कार गर्दै आएको आरोपमा तीन महिनापछि गतसाता पीडित किशोरीका परिवारले उजुरी दिएका छन् ।

प्रहरीले आरोपित बस्नेतलाई पक्राउ गर्न सकेको छैन ।

Yamaha

यसअघि बराहक्षेत्रकी १३ वर्षीया बालिकाले दिएको जानकारीका आधारमा बलात्कार आरोपमा प्रहरीले बराहक्षेत्र–८ बस्ने ३६ बर्षीय लालबहादुर बस्नेतलाई पक्राउ गरेको छ । हिरासतमा रहेका बस्नेतका बारेमा अझै अनुसन्धान भइरहेको इलाका प्रहरी कार्यालय महेन्द्रनगरका प्रहरी निरीक्षक जीवन तामाङले बताए ।

बस्नेत पक्राउ परेको केही दिन नबित्दै सुनसरीको इनरुवा–६ स्थित पूर्व–पश्चिम राजमार्गमा एक युवती सामूहिक बलात्कारको सिकार बनिन् । झापाबाट आफन्तकोमा आएकी २४ वर्षीया युवती राजमार्गमा अचेत अवस्थामा फेला पारेर प्रहरीको गस्ती टोलीले उद्धार गरेको थियो ।

युवतीको सामूहिक बलात्कारमा संलग्न भएको अरोपमा प्रहरीले पक्राउ गरेका रामधुनी–२ का २१ वर्षीय राहुल मगर, सोही ठाउँका १९ वर्षीय महमद चनक मिया र २१ वर्षीय भोला परियारविरुद्ध जिल्ला अदालत सुनसरीमा जबरजस्ती करणीमा मुद्दा दर्ता भएको छ ।

पछिल्लो समयमा प्रदेश १ मा बलात्कारको घटना बढेका छन् । गत साउनदेखि भदौको तेस्रो साता ८० किशोरी तथा युवती बलात्कृत भएको प्रहरीको तथ्याङ छ । प्रदेश १ प्रहरीका प्रवक्ता एसपी आभूषण तिम्सिनाका अनुसार एक वर्षको अवधिमा ६ वर्षदेखि ४५ वर्षमाथि उमेरमा ४ सय ८६ जना बलात्कृत भएका छन् । ती मध्ये २५ वर्षमुनिका ३ सय ४५ जना बलात्कृत भएका छन् । बलात्कार गरेको आरोपमा ३ सय ४५ जनाविरुद्ध प्रहरी कार्यालयमा उजुरी परेको छ ।

उजुरी परेका तथ्याङकका आधारमा भन्ने हो भने बलात्कृत बालिका, किशोरी र युवतीको संख्या बर्सेनि बढिरहेको छ । यो वर्ष गत वर्षको तुलनामा ४५ भन्दा बढी बलात्कारका घटना सार्वजनिक भएको प्रहरीको तथ्याङ रहेको छ । बलात्कार घटनामा संलग्न रहेकामध्ये प्रहरीले २ सय ७२ जना पक्राउ गरेको छ भने प्रदेश १ मा २ सय १४ अझै फरार रहेको जनाएको छ ।

प्रकाशित : भाद्र २३, २०७५ २०:२०
ADVERTISEMENT
प्रतिक्रिया
पठाउनुहोस्

भारतीय भूपू गोर्खाको पेन्सन रोकियो

घनश्याम खड्का

काठमाडौँ — काठमाडौंबाट पेन्सन बुझ्ने भारतीय सेनाका पूर्वगोर्खाहरूलाई नयाँ व्यवस्था भन्दै ठमेलस्थित क्याम्पले भुक्तानी रोकिदिएको छ । यसले झन्डै ५० हजार पेन्सनर मर्कामा परेका छन् । 

भारत सरकारको नीतिअनुसार हरेक तीन महिनामा भुक्तानी दिने भन्दै क्याम्पले फर्काइदिएपछि जीवन निर्वाह गर्न मुस्किल परेको उनीहरूको गुनासो छ । ‘यो महिना सुरु भएको ९ दिन भइसक्यो तर १ तारिखमा पाउनुपर्ने पेन्सन हामीले अझै पाएका छैनौं,’ पूर्वगोर्खा भारतीय सैनिक भरत थापा भन्छन्, ‘यसले गर्दा कसैलाई बैंकको किस्ता र छोराछोरीको फी तिर्न, कसैलाई नियमित औषधोपचार गर्नसमेत समस्या छ । कतिले त डेरा भाडा नै तिर्न नसक्ने अवस्था आएको छ ।’

थापाका अनुसार नेपालमा ५ लाख हाराहारी पूर्वभारतीय सैनिक छन् । धरान, पोखरा र काठमाडौंस्थित तीन क्याम्प र अस्थायी क्याम्पबाट उनीहरूले पेन्सन पाउँछन् । पोखरा र धरान क्याम्पले भने सेप्टेम्बर १ मै यस महिनाको पेन्सन दिइसकेका छन् ।

पेन्सनरहरूले बैंक खातामा रकम नआएपछि बुझ्न जाँदा क्याम्पले जनशक्ति कमी भएकाले तीन/तीन महिनामा दिने नीति लागू गरिएको भन्दै होल्ड गरिदिएको हो । जबकि भारतीय सरकारले प्रत्येक महिनाको १ तारिखमै पाउने गरी रकम विनियोजन गर्ने गरेको छ । क्याम्पका भारतीय अधिकारीले भारत सरकारको नयाँ व्यवस्थाअनुसार पेन्सन वितरण हुन लागेको बताए ।

‘अब हामी नयाँ व्यवस्थामा जाँदैछौं जसअनुसार पेन्सन एकै पटक भुक्तानी हुनेछ र त्यो तीन–तीन महिनामा हुनेछ,’ काठमाडौं क्याम्प प्रमुखसमेत रहेका भारतीय दूतावासका सुरक्षा सल्लाहकार अविनेश चाम्बियलले भने, ‘अर्काे फेरिएको नीति के छ भने हामी अब कसैलाई नगद पैसा दिँदैनौं, सबैको पेन्सन सम्बन्धित बैंक खातामै पठाइदिन्छौं ।’

पोखरा र धरानमा पनि अब काठमाडौंकै व्यवस्था लागू हुने दाबी चाम्बियलको छ । ‘हामीसँग पर्याप्त जनशक्ति नभएकाले यस्तो गर्नुपरेको हो,’ उनले भने, ‘भारतमा भने पूर्वगोर्खाले पनि महिनैपिच्छे पेन्सन पाउनेछन् ।’ एउटै ब्यारेकमा एउटै कानुनअनुसार ज्यानको बाजी लगाएर पकाएको पेन्सनमा आफूहरूलाई मात्रै भेदभाव भएको भन्दै पेन्सनरहरूले असन्तुष्टि व्यक्त गरेका छन् ।

‘उनीहरूलाई के कम पेन्सन दिइएको छ र ?,’ चाम्बियलले प्रतिटिप्पणी गरे, ‘नीति नै बदलिएको छ भने यसमा म अरू के गर्न सक्छु ?’


प्रकाशित : भाद्र २३, २०७५ २०:१५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT