निर्मला हत्या प्रकरण : थप तीनमाथि अनुसन्धान

कान्तिपुर संवाददाता

काठमाडौँ — निर्मला पन्तको बलात्कारपछि हत्यामा संलग्न आशंकामा प्रहरीले थप तीन जनामाथि अनुसन्धान अघि बढाएको छ । एक जना राजधानीको सुन्धाराबाट पक्राउ परेका हुन् भने दुई जनालाई सोधपुछका लागि कञ्चनपुरबाट झिकाइएको हो ।

काठमाडौंमा पक्राउ गरिएका किशोरलाई महानगरीय प्रहरी वृत्त महाराजगन्जमा राखिएको छ । उनी निर्मलाकै गाउँ भीमदत्त नगरपालिका–१८ का हुन् । उनको डीएनए नमुना परीक्षणका निम्ति केन्द्रीय विधिविज्ञान प्रयोगशाला पठाइएको छ ।

Yamaha


यसअघि मुख्य दोषी भन्दै सार्वजनिक गरिएका व्यक्ति डीएनए परीक्षणबाट छुटेपछि प्रहरीले पछिल्लो पक्राउ र अनुसन्धान गोप्य राखेको छ । स्रोतका अनुसार सोमबार राति प्रहरी महानिरीक्षक सर्वेन्द्र खनाल आफैं केन्द्रीय अनुसन्धान ब्युरो पुगेर बुझ्ने काम गरेका थिए ।

घटनाका बेला गाउँमै रहेका ती किशोरलाई यसअघि पनि अनुसन्धानका लागि पक्राउ गरी छाडिएको थियो । त्यसपछि उनी भारत गएका थिए ।

कञ्चनपुरस्थित संवाददाताका अनुसार लागूऔषध दुव्र्यसनीसमेत रहेका उनी दुई महिनाअघि कुखुरा चोरी आरोपमा पक्राउ परेको उनका काकाले जनाए । बुबा भारतमा रोजगारी गर्छन् । परिवार अस्तव्यस्त छ । घरमा कमै बस्ने उनी रातबिरात मात्र आउने गरेको काकाले बताए ।

निर्मला घर फर्किने बाटामा लागूऔषध दुव्र्यसनीको अखडा रहेको र तिनीहरूले एक्लै आउजाउ गर्ने किशोरीलाई अश्लील संकेत गर्दर्ै सताउने गरेको प्रहरीले सूचना पाएको थियो । प्रहरीका अनुसार अहिले अनुसन्धानमा तानिएका तीनै जना त्यस्ता गतिविधिमा संलग्न थिए ।

ब्युरोको आग्रहमा बाँकी दुई जनालाई कञ्चनपुर प्रहरीले काठमाडौं पठाएको हो । ‘केन्द्रबाट केही भेरिफाइ गर्नुपर्ने भन्दै मगाएकाले उनीहरूलाई बुधबार साँझ अभिभावकसँगै जहाजमा काठमाडौं पठाइएको हो,’ डीएसपी कृष्णराज ओझाले भने ।

दुवै किशोरका साथमा उनीहरूका बुबा गएका छन् । आफन्तका अनुसार दुवै जना १८/२० वर्षका छन् । एक कक्षा ११ मा पढ्छन् । ‘उनीहरूलाई पक्राउ गरिएको हैन, सोधपुछका लागि मात्र पठाइएको हो,’ ओझाले भने ।

प्रकाशित : मंसिर २१, २०७५ ०७:२८
ADVERTISEMENT
प्रतिक्रिया
पठाउनुहोस्
ADVERTISEMENT

सत्य खोज्न जुटे पीडित

घनश्याम खड्का

सिरहा — सत्य निरुपण तथा मेलमिलाप आयोग र बेपत्ता व्यक्तिहरूको खोजी गर्ने आयोगले चार वर्षसम्म सत्य पहिल्याउन नसकेपछि द्वन्द्वपीडित आफैं यसलाई बाहिर ल्याउन अघि सरेका छन् । 

द्वन्द्वपीडित साझा चौतारीले सातै प्रदेशमा पुगी घटना सम्बन्धमा जानकारी बटुल्न सुरु गरेको हो । यो साता सिरहाबाट सुरु भएको यस अभियानलाई उनीहरूले ‘सत्यको बयान’ नाम दिएका छन् । ‘हामीमाथि के भएको थियो भनेर सोधखोजसमेत पनि राज्यले गरेन,’ चौतारीका निवर्तमान अध्यक्ष सुमन अधिकारी भन्छन्, ‘त्यसैले अब हामी आफ्नो कुरा आफैं बाहिर ल्याउन लागेका छौं ।’

चौतारीले प्रदेश २, ७ र ४ गरी पहिलो चरणमा मंसिर महिनाभर तीनवटा प्रदेशमा ‘सत्यको बयान’ लिने कार्यक्रम बनाएका छन् । त्यसै क्रममा आइतबार र सोमबार सिरहाको लहानमा प्रदेश २ का पीडितले सत्यको बयान दिएका छन् ।

‘कसैले सोध्न नआए पनि हाम्रै साथीहरू यसरी सम्झेर आइदिनुभएकामा खुसी लागेको छ,’ सत्यको बयानपछि मोरङ गोविन्दपुरकी ४२ वर्षीया लीलादेवी तामाङले भनिन् । पति टंक तामाङलाई प्रहरीले २०६० सालमा गाउँबाटै पक्राउ गरी लगेपछि कसरी आफ्ना दु:खका दिन सुरु भए भन्ने बयान उनले दिँदा सहभागी सबैका आँखा रसाएका थिए ।

‘उहाँलाई सबका अघिल्तिर पाता कसेर भ्यानमा हाली लगेका थिए, हालसम्म बेपत्ता हुनुहुन्छ,’ लीलादेवीले भनिन्, ‘त्यसबेला मोरङमा डीएसपी को थियो र प्रहरीले मेरा श्रीमान्लाई के गर्‍यो भन्ने अझै खुलेको छैन किनभने उहाँ पक्राउ परेको सत्य राज्यले अहिलेसम्म स्विकारेको छैन ।’

आफ्नो ज्यान तलमाथि पर्न गए श्रीमान् पक्राउ परेको सत्य त्यसै हराएर जाला भन्ने डर उनलाई लागेको थियो । घटनाको १५ वर्षपछि सार्वजनिक रूपमा यसबारे बोल्न पाएपछि भने यसै आधारमा बाँकी प्रमाण खोज्न जहिलेसुकै सजिलो हुने विश्वास उनलाई छ ।

पीडितहरूको उमेर बढ्दै जाँदा घटनाबारे नबिर्सिऊन् भनेर अनौपचारिक रूपमा भए पनि सत्यको सार्वजनिकीकरण गरी त्यसलाई भिडियोमा उतारेर राख्न लागिएको चौतारीले जनाएको छ । बाबु, काका र ठूलाबाबु, हजुरबा र फुपाजु गरी पाँचलाई २०५८ देखि २०६० बीचमा सेनाले हत्या गरेको घटना धनुषा सरसा गाउँकी २३ वर्षीया कल्पना यादवले सुनाउँदा पनि माहोल उस्तै भावुक बन्यो ।

सिरहामा भएको ‘सत्यको बयान’ मा लीलादेवी र कल्पनाजस्ता २७ जनाले आफ्नो घटनासँग सम्बन्धित सबुत प्रमाण, घटना मिति र पीडकको नामलगायत विषय खुलाएका थिए भने त्यसबाट आफ्नो जीवनमा हुन गएको क्षति र दु:खको कथा पनि पस्केका थिए ।

प्रकाशित : मंसिर २१, २०७५ ०७:२६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT