कृष्णनगरमा कर्फ्यु हट्यो

कान्तिपुर संवाददाता

कपिलवस्तु — स्थानीय प्रशासनले दुई दिनदेखि लगाएको कर्फ्यु मंगलबार बिहानबाट हटाएको छ । कर्फ्यु हटेसँगै जनजीवन सामान्य बन्दै गएको छ ।

स्थानीय दैनिक उपभोग्य सामग्री खरिद गर्न बजार निस्किन थालेसँगै त्रास पनि हटेको प्रहरी नायब उपरीक्षक रवि रावलले बताए ।

स्थिति सहज बन्दै गएपछि जिल्ला सुरक्षा समितिको मंगलबारको बैठकले कर्फ्यु हटाउने निर्णय गरेको प्रमुख जिल्ला अधिकारी अर्जुनप्रसाद पोखरेलले बताए ।

बुटवल, भैरहवा र काठमाडौंका लागि दिउँसोदेखि बस चल्न थालेका छन् । नेपालका १० ठूला भन्सारमध्येको कृष्णनगर कार्यालयमा भारतबाट आयात सुरु भएको छ ।

मंगलबारमात्र एक करोडभन्दा बढी राजस्व संकलन भएको प्रमुख भन्सार अधिकृत पुण्यविक्रम खडकाले बताए । आन्तरिक राजस्व कार्यालयमा पनि भीड बढेको छ । दसैंमा निकालिएको दुर्गा मूर्तिलाई बजार परिक्रमा गराउने क्रममा शुक्रबार साँझ ढुंगा प्रहार भएपछिको विवादले कृष्णनगर तनावग्रस्त बनेको थियो ।

प्रकाशित : कार्तिक ६, २०७५ १९:२४
प्रतिक्रिया
पठाउनुहोस्

डाक्टर पढाउँदै गाउँपालिका

भीमबहादुर सिंह

जाजरकोट — जुम्ला र डोल्पाको सीमासँग जोडिएका जाजरकोटका दुई गाउँपालिकाले चालु शैक्षिक सत्रदेखि डाक्टर पढाउने भएका छन् । जिल्लाका कुशे र बारेकोट गाउँपालिकाले यस वर्षबाट एक/एक जनालाई एमबीबीएस पढाउने भएका हुन् ।

यी दुवै गाउँपालिकाले पाटन स्वास्थ्य विज्ञान प्रतिष्ठान ललितपुरसँगको साझेदारी छात्रवृत्तिमा डाक्टर पढाउने भएका हुन् । गाउँपालिकाले छात्रवृत्ति कोटामा डाक्टर पढाउने निर्णय गरेपछि यहाँका बासिन्दा खुसी भएका छन् ।

झाडापखाला लगायत रोगको प्रकोप तथा महामारीबाट पटकपटक पीडित यहाँका बासिन्दा गाउँपालिकाले पढाएका डाक्टरबाट घरछेउमै स्वास्थ्य उपचार सेवा पाउने आशामा खुसी भएका हुन् ।

कुशे,बारेकोटलगायत विकट गाउँपालिकाका बासिन्दा गुणस्तरीय उपचारबाट वञ्चित हुदै आएका छन् । विपन्नका छोराछोरीले डाक्टर पढ्न पाउने निर्णय उदाहरणीय भएको स्थानीय बताउँछन् । आफ्नै लगानीमा गाउँपालिकाले स्वास्थ्य क्षेत्रको दक्ष जनशक्ति उत्पादनमा जोड दिनु सुखद मानिएको छ ।

कुशे गाउँपालिका अध्यक्ष हरिचन्द्र बस्नेतको पहलमा गाउँपालिकाले ५०, सम्बन्धित विद्यार्थीबाट २५ र पाटन स्वास्थ्य विज्ञान प्रतिष्ठानले २५ प्रतिशत खर्च व्यहोर्ने सम्झौता भएको छ । मान्यता प्राप्त शिक्षण संस्थाबाट कक्षा ११ र १२ मा विज्ञान समूहअन्तर्गत जीव विज्ञान, रसायन र भौतिक शास्त्र विषयमा ५० प्रतिशत अंक तथा २ दशमलव ४ जिपीए ल्याई उत्तीर्ण गरेकाले उक्त कोटामा डाक्टर पढ्न आवेदन दिन पाउनेछन् ।

त्यस्तै स्वास्थ्य विज्ञान प्रविणता प्रमाणपत्र तहमा ५० प्रतिशत अंक ल्याइ उत्तीर्ण गरेकाले पनि डाक्टर पढ्न आवेदन दिने व्यवस्था छ । साझेदारी छात्रवृत्ति कोटामा डाक्टर पढ्न सम्बन्धित गाउँपालिकाको नागरिक,१० कक्षासम्म सामुदायिक विद्यालयमा अध्ययन गरेको,गरिब तथा जेहेनदार हुनुपर्ने मापदण्ड बनाइएको बस्नेतले बताए । द्विपक्षीय सम्झौताअनुसार प्रतिष्ठानले एमबीबीएस अध्ययनका लागि आवेदन माग गरिसकेको अध्यक्ष बस्नेतको भनाइ छ ।

मंसिर ११ सम्म आवेदन फाराम बुझाउने म्याद रहेको गाउँपालिकाले जनाएको छ । गाउँपालिकाले त्रिभुवन विश्वविद्यालयको इन्जिनियरिङ अध्ययन संस्थान, पुलचोक क्याम्पसँग पनि साझेदारी कोटामा इन्जिनियर पढाउने सम्झौता गर्न लागेको बस्नेतले जानकारी दिए ।

दक्ष प्राविधिक जनशक्ति उत्पादनबाट गाउँको विकासमा टेवा पुग्ने भएकाले यो कार्यक्रम लागु गरिएको उनको भनाइ छ । गाउँपालिकाको लगानीबाट उत्पादन भएका जनशक्तिले गाउँपालिका क्षेत्रभित्र कम्तिमा ४ वर्ष सेवा गनुपर्ने सर्त राखिएको छ । ‘दुर्गम गाउँमा बसेर जनताको सेवा गर्ने दक्ष जनशक्तिको अभावका कारण यस्तो सम्झौता गर्न बाध्य भएका हौं,’ उनले भने,‘गाउँपालिकाको बजेटले भ्याएसम्म अन्य क्षेत्रका जनशक्ति उत्पादनलाई पनि जोड दिइनेछ ।’

प्रकाशित : कार्तिक ६, २०७५ १९:१६
पूरा पढ्नुहोस्
प्रतिक्रिया
पठाउनुहोस्