ए डिभिजन लिगका आज दुई खेलः शनिबारदेखि स्थगन

कान्तिपुर संवाददाता

काठमाडौँ — शहीद स्मारक ‘ए’ डिभिजन लिग फुटबल प्रतियोगिताअन्तर्गत शुक्रबार दुई वटा खेल हुँदैछन् । 

सातदोबाटोस्थित एन्फा कम्प्लेक्स बुधबार पल्सर सहिद स्मारक ए डिभिजन लिगमा प्रतिस्पर्धा गर्दै मछिन्द्र (सेतो) र च्यासल क्लबका खेलाडीहरू । खेल गोलरहित बराबरीमा टुंगिएको थियो । तस्बिर : हेमन्त श्रेष्ठ/कान्तिपुर

एन्फा कम्प्लेक्स सातदोबाटोमा शुक्रबार पहिलो खेलमा हिमालयन शेर्पा क्लब र विभागीय टोली एपिएफ क्लबबीच प्रतिस्पर्धा हुनेछ । त्यस्तै दोस्रो खेलमा ब्रिगेड ब्वाइज र सिग्नेचर मनाङ मस्र्याङ्दी क्लबबीच खेल हुनेछ । यही असोज १३ गतेदेखि औपचारिकरुपमा शुरु भएर बङ्गबन्धु गोल्डकप अवधिका लागि रोकिएको शहीद स्मारक ‘ए’ डिभिजन लिग फुटबल बुधबारदेखि पुनः शुरु भएको थियो ।

Yamaha

लिग फुटबलअन्तर्ग शुक्रबार पहिलो चरणका खेल सकिँदैछ । पहिलो चरणको खेल सकिएसँगै लिग एक महिनाका लागि स्थगित हुने अखिल नेपाल फुटबल सङ्घ (एन्फा)ले जनाएको छ । दोस्रो चरणका खेलहरु अब छठपछि सञ्चालन गर्ने एन्फाले तयारी गरेको छ । “पहिलो चरणका खेलहरु आज सकिएलगत्तै २७ गतेदेखि लिग स्थगित हुन्छ, दशैं, तिहार, छठ लगायत महत्वपूर्ण चाडबाड सकिएपछि मङ्सिर पहिलोसातादेखि लिगका दोस्रो चरणका खेलहरू शुरु हुन्छ”– लिग निर्देशक सञ्जिव मिश्रले भने ।

लिगका खेलहरू तेह्र चरणसम्म खेलाइनेछ । राउण्ड रोविन लिगको आधारमा हुने प्रतियोगितामा कुल ९१ खेल हुनेछन् । लिगको विजेताले रु ५० लाख, उपविजेताले ३५ लाख, तेस्रोले २५ लाख पाउनेछन् ।

लिगको चौथो टोलीले रु १५ लाख, पाँचौ टोलीले रु सात लाख र छैटौंले रु पाँच लाख पाउनेछन् । फेयर प्ले टिमले एक लाख पाउने छन् । प्रत्येक खेल जिते बापत एन्फाले क्लबलाई ५० हजार तथा म्यान अफ दि म्याच खेलाडीलाई १० हजार दिने छन् । लिग विजेता टोलीले एएफसी एसियन कप फुटबलमा सहभागिता जनाउन पाउने लिग निर्देशक मिश्रले जानकारी दिनुभयो ।

‘ए’ डिभिजन लिग चार वर्षपछि हुन् लागेको हो । पछिल्लो पटक विस २०७१ सालमा ‘ए’ डिभिजन लिग भएको थियो । लिगमा ए डिभिजनका १४ क्लब थ्री स्टार, मनाङ मस्र्याङ्दी, नेपाल पुलिस, एपिएफ, त्रिभुवन आर्मी, जावलाखेल युथ क्लब, फ्रेन्ड्स क्लब, सङ्कटा, मछिन्द्र क्लब, सरस्वती युथ क्लब, च्यासल युथ क्लब, न्युरोड टिम (एनआरटी), ब्रिगेड ब्वाइज र हिमालयन शेर्पा क्लबले सहभागिता जनाएका छन् ।

प्रकाशित : आश्विन २६, २०७५ १३:५०
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कन्सर्टमै व्यस्त

कान्तिपुर संवाददाता

काठमाडौँ — हरेक चाडपर्वको अवसरमा सांगीतिक कार्यक्रमहरु पनि बढ्ने गरेको छ । दसैंमा कन्सर्ट नबढ्ने कुरै छैन । त्यसैले दसैंको अघिपछि गायक–गायिकाहरु निकै व्यस्त हुने गर्छन् । कन्सर्ट भ्याएरै भए पनि संगीतकर्मीहरु सबैले आ–आफ्नै योजना बनाउने गर्छन् ।

पाँच संगीतकर्मीका दसैं योजनाबारे सुनीता साखकर्मी लेख्छिन् :


राजु लामा, गायक
दसैंमा टीका लगाउने चलन छैन, गायक राजु लामाको घरतिर । तैपनि सानैदेखि दसैंमा चङ्गा उडाउने, आफन्तकहाँ जाने भने गर्थे । ‘पहिले त दसैं आउनेबित्तिकै आकाशै छोपिने गरी चङ्गा उडेको देखिन्थ्यो, उडाइन्थ्यो,’ उनले भने, ‘अहिले एउटा पनि उडेको देखिँदैन ।’
मंगोलियन हर्टका ‘फ्रन्टम्यान’ राजु दसैंमा प्राय: घर बाहिरै हुन्छन् । परिवारबाट टाढा । यस वर्ष पनि नेपालभित्रै ब्यान्डसहित दमक, बिर्तामोड, इनरुवा, काभ्रेको तिमालमा कन्सर्ट गर्ने तयारीमा छन् । मंगोलियन हार्टले २५ वर्ष भएको अवसरमा देशका २५ ठाउँमा कन्सर्ट गर्ने योजनामामा छन् उनी ।

तृष्णा गुरुङ, गायिका
कभर सङ गाएर चर्चा कमाएकी तृष्णा बौद्ध धर्मावलम्बी भएकीले दसैं मनाउँदिनन् । तर नजिकका साथीले घरमा बोलाउँदा भने उनी गएर टीका लगाउँथिन्, खेल्थिन् अनि खानेकुरा खान्थिन् । चार वर्षयता उनी दसैंका सांगीतिक कार्यक्रमहरूमा व्यस्त भइरहेकी छन् । यसपालि पनि संखुवासभा, चितवन, पोखरालगायत आठ ठाउँमा कन्सर्ट गर्न पुग्दैछिन् । दसैंमा धेरै कार्यक्रम हुन्छ भन्ने उनलाई लाग्दैन । उनले भनिन्, ‘नेपाल चाडपर्वमा धनी छ । स–साना चाड पनि धुमधामसँग मनाउने भएकाले प्राय: सबै पर्वको अवसरमा कार्यक्रम हुन्छन् । दसैं भनेर धेरै बढ्ने भन्ने हुन्न ।’


आस्था राउत,गायिका
दसैंको अवसर पारेर म्युजिक भिडियो ल्याएकी छन् आस्थाले । आस्थाले घटस्थापनामा पोखरा गाएपछि फूलपातीमा रौतहटको चन्द्रनिगाहपुर र नवमीमा धनुषाको कन्सर्टमा गाउँदैछिन् । ‘अहिले नयाँ ठाउँलाई प्राथमिकता दिइरहेकी छु,’ उनले भनिन् । त्यसपछि उनी दसंै मनाउनचाहिँ घर (काठमाडौं) फर्किने योजनामा छिन् । कहिले कार्यक्रममा जाँदा त कहिले हजुरबुबा, हजुरआमाहरू बितेकाले उनले घरमा दसैं नमनाएको पनि पाँच वर्ष भइसक्यो ।


दसैंमा बच्चा छँदा जस्तो उनलाई अचेल रमाइलो लाग्दैन । बानेश्वरमा हुर्किएकी आस्था दसैं मनाउन पुरानो घर दोलखा चरिकोट पुगेको सम्झन्छिन् । निधारको वल्लो छेउदेखि पल्लो छेउसम्म टीका लाउन नपाएर रोएको सम्झिँदा अहिले आफैं हाँस्ने गर्छिन् । हजुरबुबाको हातबाट टीका लगाउनै पनि पालो कुर्नुपर्दाको समय अहिले धेरै ‘मिस’ हुने उनी बताउँछिन् ।
‘हजुरबुबा प्रधानपञ्च हुनुहुन्थ्यो । गाउँका सबै मानिस हाम्रो घरमा टीका लगाउन आउनुहुन्थ्यो,’ उनले भनिन्, ‘कुर्दाकुर्दा पालै आउँदैनथ्यो । हामीलाई वास्ता नगरेजस्तो लाग्थ्यो अनि रोइदिन्थें ।’ टीका लगाउने रोलक्रम कुर्दाको मज्जा अहिले बुझ्दै गएको उनी सुनाउँछिन् । दसैंका बेलामा सहरबाट गाउँ जाने भएकाले गाउँमा उनको फूर्ति नै बेग्लै हुन्थ्यो । ‘कसले कति पैसा पायो भन्नेमा दाजुभाइसँग प्रतिस्पर्धा नै चल्थ्यो । पैसा कम दिनेलाई लोभी भनिन्थ्यो,’ उनले भनिन्, ‘अहिलेमात्रै पैसाभन्दा नि आशीर्वाद ठूलो हो भन्ने बुझियो ।’


कालीप्रसाद बास्कोटा,संगीतकार
उनले घरमा दसैं मनाउन नपाएको दुई वर्ष भयो । दसैंको अवसरमा चार ठाउँमा कन्सर्ट सकाएर नवमीदेखि घरमै बस्ने योजनामा छन् उनी । ‘परिवारसँगको दसैं मिस गर्छु,’ उनले भने, ‘धेरै ठाउँबाट दसैंको कार्यक्रमका लागि निम्तो आए पनि धेरै दौडधुप गर्दिनँ । नेपाल आइडलको काम पनि गर्नुपर्छ ।’

मनोजकुमार केसी,गिटारिस्ट
उनी दसैं भन्नेबित्तिकै बिहानको शीत सम्झिन्छन् । उनलाई दसैं आउने बेला बिहानीपख घाँसमा देखिने शीतले निकै रमाइलो महसुस गराइदिन्थ्यो । ‘पहिले त वातावरणले नै दसैं आएको संकेत गथ्र्यो,’ उनले भने, ‘अहिले शीत पर्न छोड्यो । शीत नपर्ने भएकाले दसैं आएको गएको केही महसुस नै हुन्न ।’


दसैं आउँदै गर्दा घरमा मालश्री धुन बजाउन थाल्छन् मनोज । पोहोर साल बुबा बितेपछि दसैं मनाउन नपाएका उनी यस वर्ष तीनवर्षे छोरालाई सपिङ गरिदिने र नगरकोट वा धुलिखेल ड्राइभमा लिएर जाने योजनामा छन् । सदस्यहरूको व्यस्तताले १९७४ एडी ब्यान्ड हाल सक्रिय छैन । यस ब्यान्डलाई उनी फेरि सक्रिय बनाउने तयारीमा छन् । ‘हामी ब्यान्डबाटै दसैंमा कन्सर्ट गर्ने योजनामा छौं । अब ब्यान्डलाई निरन्तरता दिने सोच छ’ उनले भने ।

प्रकाशित : आश्विन २६, २०७५ ११:४१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT