संविधान दिवसको विरोध गर्न राजपाको केन्द्रीय सकूर्लर

अजित तिवारी

जनकपुर — संघिय (केन्द्रीय) सरकारलाई समर्थन र प्रदेश २ मा आफ्नै सरकार बनाएको मधेसवादी दल राष्ट्रिय जनता पार्टी (राजपा)ले संविधान दिवसको विरोधमा विभिन्न कार्यक्रम घोषणा गरेको छ ।

फाइल तस्बिर

राजपाले असोज ३ गते संविधान दिवसको दिन विरोध प्रदर्शन र विरोध सभा, त्यहि दिन साँझ ७ बजेदेखि ७:१५ बजेसम्म बल्याक आउट र विरोधका अन्य कार्यक्रम तय गर्ने अधिकार दिँदै आफ्ना सबै जिल्ला कमिटीलाई मंगलबार पत्राचार गरेको छ ।

Yamaha


राजपा अध्यक्ष मण्डलका संयोजक महन्थ ठाकुरको हस्ताक्षर रहेको त्यो पत्र अन्यन्तै गोप्य राखिएको छ । त्यही संविधान टेकेर तीन तहको निर्वाचनमा सहभागि भएका राजपाको प्रदेश २ मा गठबन्धनको सरकार छ । संघिय समाजवादी फोरमसँग मिलेर उसले प्रदेश २ मा सरकार बनाएको छ ।

राजपाले संघिय सरकारलाई पनि समर्थन गरेको छ । सोमबार र मंगलबार दुई दिन बसेको राजपाको अध्यक्ष मण्डलको बैठक गरेको ११ बुँदे निर्णय लेखिएको सर्कूलर जिल्ला कमिटीलाई पठाइएको छ ।

११ औं बुँदामा ‘असोज ३ गते मधेसी बिरोधी संविधान जारी गरेकोले त्यो दिन बिभिन्न बिरोधका कार्यक्रमहरु गरी बिरोध दिवस मनाउन’ उल्लेख गरिएको छ । राजपाले संविधान जारी भएको असोज ३ गतेलाई यसअघि कालो दिवस भनेर बिरोध जनाउँथे । यसपाली बिरोध दिवस भनेका छन् ।

‘हामीले सडकबाटै असन्तुष्टि राखिरहँदा पनि असोज ३ गते जबरजस्ती संविधान जारी भयो,’ राजपाका केन्द्रीय प्रवक्ता कृष्णा सिंहले भने, ‘हाम्रा असन्तुष्टि सुन्नसम्म चाहेनन्, बरु गोली ठोके । त्यसैले संविधान दिवसको दिन हामी कुनै न कुनै रुपमा विरोध जनाउने छौं ।’

प्रवक्ता सिंहले राजपाको अध्यक्ष मण्डलको गोप्य सर्कूलरबारे आफूलाई जानकारी नरहेको दाबी गरे ।

Esewa Pasal

प्रकाशित : भाद्र २६, २०७५ १८:३१
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

टिपरले दाजुभाइको लियो ज्यान

अजित तिवारी

जनकपुर — बालुवा बोकेको अनियन्त्रित टिपरले हिर्काउँदा पूर्वपश्चिम राजमार्गको धारापानीमा दाजुभाइको मृत्यु भएको छ । मोटरसाइकलमा यात्रारत दाजुभाइलाई तीव्र गतिमा रहेका टिपरले किचेको थियो ।

टिपरको ठक्करले मृत्यु भएका राई दाजुभाइ चढेको मोटरसाइकल र घटनास्थल । तस्बिर : कान्तिपुर

उदयपुरको त्रियुगा नगरपालिका–४ बस्ने २५ वर्षीय विकास राई र २३ वर्षीय सचिन्द्र राईको मृत्यु भएको इलाका प्रहरी कार्यालय, ढल्केवरले जनाएको छ । मृतक विकास र सचिन्द्र दाजुभाइ हुन् । विदेशबाट आएको समान लिन उनीहरू महोत्तरीको बर्दिवाससम्म यात्रारत थिए ।

चारपाङ्ग्रे एउटा गाडीलाई ओभरटेक गरेको स५प ९०४६ मोटरसाइकललाई ढल्केवरबाट पूर्वतर्फ गइरहेको ना१प ६१८९ नम्बरको टिपरले ठक्कर दिएको थियो । ‘टिपर तीव्र गतिमा थियो,’ जिल्ला ट्राफिक प्रहरी कार्यालय, धनुषाका इन्स्पेक्टर दीपक साहले कान्तिपुरसँग भने, ‘मोटरसाइकलको गति पनि तीव्र नै थियो ।’ टिपरको ठक्करपछि मोटरसाइकलमा रहेका दुवै दाजुभाइको घटनास्थलमै मृत्यु भएको छ ।

टिपर चालक धनुषा लक्ष्मीनिया गाउँपालिका–४ का लक्ष्मण यादवलाई धनुषा प्रहरीले नियन्त्रणमा लिएको छ । प्रहरीसँगको बयानमा चालक यादवले मोटरसाइकल अचानक अगाडि आउँदा दुर्घटना भएको बताएका छन् । धनुषाको लालभित्तीस्थित औरही खोलामा रहेको क्रसरबाट बालुवा बोकेर पूर्वतर्फ जाँदै गरेको टिपरको गति तीव्र थियो ।

इलाका प्रहरी कार्यालय, ढल्केवरका प्रमुख इन्स्पेक्टर सरोज राईले टिपरको दुर्घटनामा परेका दाजुभाइको शरीर क्षतविक्षत भएको बताए । ‘दुवैको शरीरका विभिन्न भाग टिपरले किचेर सडकभरि छरपस्ट थियो,’ इन्स्पेक्टर राईले भने, ‘मृतकको शरीर बटुल्न निकै समय लाग्यो ।’

टिपर ज्यानमारा बनेपछि जिल्ला ट्राफिक प्रहरी कार्यालय, धनुषाले जनकपुर–ढल्केवर सडक खण्डमा टाइमकार्ड दिएर उसको गतिलाई नियन्त्रण गर्ने प्रयास गरे । करिब तीन महिनाअघि जनकपुर आउने र फर्किने टिपरलाई मुजेलियामा ट्राफिक प्रहरीले टाइमकार्ड उपलब्ध गराउन थालेको छ । जनकपुर–ढल्केवर रुटमा गुड्ने लोड टिपरलाई १:३० मिनेट र खालीलाई १ घण्टाको समय तोकिएको छ ।

ट्राफिक प्रहरी कार्यालयका प्रमुख साहले टाइमकार्डलाई चारवटा चेकप्वाइन्टमार्फत कडाइ गरिएको छ । ढल्केवर, महेन्द्रनगर, लक्ष्मीनिया र मुजेलियामा सबै टिपरको समय हेरिन्छ । जनकपुर–ढल्केवर रुटमा टिपरको दुर्घटना बढेपछि ट्राफिक प्रहरीले टाइमकार्ड तोकेको थियो । अहिले यो रुटमा टिपरको दुर्घटनामा कमी आएको छ ।

बुधबार टिपरको ठक्करले राई दाजुभाइको मृत्युपछि धारापानीका स्थानीयले सडक अवरुद्ध गर्दै पूर्वपश्चिम राजमार्गमा पनि टिपरलाई टाइमकार्ड तोक्नुपर्ने माग गरे । ढल्केवरका स्थानीय विजय साहका अनुसार बालुवा–गिट्टी र ढुंगा ओसार्न बढी प्रयोग हुने टिपरको दुर्घटनाले साउनयता मात्रै धनुषामा ३ जनाको ज्यान गइसकेको छ । धनुषामा गतवर्ष टिपरका ५ वटा दुर्घटनामा पनि ३ जनाको मृत्यु भएको थियो ।

टिपरले चालक कतिसम्म लापरबाही गर्छन् भन्ने धनुषाको नक्टाझिझ नजिक भएको दुर्घटनाले देखाउँछ । ना१ख ८३९३ नम्बरको टिपरले सडकछेउको आँपको रूखलाई नै हिर्काएको थियो । रूखलाई दुई चिरा पार्दै ठोक्किएको टिपरका चालक आफैं घाइते भएको थिए ।

प्रकाशित : भाद्र २१, २०७५ ०७:१६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT